ఇక విదేశాల్లోనూ వందే భారత్ పరుగులు.. రైల్వేమంత్రి సంచలన ప్రకటన!

Vande Bharat Trains to Run Abroad: భారతీయ రైల్వేలో సరికొత్త అధ్యాయం మొదలుకాబోతోంది. ఇప్పటివరకు దేశీయ ప్రయాణికులకు వేగవంతమైన సేవలు అందిస్తున్న వందే భారత్ రైళ్లు త్వరలో విదేశాల్లోనూ పరుగులు పెట్టే అవకాశం ఉంది. మరో మూడు నుంచి నాలుగేళ్లలో పూర్తి వందే భారత్ రైళ్లను ఇతర దేశాలకు ఎగుమతి చేయాలని భారత్ లక్ష్యంగా పెట్టుకున్నట్లు కేంద్ర రైల్వే మంత్రి అశ్విని వైష్ణవ్ వెల్లడించారు. దీంతో రైల్వే తయారీ రంగంలో భారత్ అంతర్జాతీయ స్థాయిలో మరింత గుర్తింపు పొందే దిశగా అడుగులు వేస్తోంది.

విదేశాలకు వందే భారత్ రైళ్లు

బెంగళూరు-ముంబై వందే భారత్ స్లీపర్ ఎక్స్‌ ప్రెస్‌ ను ప్రారంభించిన సందర్భంగా అశ్విని వైష్ణవ్ ఈ విషయాన్ని ప్రకటించారు. ప్రతి కొత్త వెర్షన్‌లో వందే భారత్ రైళ్లను మరింత మెరుగుపరుస్తున్నామని ఆయన తెలిపారు. గత మోడళ్లలో ఎదురైన అనుభవాల ఆధారంగా కొత్త రైళ్లలో మార్పులు చేస్తున్నట్లు చెప్పారు. ఇప్పటికే భారత్ నుంచి రైల్వేకు సంబంధించిన పలు కీలక పరికరాలను స్విట్జర్లాండ్, జర్మనీ, ఫ్రాన్స్, ఇటలీ, అమెరికా లాంటి దేశాలకు ఎగుమతి చేస్తున్నారు. వీటిలో ప్రొపల్షన్ సిస్టమ్స్, ట్రాక్షన్ మోటార్లు, బోగీలు వంటి భాగాలు ఉన్నాయి. ఇప్పుడు పూర్తి రైళ్లను కూడా విదేశాలకు పంపించే స్థాయికి చేరుకోవాలని భారత్ భావిస్తోంది.

రూ.26 వేల కోట్లకు చేరిన రైల్వే ఎగుమతులు

2016-17 నుంచి 2026 జనవరి వరకు భారతీయ రైల్వే రోలింగ్ స్టాక్, విడిభాగాల ఎగుమతుల విలువ సుమారు రూ.26,000 కోట్లకు చేరినట్లు రైల్వే మంత్రిత్వ శాఖ వెల్లడించింది. లోకోమోటివ్‌లు, ప్యాసింజర్ కోచ్‌లు, మోటార్లు, ఇతర పరికరాలను దేశీయ తయారీదారులు అంతర్జాతీయ మార్కెట్ల కోసం తయారు చేస్తున్నారు. మరోవైపు, దేశంలో 260 వందే భారత్ స్లీపర్ రైలు సెట్లను తయారు చేయాలని రైల్వే శాఖ ప్రణాళిక రూపొందించింది. ఈ తయారీలో BEML, చెన్నైలోని ఇంటిగ్రల్ కోచ్ ఫ్యాక్టరీతో పాటు టెక్నికల్ భాగస్వాములు పాల్గొంటున్నారు.

బెంగళూరు-ముంబై స్లీపర్ రైలు ప్రత్యేకతలు

కొత్తగా ప్రారంభమైన బెంగళూరు-ముంబై వందే భారత్ స్లీపర్ రైలు సుమారు 1,118 కిలోమీటర్ల దూరాన్ని 16 గంటల్లో చేరుకోనుంది. ప్రస్తుతం ఈ మార్గంలో నడుస్తున్న రైళ్లతో పోలిస్తే ప్రయాణ సమయం దాదాపు ఎనిమిది గంటలు తగ్గనుంది. ఈ రైలులో మొత్తం 16 ఏసీ కోచ్‌లు, 823 బెర్త్‌లు ఉన్నాయి. ఫస్ట్ ఏసీ, ఏసీ టూ-టైర్, ఏసీ త్రీ-టైర్ సదుపాయాలు కల్పించారు. ప్రయాణ సమయంలో కుదుపులు తగ్గించే ఆధునిక కప్లర్లు, మధ్య మరియు పై బెర్తుల్లో ప్రయాణించే వారికి మెరుగైన సౌకర్యాలు కూడా ఉన్నాయి.

బెంగళూరులోని సర్ ఎం. విశ్వేశ్వరయ్య టెర్మినల్ నుంచి రాత్రి 7.45 గంటలకు బయలుదేరి, మరుసటి రోజు ఉదయం 11.55 గంటలకు ముంబై చేరుకుంటుంది. తిరుగు ప్రయాణంలో ముంబై నుంచి రాత్రి 8.10 గంటలకు బయలుదేరి, మధ్యాహ్నం 12 గంటలకు బెంగళూరు చేరుతుంది. ఈ రైలు వారానికి ఆరు రోజులు నడుస్తుంది.