PhonePe లేదా Google Payలో తప్పు నంబర్‌కు డబ్బు పంపారా? ఇలా చేస్తే తిరిగి పొందొచ్చు!

Wrong UPI Transaction: ఫోన్ పే లేదా గూగుల్ పేలో పొరపాటున తప్పుడు నంబర్‌కు డబ్బు పంపారా? ఇలాంటి సమయంలో ముందుగా పేమెంట్ స్టేటస్‌ను చెక్ చేసి, విజయవంతమైన లావాదేవీ అయితే నేరుగా క్యాన్సిల్ చేయడం సాధ్యం కాదని తెలుసుకోవాలి. డబ్బు వేరే వ్యక్తికి వెళ్లినట్లయితే అతడిని సంప్రదించడంతో పాటు, UTR నంబర్, మొత్తం, తేదీ, సమయం వంటి వివరాలతో బ్యాంక్‌కు ఫిర్యాదు చేయవచ్చు. అవసరమైతే NPCI ద్వారా కూడా ఫిర్యాదు చేసే అవకాశం ఉంటుంది. ఇలా చేయడం వలన మీ డబ్బులు తిరిగి వచ్చే అవకాశం ఉంటుంది.

డబ్బు తిరిగి వస్తుందా?

విజయవంతమైన UPI పేమెంట్‌ను పంపిన వ్యక్తి స్వయంగా రద్దు చేయలేడు. డబ్బు అందుకున్న వ్యక్తి సహకరిస్తే తిరిగి పంపవచ్చు. అతను స్పందించకపోతే బ్యాంక్‌కు ఫిర్యాదు చేసి, తప్పుగా జమ అయిన డబ్బును తిరిగి పొందేందుకు అభ్యర్థించాలి. బ్యాంక్ లావాదేవీని పరిశీలించి అవసరమైన ప్రక్రియను ప్రారంభిస్తుంది.

Also Read: లాంగ్ రోడ్ ట్రిప్‌లో పెట్రోల్ ఖర్చులు తగ్గించాలనుకుంటే.. ఈ 5 గాడ్జెట్లు వెంట పెట్టుకోండి!

PhonePeలో ఏం చేయాలి?

PhonePeలో Historyలోకి వెళ్లి తప్పుగా చేసిన పేమెంట్‌ను ఎంచుకోవాలి. అక్కడ కనిపించే Help లేదా Support ఆప్షన్ ద్వారా సమస్యను తెలియజేయవచ్చు. అలాగే మీ బ్యాంక్‌ను సంప్రదించి UTR నంబర్‌తో ఫిర్యాదు చేయడం కూడా ముఖ్యం. సమస్య పరిష్కారం కాకపోతే NPCI ఫిర్యాదు మార్గాన్ని ఉపయోగించవచ్చు.

Google Payలో ఏం చేయాలి?

Google Payలో వేరే వ్యక్తికి డబ్బు పంపినప్పుడు ముందుగా ఆ వ్యక్తిని సంప్రదించమని గూగుల్ సూచిస్తుంది. డబ్బు తిరిగి రాకపోతే లావాదేవీ వివరాలతో మీ బ్యాంక్‌ను సంప్రదించాలి. అవసరమైతే NPCI వద్ద ఫిర్యాదు చేయవచ్చు. గూగుల్ పేలో కనిపించే UPI రిఫరెన్స్ నంబర్‌ను భద్రంగా ఉంచుకోవాలి.

మోసాల విషయంలో జాగ్రత్త..

డబ్బు తిరిగి ఇస్తామని చెప్పి ఎవరైనా OTP, UPI PIN, కార్డు వివరాలు అడిగితే చెప్పకూడదు. UPI PIN డబ్బు పంపడానికి మాత్రమే అవసరం. డబ్బు తీసుకోవడానికి ఇవన్నీ అవసరం ఉండదు. భవిష్యత్తులో పేమెంట్ చేసే ముందు వ్యక్తి పేరు, నంబర్, మొత్తం మరోసారి చెక్ చేయడం వల్ల ఇలాంటి పొరపాట్లను నివారించవచ్చు. ఫిర్యాదు చేసినప్పుడు స్క్రీన్‌షాట్, UTR నంబర్, పేమెంట్ తేదీ, సమయం, మొత్తం వంటి వివరాలు ఇవ్వాలి. ఇవి ఉంటే బ్యాంక్‌కు సమస్యను గుర్తించి పరిశీలించడం సులభంగా ఉంటుంది.

Also Read: ఒంటరి ప్రయాణంలో దారి తప్పినా, ఆపదలో ఉన్నా.. ఈ యాప్స్ క్షణాల్లో ఆదుకుంటాయి!