BJP – JanaSena: జూబ్లీహిల్స్ బైపోల్‌లో బీజేపీకి మద్దతు ప్రకటించిన జనసేన..

BJP – JanaSena: జూబ్లీహిల్స్ ఉప ఎన్నికల్లో భారతీయ జనతా పార్టీ అభ్యర్థికి జనసేన పార్టీ సంపూర్ణ మద్దతు ప్రకటించింది. ఈ నిర్ణయం ద్వారా తెలంగాణలో బీజేపీ, జనసేన పార్టీల మధ్య బంధం మరింత బలపడినట్లు స్పష్టమవుతోంది. ఈ మేరకు జనసేన పార్టీ నాయకులు బీజేపీ రాష్ట్ర అధ్యక్షులు రామచందర్ రావు, కేంద్రమంత్రి కిషన్ రెడ్డిలతో సమావేశమై మద్దతు విషయాన్ని అధికారికంగా వెల్లడించారు.

కీలక భేటీలో మద్దతు ప్రకటన..

జనసేన పార్టీ తెలంగాణ ఇన్‌చార్జ్ నేమూరి శంకర్ గౌడ్ నేతృత్వంలో పలువురు జనసేన రాష్ట్ర నాయకులు బీజేపీ అగ్ర నాయకులతో భేటీ అయ్యారు. హైదరాబాద్‌లోని బీజేపీ కార్యాలయంలో జరిగిన ఈ సమావేశానికి బీజేపీ రాష్ట్ర అధ్యక్షులు  రామచందర్ రావు, కేంద్రమంత్రి కిషన్ రెడ్డిలు హాజరయ్యారు. సమావేశం అనంతరం.. జూబ్లీహిల్స్ ఉప ఎన్నికల్లో బీజేపీ అభ్యర్థి లంకల దీపక్ రెడ్డికి తమ పార్టీ పూర్తి మద్దతు ఇస్తుందని నేమూరి శంకర్ గౌడ్ మీడియాకు తెలిపారు. పార్టీ అధినేత పవన్ కళ్యాణ్ ఆదేశాల మేరకు ఈ నిర్ణయం తీసుకున్నట్లు ఆయన ప్రకటించారు. తెలంగాణలో బీజేపీ పటిష్టతకు, కేంద్రంలో మోదీ నాయకత్వానికి తమ పార్టీ కట్టుబడి ఉందని ఈ సందర్భంగా శంకర్ గౌడ్ స్పష్టం చేశారు.

ప్రచారంలో పాల్గొననున్న జనసేన నాయకులు

ఈ ఉప ఎన్నిక ప్రచారంలో బీజేపీకి మద్దతుగా జనసేన పార్టీ నాయకులు, కార్యకర్తలు క్రియాశీలకంగా పాల్గొననున్నారు. బీజేపీ అభ్యర్థి లంకల దీపక్ రెడ్డి గెలుపు కోసం జనసేన శ్రేణులు ఇంటింటి ప్రచారం, రోడ్ షోలు, బహిరంగ సభల్లో భాగస్వామ్యం కానున్నాయి. ఇప్పటికే తెలంగాణలోని పలు జిల్లాల్లో బీజేపీ, జనసేన కలిసి పనిచేస్తున్న నేపథ్యంలో, ఈ మద్దతు జూబ్లీహిల్స్ ఎన్నికల్లో బీజేపీకి అదనపు బలాన్ని చేకూర్చనుంది. ముఖ్యంగా నియోజకవర్గంలో జనసేన పార్టీకి ఉన్న యువత, అభిమానుల ఓట్లు బీజేపీ అభ్యర్థికి కీలకంగా మారే అవకాశం ఉంది.

మద్దతుపై బీజేపీ హర్షం

జనసేన పార్టీ మద్దతు ప్రకటించడం పట్ల బీజేపీ రాష్ట్ర అధ్యక్షులు రామచందర్ రావు, కేంద్రమంత్రి కిషన్ రెడ్డిలు హర్షం వ్యక్తం చేశారు. జనసేన మద్దతు బీజేపీ అభ్యర్థి విజయానికి దోహదపడుతుందని వారు ఆశాభావం వ్యక్తం చేశారు. జనసేన నాయకులకు, అధినేత పవన్ కళ్యాణ్‌కు ఈ సందర్భంగా వారు కృతజ్ఞతలు తెలిపారు. ఈ మద్దతు రాష్ట్రంలో ప్రజా సమస్యల పరిష్కారం, సుపరిపాలన లక్ష్యంగా కొనసాగుతుందని బీజేపీ నాయకులు ప్రకటించారు. ఈ ఉపఎన్నిక ఫలితం తెలంగాణ రాజకీయాలపై గణనీయమైన ప్రభావం చూపే అవకాశం ఉన్న నేపథ్యంలో.. జనసేన మద్దతు బీజేపీకి కొంత కీలకం కానుంది.

ALSO READ: YS Jaganmohan Reddy: ప్రభుత్వ నిర్లక్ష్యంతో రైతులకు కన్నీరు.. ప్రభుత్వంపై జగన్ విమర్శలు