డ్రైవర్ సూసైడ్ అటెంప్ట్.. ఆరు రోజులపాటు కార్యాచరణ ప్రకటించిన జేఏసీ

నర్సంపేట ఆర్టీసీ డ్రైవర్ ఆత్మహత్యాయత్నం ఘటన తెలుగు రాష్ట్రాల్లో తీవ్ర సంచలనం సృష్టిస్తోంది. ఈ ఉదంతంపై తెలంగాణ ఆర్టీసీ కార్మిక సంఘాల జేఏసీ (JAC) తీవ్రంగా స్పందించింది. ప్రభుత్వ మొండి వైఖరి వల్లే ఈ అఘాయిత్యం జరిగిందని నేతలు ఆరోపిస్తున్నారు. ఈ క్రమంలో భవిష్యత్ పోరాట దిశను ఖరారు చేసేందుకు జేఏసీ అత్యవసర సమావేశం నిర్వహించింది. ఈ భేటీలో ప్రభుత్వంపై ఒత్తిడి పెంచేలా ఆరు రోజుల కార్యాచరణను ప్రకటించారు.

నర్సంపేట డిపోకు చెందిన డ్రైవర్ శంకర్ గౌడ్ పెట్రోల్ పోసుకుని ఆత్మహత్యాయత్నం చేయడం ఆర్టీసీ వర్గాల్లో తీవ్ర విషాదాన్ని నింపింది. డెబ్బై శాతం కాలిన గాయాలతో ఆయన ప్రస్తుతం వరంగల్ ఆసుపత్రిలో మృత్యువుతో పోరాడుతున్నారు. రవాణా శాఖ మంత్రి పొన్నం ప్రభాకర్ ఇటీవల చేసిన వ్యాఖ్యలే ఈ ఘటనకు ప్రేరణని కార్మిక నేతలు మండిపడుతున్నారు. ఎన్నికల మేనిఫెస్టోలో ఇచ్చిన ప్రధాన హామీలను తుంగలో తొక్కి 29 డిమాండ్లు పరిష్కరించామన్న మంత్రి మాటలు అవాస్తవమని జేఏసీ స్పష్టం చేసింది. ప్రభుత్వ వైఖరితో మనస్తాపం చెందిన కార్మికులు ప్రాణాలు తీసుకోవడం దురదృష్టకరమని నేతలు ఆవేదన వ్యక్తం చేశారు.

గత బీఆర్ఎస్ ప్రభుత్వ హయాంలో 34 మంది కార్మికులు బలి కావడాన్ని జేఏసీ గుర్తు చేసింది. ప్రస్తుత కాంగ్రెస్ ప్రభుత్వం కూడా అదే బాటలో పయనించడం సరికాదని హితవు పలికింది. ముఖ్యమంత్రి రేవంత్ రెడ్డి వెంటనే జోక్యం చేసుకుని సమస్యలను పరిష్కరించాలని కోరుతున్నారు. కార్మికుల న్యాయమైన డిమాండ్లను అంగీకరించి సమ్మె వాతావరణాన్ని విరమింపజేయాలని డిమాండ్ చేశారు. లేనిపక్షంలో ఉద్యమాన్ని మరింత ఉధృతం చేస్తామని హెచ్చరించారు. శాంతియుత మార్గంలో నిరసనలు తెలియజేయాలని కార్మికులకు పిలుపునిచ్చారు.

ఏప్రిల్ 24 నుంచి ఏప్రిల్ 29 వరకు రాష్ట్రవ్యాప్తంగా వినూత్న నిరసన కార్యక్రమాలకు జేఏసీ శ్రీకారం చుట్టింది. ఇందులో భాగంగా అన్ని డిపోలు, రీజియన్ కార్యాలయాల వద్ద కార్మికులు పెద్ద ఎత్తున పాల్గొనాలని కోరింది. ప్రజాప్రతినిధులకు వినతి పత్రాలు సమర్పించడం ద్వారా ప్రభుత్వంపై ఒత్తిడి తీసుకురావాలని నిర్ణయించింది. మహిళా కార్మికులు సైతం బతుకమ్మలతో నిరసనలో భాగస్వాములు కానున్నారు. ఆర్టీసీ మనుగడ కోసం, కార్మికుల ఆత్మగౌరవం కోసం ఈ పోరాటం కొనసాగుతుందని జేఏసీ నేతలు ప్రకటించారు

ఆరు రోజులు ఉద్యమ కార్యాచరణ వివరాలు.. 

Join WhatsApp Channel

Share

• 
• 
• 
• 
• 
•