Vikarabad bus accident: వికారాబాద్ జిల్లాలో తీవ్ర విషాదం చోటుచేసుకుంది. అంత్యక్రియలకు బంధువులతో వెళ్తున్న ఒక ప్రైవేట్ బస్సు అనంతగిరి ఘాట్ రోడ్డులో అదుపు తప్పి లోయలోకి దూసుకెళ్లింది. ఈ ప్రమాదంలో నలుగురు అక్కడికక్కడే ప్రాణాలు కోల్పోగా.. ఇరవై మందికి పైగా ప్రయాణికులు గాయపడ్డట్టు తెలుస్తోంది.
ఇస్నాపూర్‌లో వెల్డింగ్ పని చేస్తూ.. మృతి చెందిన ఓ వ్యక్తి అంత్యక్రియల్లో పాల్గొనేందుకు బంధువులు ప్రైవేట్ బస్సులో బయలుదేరారు. పటాన్‌చెరు మండలం క్యాసారం గ్రామం నుంచి ధారూర్ మండలం చింత కుంటకు వెళ్తున్న ఈ బస్సు.. అనంతగిరి ఘాట్ రోడ్డు వద్దకు రాగానే ఒక్కసారిగా అదుపుతప్పి లోయలోకి పడిపోయింది.
ప్రాథమిక సమాచారం ప్రకారం.. అనంతగిరి ఘాట్ దిగాక వచ్చే మూల మలుపు వద్ద డ్రైవర్ బస్సును న్యూట్రల్‌లో నడపడం వల్లే ఈ ప్రమాదం జరిగిందని తెలుస్తోంది. బస్సు అదుపుతప్పి లోయలో పడటంతో, డ్రైవర్ వెనకాల కూర్చున్న ప్రయాణీకులకు తీవ్ర గాయాలయ్యాయి. బస్సు పల్టీ కొట్టడంతో అందులో ప్రయాణిస్తున్న ప్రయాణికులు ఒక్కసారిగా భయంతో కేకలు వేశారు.
ప్రమాదం జరిగిన వెంటనే స్థానికులు అప్రమత్తమై సహాయక చర్యలు చేపట్టారు. లోయలో పడిపోయిన బస్సులో నుంచి క్షతగాత్రులను బయటకు తీసేందుకు స్థానికులు తీవ్రంగా శ్రమించారు. ఈ ప్రమాదంలో నలుగురు మృతి చెందగా.. సుమారు 20 మందికి పైగా తీవ్ర గాయాలయ్యాయి. గాయపడిన క్షతగాత్రులను వెంటనే స్థానికంగా ఉన్న వికారాబాద్ పరిసర ఆసుపత్రులకు తరలించి ప్రాథమిక చికిత్స అందిస్తున్నారు.
ప్రైవేటు బస్సు అదుపుతప్పి బోల్తా పడిన దుర్ఘటనపై సీఎం రేవంత్ రెడ్డి తీవ్ర దిగ్భ్రాంతి వ్యక్తం చేశారు. ఈ ప్రమాదంలో ప్రాణాలు కోల్పోయిన వారి కుటుంబాలకు తన ప్రగాఢ సానుభూతి తెలిపారు. అలాగే.. గాయపడిన క్షతగాత్రులకు మెరుగైన వైద్యం అందేలా తక్షణ చర్యలు తీసుకోవాలని అధికారులను ఆదేశించారు.
Share
8 ఏళ్లుగా ఉద్యోగం లేదు.. 3 సార్లు యుపిఎస్సి పరీక్షలు ఫెయిల్.. కట్ చేస్తే రూ.17 లక్షల సాలరీ ఉద్యోగం
'ప్రాణం కంటే ఎక్కువగా ప్రేమించా'.. ఎలాన్ మస్క్ సడెన్ బ్రేకప్పై.. శివోన్ జిలిస్ తీవ్ర భావోద్వేగం!
