CM Revanth Reddy: పంచాయితీలు వద్దు.. సామరస్యమే ముద్దు.. దేవాదుల సాక్షిగా సీఎం రేవంత్ సంచలన ట్వీట్

తెలంగాణ సీఎం రేవంత్ రెడ్డి కృష్ణా గోదావరి నదీ జలాల పంపిణీ అంశంపై ట్విట్టర్ వేదికగా కీలక ప్రకటన చేశారు. దేవాదుల సాక్షిగా రాష్ట్ర ప్రయోజనాలే పరమావధిగా అడుగులు వేస్తామని స్పష్టం చేశారు. పొరుగు రాష్ట్రాలతో ఘర్షణలు కాకుండా సామరస్యపూర్వక చర్చల ద్వారానే సమస్యలు పరిష్కరించుకోవాలని ఆయన ఆకాంక్షించారు.

తెలంగాణ రాష్ట్ర ప్రయోజనాల విషయంలో రాజీ పడే ప్రసక్తే లేదని ముఖ్యమంత్రి రేవంత్ రెడ్డి తేల్చి చెప్పారు. దేవాదుల ప్రాజెక్టును సందర్శించిన సందర్భాన్ని పురస్కరించుకుని ఆయన ఎక్స్ (ట్విట్టర్) వేదికగా స్పందించారు. కృష్ణా గోదావరి జలాల సాధనలో వివాదాల కంటే పరిష్కారాలకే ప్రాధాన్యత ఇస్తామని ప్రకటించారు. ఇరుగుపొరుగు రాష్ట్రాలతో పంచాయితీలు పెట్టుకోవడం కంటే చర్చల ద్వారా సమస్యలను కొలిక్కి తీసుకురావడమే తమ ప్రభుత్వ విధానమని వెల్లడించారు. రాష్ట్రంలోని ప్రతి పౌరుడికి స్వచ్ఛమైన తాగునీరు అందించడంతో పాటు ప్రతి ఎకరాకు సాగునీరు చేరవేయడమే ప్రధాన లక్ష్యమని పేర్కొన్నారు.

రెండు తెలుగు రాష్ట్రాల మధ్య దశాబ్దాలుగా నదీ జలాల పంపిణీ అపరిష్కృతంగానే మిగిలిపోయింది. ఉమ్మడి రాష్ట్ర విభజన అనంతరం ఏర్పడిన తాత్కాలిక కేటాయింపులపై తెలంగాణ మొదటి నుంచీ అసంతృప్తిగా ఉంది. ప్రస్తుతం ఆంధ్రప్రదేశ్‌కు 512 టీఎంసీలు ఉండగా తెలంగాణకు కేవలం 299 టీఎంసీలు మాత్రమే దక్కుతున్నాయి. ఈ అసమానతలను తొలగించి రెండు రాష్ట్రాలకు సమాన వాటా దక్కాలని తెలంగాణ గట్టిగా డిమాండ్ చేస్తోంది. బృజేష్ కుమార్ ట్రిబ్యునల్ ముందు కూడా ప్రాజెక్టుల వారీగా కేటాయింపులు జరపాలని రాష్ట్ర ప్రభుత్వం తన వాదనను బలంగా వినిపిస్తోంది.

మరోవైపు శ్రీశైలం నాగార్జున సాగర్ వంటి ఉమ్మడి ప్రాజెక్టుల నిర్వహణ విషయంలో తరచుగా వివాదాలు తలెత్తుతున్నాయి. వీటిని కృష్ణా రివర్ మేనేజ్మెంట్ బోర్డ్ (KRMB) పరిధిలోకి తీసుకురావాలని కేంద్ర ప్రభుత్వం భావిస్తోంది. ఈ క్రమంలోనే ఏపీ చేపట్టిన పోలవరం ప్రాజెక్టు ముంపు ప్రభావం అలాగే తెలంగాణ నిర్మిస్తున్న ఎత్తిపోతల పథకాలపై పరస్పరం ఫిర్యాదులు కొనసాగుతున్నాయి. పోలవరం-నల్లమల సాగర్ వంటి కొత్త ప్రాజెక్టుల విషయంలోనూ తాజాగా తెలంగాణ ప్రభుత్వం కేంద్ర జలశక్తి శాఖకు తన అభ్యంతరాలను వివరించింది.

సీఎం రేవంత్ రెడ్డి తన ప్రకటనలో జల సాధన కోసం రాజీలేని పోరాటం చేస్తామని పేర్కొంటూనే స్నేహపూర్వక వాతావరణానికి పెద్దపీట వేశారు. కృష్ణా గోదావరి నదులపై ఆధారపడిన రైతాంగం ప్రయోజనాలను కాపాడటమే తమ తక్షణ కర్తవ్యమని వివరించారు. రాష్ట్రాల మధ్య ఘర్షణలు కేవలం కాలయాపనకు దారితీస్తాయని గుర్తించి చర్చల ద్వారా శాశ్వత పరిష్కారాల దిశగా అడుగులు వేయాలని నిర్ణయించుకున్నట్లు తెలిపారు. సీఎం చేసిన ఈ తాజా వ్యాఖ్యలపై ఆంధ్రప్రదేశ్ ప్రభుత్వం ఏ విధంగా స్పందిస్తుందనేది ఇప్పుడు రాజకీయ వర్గాల్లో ఆసక్తికరంగా మారింది. మేధావులు సైతం ప్రజా ప్రయోజనాలే పరమావధిగా ముఖ్యమంత్రి తీసుకున్న ఈ నిర్ణయాన్ని స్వాగతిస్తున్నారు.

ALSO READ: Harish Rao: రెండేళ్లుగా ఓపికగా గమనిస్తున్నాం.. ఇక‌ గల్లా పట్టి నిలదీస్తాం: హరీష్ రావు