గూగుల్ అకౌంట్ అక్కర్లేదు.. బడ్జెట్‌లో లభించే బెస్ట్ ఆండ్రాయిడ్ ఫోన్లు!

Budget Android Phones: స్మార్ట్‌ఫోన్‌లో మనకు నచ్చిన యాప్స్‌ను డౌన్‌లోడ్ చేసుకోవాలంటే గూగుల్ అకౌంట్ తప్పనిసరిగా ఉండాలా? అసలు గూగుల్ అకౌంట్‌లో లాగిన్ అవ్వకుండానే ఆండ్రాయిడ్ ఫోన్‌ను ఉపయోగించలేమా? చాలామందికి వచ్చే సందేహం ఇదే! అయితే, గూగుల్ అకౌంట్ లేకుండానే ఫోన్‌ను ఉపయోగించుకోవచ్చు. అంతేకాదు.. మన వ్యక్తిగత డేటా గూగుల్‌తో పంచుకోకుండా ఉండాలనుకునే వారికి కూడా కొన్ని ప్రత్యామ్నాయ మార్గాలు ఉన్నాయి.

ప్లే స్టోర్‌కు బదులుగా ఎఫ్-డ్రాయిడ్, ఆరోరా స్టోర్ వంటి ప్రత్యామ్నాయ యాప్ స్టోర్ల ద్వారా అవసరమైన యాప్స్‌ను డౌన్‌లోడ్ చేసుకోవచ్చు. ఇలా గూగుల్ అకౌంట్‌పై ఆధారపడకుండా, ప్రైవసీకి ప్రాధాన్యతనిస్తూ ఆండ్రాయిడ్ ఫోన్ వాడాలనుకునే వారికి రూ.25,000 లోపే కొన్ని ఆసక్తికరమైన ఫోన్లు అందుబాటులో ఉన్నాయి. మరి ఆ ఫోన్లు ఏవి? వాటి ప్రత్యేకతలు ఏమిటి? ఇప్పుడు వివరంగా తెలుసుకుందాం.

TCL 60 XE Nxtpaper 5G

సుమారు రూ.20,800 ధరలో వచ్చే ఈ ఫోన్ డిస్‌ప్లే డిజైన్ చాలా డిఫరెంట్‌గా ఉంటుంది. ఇందులో ఉన్న ప్రత్యేకమైన ఈ-ఇంక్ మోడ్ వల్ల ఫోన్ స్క్రీన్ చదవడానికి చాలా సౌకర్యవంతంగా ఉంటుంది. 8GB ర్యామ్, 128GB స్టోరేజ్, 5,010mah బ్యాటరీతో వస్తున్న ఈ డివైజ్‌లో గూగుల్ యాప్స్ బ్యాక్‌గ్రౌండ్‌లో రన్ అవ్వకుండా ఆపేస్తే ఫోన్ స్పీడ్ ఇంకా పెరుగుతుంది. పుస్తకాలు ఎక్కువగా చదివే వారికి, డిస్ట్రాక్షన్ ఫ్రీ ఫోన్ కావాలనుకునే వారికి ఇది మంచి ఛాయిస్.

Also Read: ఆఫ్‌సీజన్‌లో ఇంత తక్కువకా? అమెజాన్ సేల్‌లో సగానికి సగం తగ్గిన 5-స్టార్ ఏసీల ధరలు!

Motorola Moto G Play 5G

మోటరోలా అనగానే మనకు గుర్తొచ్చేది క్లీన్ సాఫ్ట్‌వేర్ అనుభవం. దాదాపు రూ.15,000 నుండి రూ.20,800 బడ్జెట్‌లో లభించే ఈ ఫోన్ బిల్డ్ క్వాలిటీ చాలా దృఢంగా ఉంటుంది. ఇందులో 5,200mah పెద్ద బ్యాటరీ ఉంది. గూగుల్ సర్వీసెస్ లేకపోవడం వల్ల బ్యాటరీ లైఫ్ మరింత ఎక్కువగా వస్తుంది. మైక్రో ఎస్డీ కార్డ్ సపోర్ట్ ఉండటం వల్ల మీ డేటాను క్లౌడ్‌లో పెట్టకుండా లోకల్‌గానే సేవ్ చేసుకోవచ్చు. థర్డ్ పార్టీ యాప్స్ వాడటానికి ఇది సరైన డివైజ్.

Samsung Galaxy A17 5G

శాంసంగ్ బ్రాండ్ లవర్స్ కోసం రూ.22,500 ధరలో ఈ మోడల్ అందుబాటులో ఉంది. ఎగ్జినోస్ ప్రోసెసర్, 5,000mah బ్యాటరీ ఉన్న ఈ ఫోన్ ప్రత్యేకత ఏంటంటే.. ఏకంగా 6 ఏళ్ల పాటు సాఫ్ట్‌వేర్, సెక్యూరిటీ అప్‌డేట్స్ లభిస్తాయి. గూగుల్ ప్లే స్టోర్ ఉపయోగించకపోయినా.. శాంసంగ్ సొంత Galaxy Store ద్వారా మనకు కావలసిన ప్రధానమైన యాప్స్ అన్నింటినీ సులభంగా డౌన్‌లోడ్ చేసుకోవచ్చు. దీర్ఘకాలం వచ్చే బడ్జెట్ ఫోన్ కావాలనుకునే వారికి ఇది బెస్ట్ ఆప్షన్.

Also Read: సూపర్ ప్రాసెసర్, కొత్త డిజైన్‌తో iPad Mini 8.. కానీ ఆ విషయంలో యాపిల్ నిరాశపరిచింది!