గంటకు 280 కి.మీ వేగం.. 557 మంది ప్రయాణం.. భారత తొలి బుల్లెట్ రైలు ప్రత్యేకతలివే!

India’s First Made-in-India Bullet Train: భారత బుల్లెట్ రైలు కల త్వరలో సాకారం కానుంది. ముంబై-అహ్మదాబాద్ మధ్య నిర్మిస్తున్న హైస్పీడ్ రైల్ కారిడార్ కోసం దేశీయంగా రూపొందిస్తున్న తొలి బుల్లెట్ రైలు తయారీ పనులు ప్రస్తుతం బెంగళూరులోని భారత్ ఎర్త్ మూవర్స్ లిమిటెడ్ (BEML) ప్లాంట్‌లో జరుగుతున్నాయి. గంటకు 280 కిలోమీటర్ల గరిష్ఠ పరీక్షా వేగాన్ని అందుకునేలా ఈ రైలును రూపొందిస్తున్నారు. ఆధునిక సాంకేతికతతో పాటు ప్రయాణికుల సౌకర్యానికి కూడా ఇందులో పెద్దపీట వేశారు.

8 కోచ్‌లు.. 557 మంది ప్రయాణించే సౌకర్యం..

ఈ బుల్లెట్ రైలు మొత్తం పొడవు 202 మీటర్లు ఉంటుంది. ఇందులో నాలుగు మోటార్ కోచ్‌లు, నాలుగు ట్రైలర్ కోచ్‌లు కలిపి మొత్తం 8 కోచ్‌లు ఉంటాయి. ఒకేసారి 557 మంది ప్రయాణించవచ్చు. వీరిలో దివ్యాంగులు, ప్రత్యేక సహాయం అవసరమైన ప్రయాణికుల కోసం కూడా సీట్లు కేటాయించారు. ఈ రైలులో ఏడు కోచ్‌లు స్టాండర్డ్ క్లాస్‌గా, ఒక కోచ్ ఎగ్జిక్యూటివ్ క్లాస్‌గా ఉంటాయి. స్టాండర్డ్ క్లాస్‌లో 3+2 సీటింగ్, ఎగ్జిక్యూటివ్ క్లాస్‌లో 2+2 సీటింగ్ ఏర్పాటు చేయనున్నారు. అవసరమైతే రెండు 8 కోచ్‌ల రైళ్లను కలిపి 16 కోచ్‌ల రైలుగా నడిపే వెసులుబాటు కూడా ఉంటుంది.

ప్రయాణికుల కోసం అత్యాధునిక సౌకర్యాలు

ప్రయాణికులకు ఎక్కువ లెగ్‌రూమ్, విశాలమైన సీట్లు ఉండేలా లోపలి భాగాలను రూపొందించారు. కోచ్‌ల మధ్య సులభంగా వెళ్లేందుకు సీల్డ్ గ్యాంగ్‌వే ఉంటుంది. మొబైల్ ఫోన్లు, ల్యాప్‌టాప్‌ల కోసం ప్రతి సీటు వద్ద పవర్ అవుట్‌లెట్లు, సామాను పెట్టుకునేందుకు ప్రత్యేక ర్యాక్‌లు ఏర్పాటు చేయనున్నారు. అంతేకాకుండా LCD స్క్రీన్ల ద్వారా ఇంగ్లీష్, హిందీ, ప్రాంతీయ భాషల్లో ప్రయాణ సమాచారం అందిస్తారు. వై ఫై ఆధారిత ఇన్ఫోటైన్‌మెంట్ సిస్టమ్, ఆటోమేటిక్ అనౌన్స్‌మెంట్లు, ఎమర్జెన్సీ టాక్‌బ్యాక్ సదుపాయాలు కూడా ఉంటాయి.

దివ్యాంగులకు ప్రత్యేక ఏర్పాట్లు

ప్రత్యేక అవసరాలు ఉన్న ప్రయాణికులు కూడా ఇబ్బంది లేకుండా ప్రయాణించేలా ఈ రైలును రూపొందిస్తున్నారు. ప్లాట్‌ఫామ్‌కు అనుగుణంగా ఫ్లోర్ ఎత్తు, రైలు-ప్లాట్‌ఫామ్ మధ్య ఖాళీని తగ్గించే ముడుచుకునే మెట్లు ఏర్పాటు చేస్తారు. వీల్‌చైర్‌కు అనుకూలమైన సీటింగ్, ప్రత్యేక టాయిలెట్లు, బ్రెయిలీ సూచికలు కూడా అందుబాటులో ఉంటాయి.

వేగం, భద్రత, పర్యావరణంపై ప్రత్యేక దృష్టి

ఈ రైలు 25 కేవీ ఏసీ విద్యుత్ వ్యవస్థతో నడుస్తుంది. వేగం తగ్గించే సమయంలో విద్యుత్‌ను తిరిగి గ్రిడ్‌కు పంపించే రీజెనరేటివ్ బ్రేకింగ్ టెక్నాలజీని ఉపయోగిస్తారు. ప్రతి కోచ్‌లో ఆధునిక ఏసీ వ్యవస్థ ఉంటుంది. శబ్దాన్ని తగ్గించే ఇన్సులేషన్, గాలి నిరోధకతను తగ్గించే ఏరోడైనమిక్ డిజైన్ కూడా ఉంటుంది. భారత తొలి స్వదేశీ బుల్లెట్ రైలు వేగంతో పాటు సౌకర్యం, అందుబాటు, ఇంధన సామర్థ్యానికి ప్రాధాన్యం ఇస్తోంది. ముంబై-అహ్మదాబాద్ హైస్పీడ్ కారిడార్‌లో ఈ రైలు అందుబాటులోకి వస్తే దేశ రైల్వే ప్రయాణంలో ఒక కొత్త అధ్యాయం ప్రారంభం కానుంది.