కరువు పై తప్పుడు ప్రచారం చేస్తే.. చెప్పుల దండ వేసి గాడిదపై ఊరేగిస్తాం!- చానగాని దయాకర్

Chanagani Dayakar: రాష్ట్రంలో నెలకొన్న కరువు పరిస్థితులపై కేటీఆర్, హరీష్ రావు రాజకీయాలు చేస్తూ ప్రజల్లో నిరాశ, భయాందోళనలు రేకెత్తిస్తున్నారని టీపీసీసీ జనరల్ సెక్రటరీ చానగాని దయాకర్ తీవ్రస్థాయిలో ధ్వజమెత్తారు. బుధవారం గాంధీభవన్‌లో ఏర్పాటు చేసిన విలేకరుల సమావేశంలో మాట్లాడిన ఆయన, ప్రతిపక్ష నాయకుల వ్యాఖ్యలపై తీవ్ర ఆగ్రహం వ్యక్తం చేశారు.

హెచ్చరించిన టీపీసీసీ నేత

కరువుపై ప్రతిపక్ష నేతలు కావాలనే తప్పుడు ప్రచారం చేస్తున్నారని దయాకర్ ఆరోపించారు. ప్రజలను భయభ్రాంతులకు గురిచేసే విధంగా మాట్లాడితే ఊరుకునేది లేదని తేల్చి చెప్పారు. అబద్ధాలతో రాజకీయాలు చేస్తూ ఊళ్లలోకి వస్తే BRS నాయకులను ప్రజలే తరిమికొట్టాలని పిలుపునిచ్చారు. అంతేకాకుండా, హద్దుమీరి తప్పుడు వ్యాఖ్యలు చేస్తే ‘నాలుక కోసి, మెడలో చెప్పుల దండలు వేసి గాడిదపై ఊరేగిస్తాం’ అని ఘాటుగా హెచ్చరించారు.

ప్రకృతి వైపరీత్యం.. రాజకీయాలు తగవు

ప్రస్తుత కరువు అనేది ప్రభుత్వం వల్ల వచ్చింది కాదని, ప్రకృతి వైపరీత్యం వల్ల ఏర్పడిన పరిస్థితి అని ఆయన స్పష్టం చేశారు. ఇటువంటి క్లిష్ట సమయంలో రాజకీయ విమర్శలు పక్కనబెట్టి, అందరం కలిసికట్టుగా కరువును ఎదుర్కోవాల్సిన అవసరం ఉందన్నారు.

ప్రభుత్వం పూర్తి సన్నద్ధం

రైతులను, ప్రజలను ఆదుకోవడానికి కాంగ్రెస్ ప్రభుత్వం అన్ని విధాలా సిద్ధంగా ఉందని దయాకర్ ధీమా వ్యక్తం చేశారు. ఎవరూ అధైర్యపడాల్సిన పనిలేదని, ప్రభుత్వం ప్రతి ఒక్కరికీ అండగా ఉంటుందని హామీ ఇచ్చారు.

Also Read: తల్లి, ఇద్దరు పిల్లల ఆత్మహత్యాయత్నం.. చాకచక్యంగా కాపాడిన సైఫాబాద్ పోలీసులు!