Indian Railways passengers: వందే భారత్ స్పీడ్.. రైల్వే రికార్డులు బద్దలు.. లెక్క ఎక్కువైంది బాస్!

Indian Railways passengers: ఇండియన్ రైల్వే లేని ప్రయాణం అస్సలు ఊహించలేం. ప్రజల ప్రయాణానికి ఇదే ప్రధాన ఆధారం. చవకైన టిక్కెట్లు, సౌకర్యవంతమైన ప్రయాణం, దేశం నలుమూలలకూ కలుపుతున్న నెట్‌వర్క్ కారణంగా, రైల్వేలో ప్రయాణించే వారి సంఖ్య ఎప్పుడూ భారీగానే ఉంటుంది. కానీ, తాజాగా బయటకు వచ్చిన లెక్కలు చూస్తే ఈ సంఖ్య మరింత ఆశ్చర్యం కలిగించేలా ఉంది.

❄ అదిరే రికార్డు..
గత ఆరు సంవత్సరాల్లో మొత్తం 3,349 కోట్ల మంది ప్రయాణికులు రైల్వే సేవలను వినియోగించుకున్నారు. ఇందులో 418 కోట్ల మంది రిజర్వేషన్‌తో, 2,931 కోట్ల మంది అన్రిజర్వ్‌డ్ కోచులలో ప్రయాణించారు. ఈ లెక్కలు కోవిడ్ సమయంలో పడిపోయినా, కోవిడ్ తర్వాత తిరిగి రైల్వేలో ప్రయాణాల సంఖ్య ఆకాశాన్ని తాకింది. ముఖ్యంగా 2022 – 23, 2023 – 24 మరియు 2024 – 25 సంవత్సరాల్లో జనరల్ కోచ్‌లలో భారీ ఎత్తున ప్రజలు ప్రయాణించారు. 2024 – 25లో మాత్రమే 651 కోట్ల మంది జనరల్ కోచ్‌లలో ప్రయాణించడం రైల్వేకు కొత్త రికార్డు.

❄ పండగల పూట ప్రత్యేక రైళ్లు
ప్రతీ పండగ సీజన్‌లో రైల్వే ప్రత్యేక సర్వీసులు నడుపుతూ జనసందోహాన్ని చక్కగా నిర్వహిస్తోంది. 2024 అక్టోబర్ 1 నుంచి నవంబర్ 30 వరకు దుర్గాపూజ, దీపావళి, ఛఠ్ పండగల సమయంలో 7,990 ప్రత్యేక రైళ్లు నడిపి, 1.8 కోట్ల మందికి ప్రయాణం సులభతరం చేసింది. ఇక మహా కుంభమేళా జరిగిన సందర్భంలో 17,300 రైళ్లు నడిపి 4.24 కోట్ల ప్రయాణికులను రవాణా చేయడం రైల్వే ప్రతిష్టను మరింత పెంచింది.

❄ వందే భారత్.. అమృత్ భారత్ ట్రైన్లు
ప్రజలకు వేగవంతమైన ప్రయాణం అందించేందుకు వందే భారత్ ఎక్స్‌ప్రెస్ ఇప్పటికే దేశంలోని ప్రధాన మార్గాల్లో దూసుకుపోతోంది. రాబోయే రోజుల్లో అమృత్ భారత్ ట్రైన్లు కూడా ఆర్థికంగా చవకైన, ఆధునిక సౌకర్యాలతో ప్రయాణాన్ని మరింత మెరుగుపరచనున్నాయి. స్టేషన్ల రీడెవలప్‌మెంట్ ప్రాజెక్టులు, డబుల్ లైన్ల నిర్మాణం, కొత్త ట్రాక్‌ల వేగవంతమైన నిర్మాణం వంటి మార్పులు రైల్వే రవాణాను ఒక కొత్త స్థాయికి తీసుకెళ్తున్నాయి.

Also Read: Burj Khalifa cleaning cost: బుర్జ్ ఖలీఫా క్లీనింగ్ కి.. ఇంత ఖర్చు అవుతుందా? ఇవేం లెక్కలు బాబోయ్!

❄ జనరల్ కోచ్‌లపై భారీ డిమాండ్
ప్రత్యేకించి కోవిడ్ తర్వాత సాధారణ ప్రయాణం పెరిగిపోయింది. 2020 – 21లో కోవిడ్ కారణంగా 99 కోట్ల మంది మాత్రమే ప్రయాణించగా, 2024 – 25లో 651 కోట్ల మంది జనరల్ కోచ్‌లలో ప్రయాణించడం రైల్వే సేవలపై ప్రజల విశ్వాసాన్ని చూపుతోంది. సాధారణ టిక్కెట్ల ధరలు చవకగా ఉండటంతో పాటు, మరిన్ని కోచ్‌లు జోడించడం, సీటింగ్ సౌకర్యాలను మెరుగుపరచడం వల్ల ఈ సంఖ్య మరింత పెరిగే అవకాశం ఉంది.

2030 నాటికి రైల్వే సంపూర్ణ ఎలక్ట్రిఫికేషన్ సాధించాలనే లక్ష్యంతో ముందుకు సాగుతోంది. హై-స్పీడ్ బుల్లెట్ ట్రైన్ ప్రాజెక్టులు, కార్గో లాజిస్టిక్స్ మెరుగుదల, కొత్త ఆధునిక కోచ్‌లు రాబోయే రోజుల్లో ప్రయాణ అనుభవాన్ని మరింత సులభతరం చేస్తాయి. రైల్వేలోని ఈ వేగవంతమైన అభివృద్ధి దేశ ఆర్థిక వృద్ధికి కూడా తోడ్పడుతోంది. మొత్తం మీద, భారతీయ రైల్వే ఇప్పుడు రికార్డుల దిశగా దూసుకుపోతోంది. కోవిడ్ తర్వాత కూడా ఇంత పెద్ద సంఖ్యలో ప్రయాణికులు తిరిగి రైల్వేను ఎంచుకోవడం, రైల్వేలో జరుగుతున్న ఆధునీకరణ చర్యలు ఎంత విజయవంతంగా ఉన్నాయో స్పష్టంగా చెబుతోంది.

Share

• 
• 
• 
• 
• 
•