Fire Accident: పెట్రోల్‌ బంక్‌ వద్ద కారులో చెలరేగిన మంటలు.. భయంతో పరుగులు తీసిన జనాలు

Fire Accident: హైదరాబాద్ నగరంలో సోమవారం మధ్యాహ్నం ఘోర ప్రమాదం తప్పింది. పంజాగుట్ట పరిధిలోని ఎర్రమంజిల్ ప్రాంతంలోని ఒక పెట్రోల్ పంపులో.. ఇంధనం నింపించడానికి వచ్చిన కారులో ఒక్కసారిగా మంటలు చెలరేగాయి. ఆ సమయంలో అక్కడ పెట్రోల్ నింపించుకుంటున్న వాహనదారులు, సిబ్బంది భయంతో పరుగులు తీశారు. అయితే వెంటనే స్పందించిన పెట్రోల్ పంపు సిబ్బంది.. అప్రమత్తంగా వ్యవహరించడంతో ఒక పెద్ద ప్రమాదం తప్పింది.

మంటలు పెరిగేలోపే అక్కడ పనిచేస్తున్న పెట్రోల్ పంపు సిబ్బంది.. వెంటనే అగ్నిమాపక యంత్రాలను తీసుకుని మంటలను అదుపులోకి తెచ్చారు. మంటలను అదుపు చేసిన తర్వాత కారును బయటికి తరలించి మరింత ప్రమాదం జరగకుండా చూసుకున్నారు.

వాహనదారుల ఆందోళన
అకస్మాత్తుగా మంటలు రావడంతో అక్కడున్న వాహనదారులు భయాందోళనకు గురయ్యారు. కొందరు దూరంగా పారిపోగా, మరికొందరు సిబ్బందికి సహాయం చేశారు. కొద్ది నిమిషాలపాటు ఆ ప్రాంతంలో ట్రాఫిక్ నిలిచిపోయింది. పోలీసులు, అగ్నిమాపక సిబ్బంది సమాచారం అందుకుని ..సంఘటనా స్థలానికి చేరుకునేలోపే మంటలు అదుపులోకి వచ్చాయి.

మంటల కారణం ఏమిటి?
ప్రాథమిక సమాచారం ప్రకారం, కారులోని ఇంజన్ భాగంలో షార్ట్ సర్క్యూట్ కారణంగా మంటలు చెలరేగి ఉండవచ్చని పోలీసులు అనుమానిస్తున్నారు. కార్ పాత మోడల్ కావడంతో వైరింగ్‌లో లోపం కారణంగా ఈ ప్రమాదం జరిగి ఉండొచ్చని అగ్నిమాపక అధికారులు తెలిపారు. అయితే ఖచ్చితమైన కారణం కోసం ఫోరెన్సిక్‌ నిపుణుల సహకారంతో దర్యాప్తు కొనసాగుతోంది.

స్పందించిన అధికారులు
ఈ ఘటనపై స్పందించిన ఫైర్‌ డిపార్ట్‌మెంట్ అధికారి మాట్లాడుతూ, “పెట్రోల్ పంపు వద్ద మంటలు రావడం చాలా ప్రమాదకరం. చిన్న తప్పిదం జరిగినా పేలుడు సంభవించే అవకాశం ఉంటుంది. అయితే సిబ్బంది సమయస్ఫూర్తితో వ్యవహరించడం వల్లే భారీ నష్టం తప్పింది అని అన్నారు.

Also Read: బాగా ముదిరిపోయారు.. ఫాంహౌస్‌లో మైనర్ల ట్రాప్‌హౌస్ పార్టీ..?

ప్రజలకు హెచ్చరిక
వాహనాల్లో ఎలక్ట్రికల్ లోపాలు, వైరింగ్ దెబ్బతినడం, పాత బ్యాటరీలు వంటి అంశాలను నిర్లక్ష్యం చేయరాదని, పెట్రోల్ పంపులో మొబైల్ ఉపయోగించడం, ఇంజన్ ఆన్‌లో ఉంచడం వంటి చర్యలు ప్రమాదకరమని.. జాగ్రత్తలు తీసుకోవాలని సూచించారు.

Share

• 
• 
• 
• 
• 
•