ఇండియాలోనే యూరోప్ దేశాల అందాలు.. వర్షాకాలంలో స్విట్‌జర్లాంట్, స్కాట్‌లాండ్‌ను తలపించే ప్రాంతాలు

యూరప్‌లో వర్షాకాల అందాలను చూడాలని చాలా మంది కలలు కంటారు. కానీ వీసా, భారీ ఖర్చులు ప్రతి ఒక్కరికీ సాధ్యం కావు. అలాంటి వారికి భారతదేశంలోనే కొన్ని అద్భుతమైన ప్రదేశాలు ఉన్నాయి. వర్షాకాలంలో ఈ ప్రాంతాలు పూర్తిగా పచ్చదనంతో కళకళలాడుతూ యూరప్‌ను తలపిస్తాయి. మంచు ముసురుకున్న కొండలు, ప్రశాంతమైన సరస్సులు, జలపాతాలు, పాతకాలపు నిర్మాణాలు ఈ ప్రాంతాల ప్రత్యేక ఆకర్షణలు. ప్రకృతి ప్రేమికులు, ఫోటోగ్రఫీ అభిమానులు, ప్రశాంతమైన సెలవులు కోరుకునేవారికి ఇవి అద్భుతమైన గమ్యస్థానాలు.

మున్నార్.. ఆకట్టుకునే ప్రకృతి అందాలు

కేరళలోని మున్నార్ వర్షాకాలంలో మరింత అందంగా మారుతుంది. ఎక్కడ చూసినా పచ్చని టీ తోటలు కనిపిస్తాయి. కొండలపై తేలియాడే మేఘాలు, రోడ్ల పక్కన ప్రవహించే జలపాతాలు అద్భుతమైన దృశ్యాలను సృష్టిస్తాయి. చల్లని వాతావరణం ప్రయాణాన్ని మరింత ఆహ్లాదకరంగా మారుస్తుంది. ఈ ప్రాంతాన్ని చాలామంది స్కాట్లాండ్ కొండలతో పోలుస్తారు.

ఖజ్జియార్.. మినీ స్విట్జర్లాండ్‌

హిమాచల్ ప్రదేశ్‌లోని ఖజ్జియార్‌ను “మినీ స్విట్జర్లాండ్ ఆఫ్ ఇండియా” అని అంటారు. వర్షాకాలంలో పచ్చిక బయళ్లు మరింత అందంగా కనిపిస్తాయి. మధ్యలో ఉన్న సరస్సు, చుట్టూ ఉన్న అడవులు ప్రత్యేక ఆకర్షణగా నిలుస్తాయి. ప్రశాంతమైన వాతావరణం ప్రకృతి ప్రేమికులను ఆకట్టుకుంటుంది.

కూర్గ్.. మంత్రముగ్ధులను చేసే పచ్చదనం

కర్ణాటకలోని కూర్గ్ వర్షాకాలంలో మరింత సుందరంగా మారుతుంది. కాఫీ తోటలు, ఉప్పొంగే జలపాతాలు, చల్లని గాలి ఈ ప్రాంతానికి ప్రత్యేక ఆకర్షణను తీసుకొస్తాయి. అందమైన ప్రకృతి దృశ్యాల కారణంగా దీన్ని “స్కాట్లాండ్ ఆఫ్ ఇండియా” అని కూడా అంటారు.

వ్యాలీ ఆఫ్ ఫ్లవర్స్.. రంగుల ప్రపంచం

ఉత్తరాఖండ్‌లోని వ్యాలీ ఆఫ్ ఫ్లవర్స్ వర్షాకాలంలో వేలాది రంగురంగుల అడవి పూలతో నిండిపోతుంది. హిమాలయాల మంచు శిఖరాలు ఈ అందాన్ని మరింత పెంచుతాయి. ప్రకృతి ప్రేమికులు, ట్రెక్కింగ్ అభిమానులకు ఇది అద్భుతమైన ప్రదేశం.

పుదుచ్చేరి.. మెరిసిపోయే ఫ్రెంచ్ అందాలు

పుదుచ్చేరి ఫ్రెంచ్ క్వార్టర్ వర్షం తర్వాత మరింత ఆకర్షణీయంగా కనిపిస్తుంది. రంగురంగుల కాలనీయ భవనాలు, ప్రశాంతమైన వీధులు, అందమైన కేఫ్‌లు యూరప్‌లోని ఫ్రాన్స్‌ను గుర్తు చేస్తాయి. వర్షపు వాతావరణంలో ఇక్కడ నడక ప్రత్యేక అనుభూతిని ఇస్తుంది.

మహాబలేశ్వర్.. ప్రశాంతమైన ప్రకృతి

మహారాష్ట్రలోని మహాబలేశ్వర్ వర్షాకాలంలో పొగమంచుతో కప్పబడి అద్భుతంగా కనిపిస్తుంది. పచ్చని అడవులు, లోయలు, వ్యూపాయింట్లు సందర్శకులను ఆకట్టుకుంటాయి. ఈ ప్రాంతాన్ని చాలామంది ఇంగ్లాండ్‌లోని లేక్ డిస్ట్రిక్ట్‌తో పోలుస్తారు.

Also Read: సూర్యుడు అస్తమించని దేశాలు తెలుసా? వేసవిలో 24 గంటలు ఇక్కడ పగలే.. దీని కారణం ఇదే

ఊటీ.. బ్రిటిష్ కాలపు అందాలు

తమిళనాడులోని ఊటీ వర్షాకాలంలో మరింత అందంగా మారుతుంది. టీ తోటలు, సరస్సులు, పాత చర్చిలు ఈ ప్రాంతానికి ప్రత్యేక ఆకర్షణ. పొగమంచుతో కప్పబడిన కొండలు ఇంగ్లాండ్ గ్రామీణ ప్రాంతాలను గుర్తు చేస్తాయి.

మండు.. చారిత్రక వైభవం

మధ్యప్రదేశ్‌లోని మండులోని పురాతన కోటలు, రాజభవనాలు వర్షాకాలంలో పచ్చని ప్రకృతితో మరింత అందంగా కనిపిస్తాయి. తడిసిన రాతి నిర్మాణాలు, పొగమంచు కలిసి స్కాట్లాండ్ కోటలను గుర్తు చేసే వాతావరణాన్ని సృష్టిస్తాయి.

లంబసింగి, చెర్రాపుంజి.. ప్రకృతి అద్భుతాలు

ఆంధ్రప్రదేశ్‌లోని లంబసింగి చల్లని వాతావరణం, దట్టమైన పొగమంచుతో ప్రసిద్ధి చెందింది. పైన్ అడవులు ప్రశాంతతను అందిస్తాయి. మేఘాలయలోని చెర్రాపుంజి భారీ వర్షాలు, ఎత్తైన జలపాతాలు, లోతైన లోయలతో ఐస్‌లాండ్ ప్రకృతి అందాలను గుర్తు చేస్తుంది.

వర్షాకాలంలో భారతదేశంలోని ఈ ప్రదేశాలు యూరప్ తరహా అందాలను అందిస్తాయి. ప్రకృతి, చరిత్ర, ప్రశాంతత, సాహస యాత్రలు అన్నీ ఒకే చోట ఆస్వాదించాలనుకునే వారికి ఇవి అద్భుతమైన ఆప్షన్లు. ఈసారి వర్షాకాల విహారానికి ఈ అందమైన డెస్టినేషన్స్ మీ ట్రావెల్ లిస్ట్‌లో తప్పకుండా చేర్చుకోండి.