మీ వాట్సాప్ చాట్స్ ఇతరులు చూడకూడదా? అయితే ఈ ట్రిక్ మీ కోసమే!

WhatsApp Privacy Feature: మన దైనందిన జీవితంలో వాట్సాప్ ఒక ముఖ్యమైన భాగమైపోయింది. వ్యక్తిగత విషయాల నుండి ఆఫీస్ పనుల వరకు అన్నింటికీ దీన్నే వాడుతున్నాం. సాధారణంగా వాట్సాప్‌లో మనం చేసే చాట్స్ అన్నీ ‘ఎండ్-టు-ఎండ్ ఎన్‌క్రిప్షన్’ ద్వారా సురక్షితంగానే ఉంటాయి. అంటే ఆ మెసేజ్‌లను మీరు, అవతలి వ్యక్తి తప్ప మరెవరూ చూడలేరు. అయితే, మన చాట్ హిస్టరీ ఫోన్‌లో శాశ్వతంగా ఉండిపోవడం వల్ల కొన్నిసార్లు ప్రైవసీకి భంగం వాటిల్లే ప్రమాదం ఉంది. ఈ సమస్యకు పరిష్కారంగానే వాట్సాప్ “డిసప్పియరింగ్ మెసేజెస్” (Disappearing Messages) అనే సూపర్ ఫీచర్‌ను అందుబాటులోకి తెచ్చింది. ఇది మీ చాట్స్‌పై మీకు అదనపు నియంత్రణను ఇస్తూ, మీ ప్రైవేట్ సంభాషణలను మరింత భద్రంగా ఉంచడానికి సహాయపడుతుంది.

ఈ ఫీచర్ ముఖ్య ఉద్దేశం ఏమిటంటే, మీరు పంపే మెసేజ్‌లు ఒక నిర్దిష్ట సమయం తర్వాత అవతలి వ్యక్తి ఫోన్ నుండి, మీ ఫోన్ నుండి ఆటోమేటిక్‌గా డిలీట్ అయిపోతాయి. దీని కోసం వాట్సాప్ మనకు మూడు రకాల సమయ పరిమితులను అందిస్తోంది. మీరు మీ అవసరాన్ని బట్టి 24 గంటలు, 7 రోజులు లేదా 90 రోజుల టైమర్‌ను సెట్ చేసుకోవచ్చు. ఉదాహరణకు, మీరు 24 గంటల టైమర్ పెడితే, మీరు పంపిన మెసేజ్ సరిగ్గా ఒక రోజు తర్వాత చాట్ స్క్రీన్ నుండి పూర్తిగా మాయమైపోతుంది. దీనివల్ల మీ ఫోన్ స్టోరేజ్ ఆదా అవ్వడమే కాకుండా, ఒకవేళ మీ ఫోన్ లేదా అవతలి వ్యక్తి ఫోన్ వేరే వాళ్ల చేతికి వెళ్లినా మీ పాత చాట్స్ ఇతరుల కంటపడే అవకాశం అస్సలు ఉండదు. ఇప్పటి వరకూ ఈ ఫీచర్ మొత్తం అందరికీ వర్తించేది.. అయితే ఇప్పుడు ఒచ్చిన ఫీచర్ మీకు కావాల్సిన వాళ్లకు మాత్రమే చాట్ డిలేట్ అయిపోయే విధంగా పెట్టుకోవవచ్చు.

ఈ ఉపయోగకరమైన ప్రైవసీ ఫీచర్‌ను ఆన్ చేయడం చాలా సులభం. మొదట మీరు ఎవరి చాట్‌లో అయితే ఈ ఫీచర్ ఆన్ చేయాలనుకుంటున్నారో వారి వాట్సాప్ చాట్ ఓపెన్ చేయాలి. ఆ తర్వాత స్క్రీన్ పైన కనిపించే వారి పేరు (Profile Name) పై టాప్ చేయాలి. అక్కడ కిందకి స్క్రోల్ చేస్తే మీకు ‘Disappearing messages’ అనే ఆప్షన్ కనిపిస్తుంది, దానిపై క్లిక్ చేయాలి. వెంటనే మీకు మూడు రకాల టైమర్ ఆప్షన్లు (24 Hours, 7 Days, 90 Days) కనిపిస్తాయి, వాటిలో మీకు నచ్చిన దాన్ని సెలెక్ట్ చేసుకుంటే సరిపోతుంది. మీరు ఈ ఫీచర్‌ని ఆన్ చేసిన వెంటనే అవతలి వ్యక్తికి కూడా చాట్‌లో ఒక నోటిఫికేషన్ కనిపిస్తుంది. డిజిటల్ ప్రపంచంలో మన వ్యక్తిగత సమాచారాన్ని సురక్షితంగా ఉంచుకోవడానికి ఈ ఫీచర్ ఎంతో ఉపయోగపడుతుంది, కాబట్టి ఆలస్యం చేయకుండా ఇప్పుడే దీన్ని ప్రయత్నించండి.