CM Revanth Reddy: నోయిడా తరహాలో కొడంగల్.. రూ.103 కోట్ల అభివృద్ధి పనులకు సీఎం రేవంత్ శంకుస్థాపన

CM Revanth Reddy: తెలంగాణ ముఖ్యమంత్రి రేవంత్ రెడ్డి కొడంగల్ నియోజకవర్గంలో మొత్తం రూ.103 కోట్ల విలువైన పలు అభివృద్ధి కార్యక్రమాలకు శంకుస్థాపన చేశారు. నియోజకవర్గ అభివృద్ధికి రాష్ట్ర ప్రభుత్వం కట్టుబడి ఉందని ముఖ్యమంత్రి ఈ సందర్భంగా స్పష్టం చేశారు. ఈ భారీ ప్రాజెక్టుల ద్వారా కొడంగల్ ప్రాంతంలో మౌలిక వసతులు మెరుగుపడతాయి, ప్రజలకు అనేక సౌకర్యాలు అందుబాటులోకి వస్తాయి. ఇంటర్నేషనల్ ఎడ్యుకేషన్ హబ్‌గా కొడంగల్‌ను తీర్చిదిద్దుతా అని అన్నారు. కొడంగల్‌లోని ప్రతీ ఎకరాకు నీరు అందిస్తామని భరోసా ఇచ్చారు. ఢిల్లీలోని నోయిడా తరహాలో తెలంగాణకు కొడంగల్ మారబోతోందని సీఎం రేవంత్ రెడ్డి వ్యాఖ్యానించారు.

శంకుస్థాపన చేసిన ముఖ్యమైన పనుల వివరాలు ఇలా ఉన్నాయి..

విద్య, శిశు సంక్షేమం: రూ.5.83 కోట్లతో నియోజకవర్గంలో 28 అంగన్‌వాడీ భవనాలు నిర్మిస్తారు. రూ.5.01 కోట్లతో ప్రభుత్వ పాఠశాలల్లో 23 అదనపు తరగతి గదులు నిర్మాణం చేపడతారు. అలాగే, రూ.2.95 కోట్లతో నిర్మించిన అదనపు తరగతి గదులు, అంగన్‌వాడీ కేంద్రాలు, గ్రంథాలయ భవనాలను ముఖ్యమంత్రి ప్రారంభించారు. ఈ చర్యలు పిల్లల విద్యా ప్రమాణాలను, సంక్షేమాన్ని పెంచుతాయి.

పౌర సౌకర్యాలు, మౌలిక వసతులు: రూ.3 కోట్లతో 10 గ్రామ పంచాయతీ (GP) భవనాలు నిర్మిస్తారు. కొడంగల్ పట్టణంలో రూ.60 కోట్లతో రోడ్డు విస్తరణ పనులు జరుగుతాయి. రూ.4.45 కోట్లతో సిసి రోడ్లు, భూగర్భ డ్రైనేజీలు (యూజీడీలు) నిర్మాణం చేపడతారు. కమ్యూనిటీ హాళ్లు, కిచెన్ షెడ్లు, కాంపౌండ్ వాల్స్ నిర్మాణం కోసం రూ.4.91 కోట్లు కేటాయించారు.

ప్రభుత్వ భవనాలు, ప్రత్యేక సౌకర్యాలు: బంజారా భవన్ కోసం రూ.3.65 కోట్లతో అదనపు సౌకర్యాలు కల్పిస్తారు. ఇందులో కాంపౌండ్ వాల్, డైనింగ్ హాల్, నీటి సరఫరా, విద్యుదీకరణ పనులు ఉంటాయి. కొడంగల్‌లో రూ.1 కోటితో ప్రొహిబిషన్ ఎక్సైజ్ స్టేషన్‌కు శంకుస్థాపన జరిగింది. అగ్నిమాపక కేంద్రం నిర్మాణం కోసం రూ.1.30 కోట్లు, కొడంగల్‌లో స్విమ్మింగ్ పూల్ నిర్మాణం కోసం రూ.1.40 కోట్లు కేటాయించారు. ఈ ప్రాజెక్టులు ప్రభుత్వ సేవలను మెరుగుపరుస్తాయి, యువతకు క్రీడా సౌకర్యాలు అందుబాటులోకి తెస్తాయి.

ఇతర ముఖ్య ప్రాజెక్టులు: కోస్గి వ్యవసాయ మార్కెట్‌లో కొత్త అభివృద్ధి పనులకు రూ.4.50 కోట్లు వినియోగిస్తారు. అలాగే, రూ.5 కోట్లతో గెస్ట్ హౌస్ నిర్మాణం కూడా చేపడతారు. కొడంగల్ నియోజకవర్గంలో ఈ పనులన్నీ పూర్తి కావడం ద్వారా ప్రజల జీవన ప్రమాణాలు మెరుగుపడతాయి. ముఖ్యమంత్రి రేవంత్ రెడ్డి ఈ అభివృద్ధి పనులను వేగంగా పూర్తి చేయాలని అధికారులను ఆదేశించారు.