ఆర్టీసీ డ్రైవర్ శంకర్ గౌడ్ పరిస్థితి విషమం.. 70శాతంకు పైగా కాలిన గాయాలు, హైదరాబాద్‌కు తరలింపు

తెలంగాణలో ఆర్టీసీ కార్మికుల ఆత్మహత్యాయత్నాలు కలకలం రేపుతున్నాయి. వేర్వేరు ప్రాంతాల్లో ముగ్గురు డ్రైవర్లు బలవన్మరణానికి ప్రయత్నించడం రాష్ట్రవ్యాప్తంగా సంచలనంగా మారింది. ఆర్టీసీని ప్రభుత్వంలో విలీనం చేయడంలో జరుగుతున్న జాప్యంపై ఆగ్రహం వ్యక్తం చేస్తూ నర్సంపేట డిపో డ్రైవర్‌ కోలా శంకర్ గౌడ్ ఆత్మహత్యాయత్నానికి పాల్పడ్డారు. ప్రభుత్వం తన హామీలను నెరవేర్చడం లేదని తీవ్ర ఆవేదన వ్యక్తం చేస్తూ గురువారం నర్సంపేట బస్టాండ్ ఎదుట ఆయన ఒంటిపై పెట్రోల్ పోసుకుని నిప్పంటించుకున్నారు. ఈ ఘటనలో శంకర్ గౌడ్ శరీరం 70 శాతానికి పైగా కాలిపోయింది. వెంటనే స్పందించిన స్థానికులు ఆయనను వరంగల్ ఎంజీఎం ఆసుపత్రికి తరలించారు. పరిస్థితి అత్యంత విషమంగా మారడంతో మెరుగైన వైద్యం కోసం ప్రత్యేక అంబులెన్స్‌లో హైదరాబాద్‌లోని యశోద ఆసుపత్రికి తరలించారు.

శంకర్ గౌడ్ వార్త వినగానే మరో కార్మికుడు..

శంకర్ గౌడ్ పరిస్థితిపై ఆర్టీసీ జేఏసీ తీవ్ర ఆందోళన వ్యక్తం చేసింది. ఈ ఘటనకు రాష్ట్ర ప్రభుత్వమే పూర్తి బాధ్యత వహించాలని డిమాండ్ చేసింది. ప్రభుత్వం నిర్లక్ష్యం వీడి కార్మికుల సమస్యలను పరిష్కరించాలని కోరుతోంది. ఈ ఘటన మరువక ముందే నల్లగొండలో మరో డ్రైవర్ ఆత్మహత్యాయత్నం చేయడం ఉద్రిక్తతకు దారితీసింది. నర్సంపేటలో శంకర్ గౌడ్ వార్త విన్న డ్రైవర్ వెంకన్న తీవ్ర మనస్తాపానికి గురయ్యారు. అదే ఆవేదనలో ఆయన తన ఒంటిపై కిరోసిన్ పోసుకుని బలవన్మరణానికి ప్రయత్నించారు. తోటి కార్మికులు సకాలంలో స్పందించి అడ్డుకోవడంతో పెను ప్రమాదం తప్పింది. ప్రస్తుతం ఆయనను స్థానిక ఆసుపత్రికి తరలించి చికిత్స అందిస్తున్నారు.

భద్రాచాలంలో డ్రైవర్ సూసైడ్ అటెంప్ట్..

మరోవైపు భద్రాచలం ఆర్టీసీ డిపోలో డ్రైవర్‌గా పనిచేస్తున్న లింగారెడ్డి ఖమ్మంలో ఆత్మహత్యకు ప్రయత్నించారు. నగరంలోని ఇండోస్ ప్రైవేట్ ఆసుపత్రిలో ఆయన ప్రస్తుతం చికిత్స పొందుతున్నారు. లింగారెడ్డి కుటుంబ సమస్యలు సహా ఆర్థిక ఇబ్బందుల కారణంగానే ఈ నిర్ణయం తీసుకున్నట్లు పోలీసులు అనుమానం వ్యక్తం చేస్తున్నారు. ఈ ఘటనపై పూర్తి వివరాలు సేకరించేందుకు బాధితుని వాంగ్మూలాన్ని రికార్డు చేసే ప్రక్రియను పోలీసులు ప్రారంభించారు. వరుసగా జరుగుతున్న ఈ ఘటనలు ఆర్టీసీ కార్మికుల్లో నెలకొన్న అభద్రతా భావాన్ని చాటిచెబుతున్నాయి.

ప్రభుత్వ విలీన ప్రక్రియలో జాప్యం కార్మికుల సహనాన్ని పరీక్షిస్తోంది. ఒకవైపు ఆర్థిక సమస్యలు వేధిస్తుండగా మరోవైపు విధి నిర్వహణలో ఒత్తిడి పెరిగిపోతోంది. శంకర్ గౌడ్ ఉదంతం రాష్ట్రంలోని ఆర్టీసీ కార్మికులను ఒక్కసారిగా ఉలిక్కిపడేలా చేసింది. ఆయన ప్రాణాపాయ స్థితిలో ఉండటంతో కార్మిక సంఘాలు ఆందోళన బాట పట్టాయి. ప్రభుత్వం తక్షణమే స్పందించి కార్మికులకు భరోసా కల్పించాలని వారు కోరుతున్నారు. రాజకీయ విశ్లేషణలు పక్కన పెట్టి మానవీయ కోణంలో ఈ సమస్యను పరిష్కరించాల్సిన అవసరం ఉందని ప్రజలు అభిప్రాయపడుతున్నారు.

పోలీసులు ఈ మూడు ఘటనలపై లోతైన దర్యాప్తు జరుపుతున్నారు. ఆత్మహత్యాయత్నాలకు గల ఖచ్చితమైన కారణాలను విశ్లేషిస్తున్నారు. ఆసుపత్రుల వద్ద ఆర్టీసీ కార్మికులు భారీగా చేరుకోవడంతో ఉద్రిక్త పరిస్థితులు నెలకొన్నాయి. శాంతిభద్రతల సమస్య తలెత్తకుండా పోలీసులు భారీ బందోబస్తు ఏర్పాటు చేశారు. కార్మికులు ఎవరూ తొందరపాటు నిర్ణయాలు తీసుకోవద్దని ఉన్నతాధికారులు విజ్ఞప్తి చేస్తున్నారు.

ALSO READ: RTC కార్మికుల సమ్మె.. సీఎం రేవంత్ రెడ్డి కీలక ఆదేశాలు