Tanveer Ahmed Reaction On Jay Shah: అంతర్జాతీయ క్రికెట్ కౌన్సిల్ చైర్మన్ గా రెండోసారి జై షా ఏకగ్రీవంగా పునర్నియామకం అయ్యాడు. బాలిలో జరిగిన ఐసీసీ బోర్డు సమావేశంలో సభ్యులందరూ ఏకగ్రీవంగా అతన్ని ఎన్నుకొని.. జై షా నాయకత్వంపై విశ్వాసం ప్రకటించారు. ఈ క్రమంలో 2030 వరకు అంతర్జాతీయ క్రికెట్ కౌన్సిల్ చైర్మన్ గా జై షా కొనసాగనున్నారు. అయితే రెండోసారి ఐసీసీ చైర్మన్ బాధ్యతలు జై షాకు దక్కడంపై పాకిస్తాన్ మాజీలు రియాక్ట్ అవుతున్నారు. మొహ్సిన్ నఖ్వీకి ఇవ్వాల్సిన పదవిని జై షా లాగేసుకున్నాడని ఫైర్ అవుతున్నారు.
ఐసీసీ చైర్మన్ గా రెండోసారి జై షా నియామకం కావడంపై పాకిస్తాన్ మాజీ ఫాస్ట్ బౌలర్ తన్వీర్ అహ్మద్ కూడా తన స్టైల్ లో రియాక్ట్ అయ్యాడు. రెండోసారి నియామకమైన జై షా… టీమిండియాను తిరుగులేని శక్తిగా మార్చే ప్రమాదం ఉందని బాంబు పేల్చాడు. 2030 వరకు అతడు పదవిలో కొనసాగుతాడని.. అప్పటి వరకు టీం ఇండియాను ఓడించడం పాకిస్తాన్ వల్ల కాదంటూ సంచలన వ్యాఖ్యలు చేశాడు. 2030 వరకు జరిగే ఐసీసీ టోర్నమెంట్లలో కచ్చితంగా టీమిండియానే ట్రోఫీ ఎగురేసుకు వెళ్తుందని కూడా ఆరోపించాడు. 2024 నుంచి ఇదే పరిస్థితి కొనసాగుతుందని.. 2030 వరకు ఇలానే ఉంటుందని తెలిపాడు.
టీమిండియాకు అనుకూలంగా మైదానాలను జై షా మార్చుతున్నాడని, తాము మొదటి నుంచి దీనిపైనే మొత్తుకుంటున్నట్టు తెలిపాడు. ఇప్పుడు మళ్లీ అతడికే అధ్యక్ష బాధ్యతలు ఇస్తే పాకిస్తాన్ పరిస్థితి ఏంటని ప్రశ్నించాడు. ఇప్పటికైనా ఐసీసీ పెద్దలందరూ అతడిని దించి మొహ్సిన్ నఖ్వీకి ఒక్కసారి ఛాన్స్ ఇవ్వాలని డిమాండ్ చేశాడు. మొహ్సిన్ నఖ్వీ… ఐసీసీ అధ్యక్ష పదవిలో ఉంటే అన్ని క్రికెట్ బోర్డులకు న్యాయం జరుగుతుందని తెలిపాడు. ఆ దిశగా అందరూ ముందుకు రావాలని కోరాడు. ఒకవేళ తాను చెప్పినట్టుగా ముందుకు రాకపోతే అన్ని క్రికెట్ బోర్డులకు నష్టమే జరుగుతుందని బాంబు పేల్చాడు. 2030 వరకు బీసీసీఐ క్రికెట్ బోర్డుకు మాత్రమే మేలు జరుగుతుందని తెలిపాడు.
ఐసీసీ చైర్మన్ గా జై షా రెండోసారి ఎన్నికైన 2030 వరకు కొనసాగుతాడు. 2024 ఆగస్టులో తొలిసారిగా జై షా ఎన్నికై, డిసెంబర్ లో బాధ్యతలు తీసుకున్నాడు. ఈ క్రమంలోనే 35 సంవత్సరాల వయసులోనే ఐసీసీ చైర్మన్ గా బాధ్యతలు తీసుకున్న పిన్న వయస్కుడిగా రికార్డు సృష్టించాడు. మొదటి ఎన్నిక ప్రకారం 2027 డిసెంబర్ వరకు జై షా పదవి కాలం ముగుస్తుంది. కానీ ఇప్పుడు మళ్లీ రెండోసారి ఎన్నిక కావడంతో 2030 వరకు అంటే మూడు సంవత్సరాలు అదనంగా అతడు ఐసీసీ అధ్యక్ష పదవిలో ఉంటాడు.