Heartwarming Love Story: సినిమాల్లో ప్రేమ కథలు అందరినీ ఆకట్టుకుంటాయి. అనివార్య కారణాలతో విడిపోయిన ప్రేమికులు చివరికి ఒక్కటవ్వడంతో శుభం కార్డు పడుతుంది. కానీ, ఇప్పుడు మనం చెప్పుకోబోయేది సినిమా కథను తలదన్నే రియల్ లైఫ్ స్టోరీ. ఇంకా చెప్పాలంటే హార్ట్ టచింగ్ లవ్ స్టోరీ. బిహార్‌ లో జరిగిన ఈ అరుదైన ఘటన అందరినీ ఆశ్చర్యపరిచింది. దాదాపు 48 సంవత్సరాల క్రితం విడిపోయిన భార్యాభర్తలు చివరకు మళ్లీ కలుసుకోవడం ప్రతి ఒక్కరినీ భావోద్వేగానికి గురిచేసింది. ముఖ్యంగా, భార్య చేతి మీద ఉన్న పచ్చబొట్టు చూసి భర్త ఆమెను గుర్తుపట్టడం మరో ఆసక్తికర విషయం.
బీహార్‌లోని పట్నా జిల్లాకు చెందిన లలన్ మిశ్రా, నిర్మలా దేవి 1977 మార్చిలో వివాహం చేసుకున్నారు. అయితే, పెళ్లి తర్వాత ఎక్కువకాలం వారి కాపురం కొనసాగలేదు. కుటుంబంలో వచ్చిన విభేదాలు, అత్తింటి సమస్యల కారణంగా వివాహమైన ఆరు నెలలకే నిర్మలా దేవి తన పుట్టింటికి వెళ్లిపోయింది. ఆ తర్వాత ఆమెను తిరిగి తీసుకురావడానికి లలన్ మిశ్రా చాలాసార్లు ప్రయత్నించారు. బంధువులు, పరిచయస్తుల ద్వారా కూడా వెతికారు. కానీ, ఆమె ఎక్కడ ఉందో తెలుసుకోలేకపోయారు. అయినప్పటికీ భార్య తిరిగి వస్తుందనే ఆశను మాత్రం ఆయన వదులుకోలేదు. మరో పెళ్లి చేసుకోవాలని కుటుంబ సభ్యులు చెప్పినా, ఆయన ఒప్పుకోకుండా జీవితాంతం ఒంటరిగానే ఉండిపోయారు.
Read Also: లావాతో పుట్టిన రంగుల గుహలు.. అక్కడ అడుగుపెడితే ప్రపంచాన్ని మర్చిపోతారు!
ఇక నిర్మలా దేవిని.. ఆమె తండ్రి ఆమెను మహారాష్ట్రలోని నాగ్‌ పూర్‌ కు తీసుకెళ్లారు. అక్కడ ఉద్యోగం చేయడంతో పాటు తన ఇద్దరు కుమారులను ఎంతో కష్టపడి పెంచి పెద్ద చేసింది. పిల్లలు జీవితంలో స్థిరపడిన తర్వాత ఆమెకు మళ్లీ తన స్వగ్రామం, గత జీవితం గుర్తుకొచ్చాయి. దీంతో ఎన్నో ఏళ్ల తర్వాత తన భర్తను వెతుక్కుంటూ బిహార్‌కు వచ్చింది. చాలా కాలం కావడంతో మొదట లలన్ మిశ్రా ఆమెను గుర్తుపట్టలేకపోయారు. వయసు పెరగడంతో ఇద్దరూ మారిపోయారు. అయితే, మాట్లాడుకుంటున్న సమయంలో నిర్మలా దేవి చేతిపై ఉన్న పాత పచ్చబొట్టు కనిపించింది. పెళ్లి రోజుల్లో చూసిన అదే పచ్చబొట్టు అని గుర్తించిన వెంటనే ఆమె తన భార్యేనని ఆయనకు అర్థమైంది. ఆ క్షణంలో ఇద్దరూ ఒకరినొకరు చూసుకుంటూ భావోద్వేగానికి గురయ్యారు. లలన్ మిశ్రా ఆనందంతో భార్యను గట్టిగా హత్తుకున్నారు. దాదాపు ఐదు దశాబ్దాల నిరీక్షణ తర్వాత ఇద్దరూ మళ్లీ కలవడం అక్కడున్న వారిని కూడా కంటతడి పెట్టించింది. నిజమైన ప్రేమకు కాలం అడ్డంకి కాదని, అనుబంధం బలంగా ఉంటే ఎన్ని సంవత్సరాలు గడిచినా ఆ బంధం నిలిచి ఉంటుందని ఈ ఘటన నిరూపించింది.
Read Also: స్మశానంలో ప్రేమాయణం.. ఇదేం పిచ్చిరా అయ్యా!
Share
రోజంతా ఇంట్లో తాజా సువాసన.. మాపింగ్ చేసేటప్పుడు నీళ్లలో కేవలం ఇది కలపండి
ఆధార్, ఫోన్ నంబర్‌తో.. మీ UAN నంబర్‌ను క్షణాల్లో కనుక్కోండిలా
