Chalapathirao : చలపతిరావుకు చిరు, బాలయ్య నివాళులు.. ఎన్టీఆర్‌ భావోద్వేగం..

Chalapathirao : ప్రముఖ నటుడు చలపతిరావుకు సినీప్రముఖులు నివాళు అర్పించారు. ఆయనతో ఉన్న అనుబంధాన్ని గుర్తు చేసుకున్నారు. ఆయన మరణం టాలీవుడ్ కు తీరని లోటన్నారు.

చిరంజీవి
రవిబాబు నివాసానికి వెళ్లి చలపతిరావు పార్థివదేహానికి చిరంజీవి శ్రద్ధాంజలి ఘటించారు. ఈ డిసెంబర్ తీరని వేదన కలిగించిందని మెగాస్టార్ అన్నారు. విలక్షణమైన నటుడు, తనదైన శైలిలో తెలుగు ప్రేక్షకుల అభిమానాన్ని చూరగొన్న చలపతిరావు అకాల మరణ వార్తను తనను కలచివేసిందన్నారు. మద్రాసులో ఉన్నప్పటి నుంచే ఆయనతో అనుబంధం ఉందని తెలిపారు. ఎన్నో చిత్రాల్లో కలిసి నటించిన విషయాన్ని గుర్తు చేశారు. చలపతిరావు ఆత్మకు శాంతి చేకూరాలని కోరుకుంటున్నానని చిరంజీవి అన్నారు. రవిబాబుతోపాటు ఆయన కుటుంబ సభ్యులకు ప్రగాఢ సానుభూతి తెలిపారు. నటుడు చలపతిరావు తనకు మంచి మిత్రుడని అన్నారు.

బాలకృష్ణ
చలపతిరావు హఠాన్మరణం తీవ్రంగా కలిచివేసిందని బాలకృష్ణ అన్నారు. తన విలక్షణమైన నటనతో తెలుగు ప్రేక్షకులను అలరించారని ప్రశంసించారు. నిర్మాతగా మంచి చిత్రాలను నిర్మించారని గుర్తు చేశారు. తెలుగు చిత్ర పరిశ్రమ మంచి నటుడిని కోల్పోయిందని ఆవేదన వ్యక్తం చేశారు. చలపతిరావుకు తమ కుటుంబంతో ఆత్మీయబంధం ఉందన్నారు. నాన్నగారితో కలసి ఎన్నో చిత్రాల్లో నటించారని గుర్తు చేశారు. తన చిత్రాల్లోనూ చలపతిరావు మంచి పాత్రలు పోషించారని బాలయ్య చెప్పారు. ఆయన ఆత్మకు శాంతి కలగాలని కోరుకున్నారు. చలపతిరావు కుటుంబ సభ్యులకు ప్రగాఢ సానుభూతి తెలియజేశారు.

ఎన్టీఆర్
చలపతిరావు అకాల మరణం తనను ఎంతగానో కలచివేసిందని జూనియర్ ఎన్టీఆర్ ఆవేదన వ్యక్తం చేశారు. నందమూరి కుటుంబం ఒక కుటుంబ సభ్యుడిని కోల్పోయిందన్నారు. తాత రోజుల నుంచి తమ కుటుంబానికి అత్యంత ఆప్తుడైన ఆయన మృతి మా అందరికీ తీరని లోటన్నారు. ఆయన ఆత్మకు శాంతి చేకూరాలని ప్రార్థించారు. ప్రస్తుతం అమెరికాలో ఉన్న ఎన్టీఆర్ వీడియో కాల్‌లో స్పందించారు. మీరు మరణించారనే వార్త జీర్ణించుకోలేకపోతున్నా ‘లే బాబాయ్‌..లే’ అంటూ భావోద్వేగానికి గురయ్యారు.
ఆయన కుటుంబ సభ్యులకు సానుభూతి తెలియచేశారు. ఆది సినిమాలో ఎన్టీఆర్‌, చలపతిరావు కలిసి నటించారు.

Share

• 
• 
• 
• 
• 
•