Netflix Subscription Hike: సబ్‌స్క్రిప్షన్ ధరలు పెంచేసిన నెట్‌ఫ్లిక్స్.. కొత్త ప్లాన్స్ ధరలు ఇవే

Netflix Subscription Price Hike| దిగ్గజ ఓటీటీ కంపెనీ నెట్‌ఫ్లిక్స్ పలు దేశాల్లో తన సబ్‌స్క్రిప్షన్ ధరలను పెంచేసింది. ఈ ధర పెంపు గురించి అధికారికంగా ప్రకటించింది. స్టాండర్డ్, ప్రీమియం ప్లాన్లతో సహా అనేక ప్లాన్ల ధరలు పెరిగాయి. ప్రస్తుతం అమెరికా, కెనడా, అర్జెంటీనా, పోర్చుగల్ వంటి దేశాల్లోని యూజర్లు ఇప్పుడు ఎక్కువ డబ్బు చెల్లించాల్సి ఉంటుంది. త్వరలోనే భారత్ సహా మిగతా మార్కెట్లలో కూడా ధరలు పెరగనున్నాయి.

యాడ్-సపోర్టెడ్ ప్లాన్ ధర పెంపు

నెట్‌ఫ్లిక్స్ అడ్-సపోర్టెడ్ ప్లాన్ ధరను పెంచింది. ఇప్పుడు ఈ ప్లాన్ కొత్త ధర నెలకు $8.99కి ఉంది. ఇంతకు ముందు ఇదే ప్లాన్ సబ్‌స్క్రిప్షన్ ఫీజు $7.99 మాత్రమే ఉండేది. ఇది ఇప్పటికీ అతి తక్కువ ధరలో లభించే ఆప్షన్. అయితే ఈ ప్లాన్‌లో సినిమాలు చూసేటప్పుడు యాడ్స్ కనిపిస్తాయి.

స్టాండర్డ్, ప్రీమియం ప్లాన్ల ధరలు

అమెరికాలో స్టాండర్డ్ ప్లాన్ ధర ఇప్పుడు నెలకు $19.99 అయింది. ఇంతకు ముందు $17.99 ఉండేది. ప్రీమియం ప్లాన్ ధర కూడా పెరిగి $26.99కి చేరింది. ఇంతకు ముందు ఈ ప్లాన్ ధర $24.99 మాత్రమే. ఈ ప్లాన్లు హై క్వాలిటీ వీడియో, మల్టీ స్క్రీన్లు అంటే ఫ్రెండ్స్, ఫ్యామిలీ కావాల్సిన వారికి ఉపయోగపడతాయి.

అదనపు మెంబర్ ప్లాన్ల ధరలు పెరిగాయి

యాడ్-సపోర్టెడ్ అదనపు మెంబర్ ప్లాన్ ధర ఇప్పుడు $6.99 అయింది (ఇంతకు ముందు $5.99). యాడ్-ఫ్రీ అదనపు మెంబర్ ప్లాన్ ధర $9.99కి పెరిగింది (ఇంతకు ముందు $8.99). ఈ అదనపు ప్లాన్లు ఇంటి బయట ఉన్నవారితో అకౌంట్ షేర్ చేయడానికి సహాయపడతాయి.

ధర పెంపు వెనుక కారణం

నెట్‌ఫ్లిక్స్ కంటెంట్ తయారీపై భారీగా ఖర్చు చేస్తోంది. 2026లో సుమారు 20 బిలియన్ డాలర్లు కంటెంట్‌పై పెట్టుబడులు చేయాలని కంపెనీ ప్రణాళిక. 2025లో 18 బిలియన్ డాలర్లు ఖర్చు చేసింది. లైవ్ ఈవెంట్లు, వీడియో పాడ్‌కాస్టులు, ఇంటరాక్టివ్ కంటెంట్ వంటి కొత్త ఫార్మాట్లలో కూడా పెట్టుబడి పెడుతోంది. ఇవన్నీ ప్రపంచవ్యాప్తంగా మరిన్ని సబ్‌స్క్రైబర్లను ఆకర్షించడం లక్ష్యం.

Also Read: మెదడుతో ల్యాప్‌టాప్ కంట్రోల్ చేసిన యువకుడు.. కొత్త టెక్నాలజీ ఎలా పనిచేస్తుందంటే

భారీ ఆదాయ వృద్ధి

నెట్‌ఫ్లిక్స్ రాబోయే సంవత్సరాల్లో బలమైన ఆదాయ వృద్ధిని ఆశిస్తోంది. 2026లో 50.7 బిలియన్ నుంచి 51.7 బిలియన్ డాలర్ల వరకు ఆదాయం వస్తుందని అంచనా. కంపెనీ తన గ్లోబల్ విస్తరణను కొనసాగిస్తోంది. వార్నర్ బ్రదర్స్ ఎంటర్‌టెయిన్మెంట్ కంపెనీ ఆస్తులు, ముఖ్యంగా HBO Max స్ట్రీమింగ్ ప్లాట్‌ఫామ్‌ను కొనుగోలు చేయాలని ఆసక్తి చూపుతోంది.

యూజర్లపై ప్రభావం

యూజర్లు ఇప్పుడు నెట్‌ఫ్లిక్స్‌కు ఎక్కువ డబ్బు చెల్లించాల్సి ఉంటుంది. అయితే మెరుగైన కంటెంట్, కొత్త ఫీచర్లు లభించవచ్చు. స్ట్రీమింగ్ సర్వీసుల మధ్య పోటీ పెరగడం వల్ల ఈ ధర పెంపు జరిగింది. యూజర్లు కొత్త ధరలు తమకు విలువైనవా కాదా అని ఆలోచించాలి.