Alai Balai 2025: హైదరాబాద్ నగరంలో ప్రతి సంవత్సరం ప్రత్యేకంగా జరిపే అలయ్ బలయ్ కార్యక్రమం.. ఈసారి కూడా ఘనంగా కొనసాగుతోంది. మాజీ గవర్నర్ బండారు దత్తాత్రేయ ఆధ్వర్యంలో నిర్వహిస్తున్న ఈ కార్యక్రమం.. దసరా వేడుకల అనంతరం జరిగే ఆత్మీయ సమ్మేళనంగా గుర్తింపు పొందింది. రాజకీయాలకు అతీతంగా, సామాజిక సమగ్రతను చాటే ఈ వేడుకకు పలువురు రాజకీయ నాయకులు, సినీ ప్రముఖులు, అధికారులు, సాంస్కృతిక వేత్తలు హాజరై వేడుకకు మరింత వైభవం చేకూర్చారు.
సంప్రదాయ వంటకాలు, సంస్కృతుల ఆవిష్కరణ
ఈ కార్యక్రమంలో పాల్గొనే అతిథుల కోసం తెలంగాణకు ప్రత్యేకతను చాటే సంప్రదాయ వంటకాలను అందించారు. బోనాలు, బతుకమ్మ, గంగిరెడ్డుల ఆటలు వంటి స్థానిక సంస్కృతి ప్రతిబింబించే ప్రదర్శనలు సందడి చేశాయి. అదేవిధంగా వివిధ రాష్ట్రాల నుంచి వచ్చిన కళాకారులు తమ సాంస్కృతిక ప్రదర్శనలతో వేదికను అలరించారు. దేశంలోని వైవిధ్యభరితమైన సంప్రదాయాలను ఒకే వేదికపై చూపించడం ఈ కార్యక్రమానికి ప్రత్యేక ఆకర్షణగా నిలిచింది.
ఆపరేషన్ సిందూర్ వీరులకు శ్రద్ధాంజలి
ఈ సారి అలయ్ బలయ్లో ఆపరేషన్ సిందూర్‌లో వీరమరణం పొందిన సైనికులకు ప్రత్యేక నివాళి అర్పించారు. మేజర్ జనరల్ అజయ్ మిశ్రా ఈ సందర్భంగా మాట్లాడుతూ.. ఆపరేషన్ సిందూర్ పాకిస్థాన్‌కు తగిన గుణపాఠం చెప్పింది. ఇకపై భారత్ ఎలాంటి న్యూక్లియర్ బెదిరింపులకు భయపడదు. ఈ విజయం కేవలం ఆపరేషన్ విజయం మాత్రమే కాదు, యావత్ భారతదేశం విజయం అని పేర్కొన్నారు.
సినీ ప్రముఖుల సందడి
సినీ నటుడు నాగార్జున ఈ కార్యక్రమంలో పాల్గొని ఆనందాన్ని వ్యక్తం చేశారు. 2005 నుండి అలయ్ బలయ్‌ను దత్తాత్రేయ రాజకీయాలకు అతీతంగా నిర్వహిస్తున్నారు. ఇలాంటి కార్యక్రమాలు మనందరికి కాన్ఫిడెన్స్ ఇస్తాయి. ఒకటే అన్న భావనను చాటుతాయి అని అన్నారు. అలాగే ప్రముఖ హాస్యనటుడు బ్రహ్మానందం మాట్లాడుతూ, ఒకరినొకరు ఆలింగనం చేసుకోవడం అలయ్ బలయ్. ఇది మన పూర్వీకుల కాలం నుండి ఉన్న సంస్కృతి. ఈ వేడుక నేటి సమాజానికి ఆత్మీయత, ఆప్యాయతల ప్రాధాన్యతను గుర్తు చేస్తుంది అని భావోద్వేగంతో చెప్పారు.
దేశ సంస్కృతికి ప్రతిబింబం
ఈ వేడుకలో గవర్నర్ జిష్ణు దేవ్ వర్మ కూడా పాల్గొన్నారు. అలయ్ బలయ్ ఒక మంచి సంస్కృతి. మన దేశం అనేక సంప్రదాయాలకు నిలయం. నవరాత్రులు ముగిసిన తర్వాత ఇలాంటి కార్యక్రమంలో పాల్గొనడం ఆనందంగా ఉంది. దుర్గామాత ఆశీస్సులు మనందరిపై ఉండాలి అని అన్నారు.
బండారు దత్తాత్రేయ ప్రేరణ
బండారు దత్తాత్రేయ 2005 నుండి ప్రతి సంవత్సరం ఈ కార్యక్రమాన్ని నిరంతరంగా నిర్వహిస్తున్నారు. రాజకీయాలకు అతీతంగా అందరినీ ఒక వేదికపైకి తీసుకురావడం, ఆత్మీయతను పంచడం. మనందరం ఒకటే అన్న భావన సమాజంలో పెరగాలి. వేరువేరు ఆలోచనలు, వేరువేరు రాజకీయాలు ఉన్నా ఒకరికొకరు ఆత్మీయంగా మెలగాలి అనే ఆయన మాటలు కార్యక్రమానికి హాజరైన ప్రతి ఒక్కరిని ఆకట్టుకున్నాయి.
సమగ్రతకు ప్రతీకగా అలయ్ బలయ్
తెలంగాణ సాంస్కృతిక వైభవాన్ని, దేశ ఏకత్వాన్ని ప్రతిబింబించే అలయ్ బలయ్ కార్యక్రమం మరోసారి విశిష్టంగా నిలిచింది. రాజకీయ, సినీ, సాంస్కృతిక, సైనిక రంగాలకు చెందిన ప్రముఖులు ఒకే వేదికపై కలవడం ఈ వేడుకను ప్రత్యేకంగా మార్చింది. ఆపరేషన్ సిందూర్ వీరులకు నివాళి, సంప్రదాయ వంటకాలు, సాంస్కృతిక ప్రదర్శనలు ఈ వేడుక ఆత్మీయత, ఐక్యతకు ప్రతీకగా నిలిచింది.
Share
Hyderabad Crime News: పెదనాన్న పరువు తీస్తున్నాడని యువతి సూసైడ్, హైదరాబాద్‌లో దారుణం
Alia Bhatt: ప్రతినెల కూతురి కోసం ఆ పని చేస్తున్న అలియా.. నిజంగా క్యూట్ అబ్బా!
