Hospital Negligence: ప్రభుత్వ ఆసుపత్రుల్లో ప్రజలకు నాణ్యమైన వైద్య సేవలు అందించాల్సిన బాధ్యత కలిగిన వైద్యాధికారులే సమయపాలన విస్మరిస్తే రోగులకు ఇబ్బందులు తప్పవా? అన్న ప్రశ్నలు దౌల్తాబాద్‌ ప్రభుత్వ ఆసుపత్రి వైద్యాధికారి తీరుపై వ్యక్తమవుతున్నాయి. వైద్యాధికారి నాగరాజు విధుల నిర్వహణలో నిర్లక్ష్యంగా వ్యవహరిస్తున్నారంటూ స్థానికులు ఆరోపిస్తున్నారు. ఆసుపత్రికి వచ్చే సమయం, విధులు ముగించుకుని వెళ్లే సమయంపై స్పష్టమైన పర్యవేక్షణ లేకపోవడంతో ఇష్టారాజ్యంగా వ్యవహరిస్తున్నారనే విమర్శలు వినిపిస్తున్నాయి.
మంగళవారం మధ్యాహ్నం సుమారు రెండు గంటలకే వైద్యాధికారి ఆసుపత్రి నుంచి వెళ్లిపోయినట్లు స్థానికులు పేర్కొంటున్నారు. నిర్ణీత పని వేళల్లో వైద్యులు అందుబాటులో ఉండాల్సి ఉండగా, ముందుగానే వెళ్లిపోవడం ఎంతవరకు సమంజసమని ప్రశ్నిస్తున్నారు. మండలంలోని వివిధ గ్రామాల నుంచి నిత్యం ఎంతోమంది పేద, మధ్యతరగతి కుటుంబాలకు చెందిన రోగులు వైద్యం కోసం ప్రభుత్వ ఆసుపత్రికి వస్తుంటారు. వైద్యాధికారి అందుబాటులో లేకపోతే అత్యవసర పరిస్థితుల్లో రోగులు ఎవరిని ఆశ్రయించాలని ఆవేదన వ్యక్తం చేస్తున్నారు.
ప్రభుత్వ ఆసుపత్రుల్లో వైద్య సేవలు నిరంతరాయంగా అందేలా చూడాల్సిన బాధ్యత సంబంధిత వైద్యాధికారులతో పాటు ఉన్నతాధికారులపైనా ఉంది. అయితే విధుల నిర్వహణ, హాజరు సమయాలపై సరైన పర్యవేక్షణ లేకపోవడం వల్లే ఇలాంటి పరిస్థితులు ఏర్పడుతున్నాయా అన్న అనుమానాలు వ్యక్తమవుతున్నాయి. వైద్యాధికారి విధులకు హాజరయ్యే సమయం, ఆసుపత్రి నుంచి వెళ్లే సమయంపై అధికారులు విచారణ చేపట్టాలని స్థానికులు కోరుతున్నారు.
దౌల్తాబాద్‌ ప్రభుత్వ ఆసుపత్రిలో వైద్యాధికారి విధుల నిర్వహణపై సంబంధిత జిల్లా వైద్య ఆరోగ్యశాఖ అధికారులు క్షేత్రస్థాయిలో విచారణ జరపాలని ప్రజలు డిమాండ్‌ చేస్తున్నారు. విధుల్లో నిర్లక్ష్యం ఉన్నట్లు నిర్ధారణ అయితే నిబంధనల ప్రకారం చర్యలు తీసుకోవాలని కోరుతున్నారు. ప్రభుత్వ ఆసుపత్రికి వచ్చే ప్రతి రోగికి సకాలంలో వైద్య సేవలు అందేలా అధికారులు ప్రత్యేక పర్యవేక్షణ చేపట్టాలని విజ్ఞప్తి చేస్తున్నారు.
Also Read: ఒక వ్యక్తికి కష్టం వస్తే నిందించడం సరికాదు.. రేణు దేశాయ్ పోస్ట్ పవన్ గురించేనా?
Share
ట్రైనీ DSPలకు సీఎం రేవంత్ రెడ్డి బంప‌ర్ ఆఫ‌ర్‌?
టిల్లూ స్కెచ్ మామూలుగా లేదుగా.. ఏకంగా సుకుమార్ తో !
