పక్షులతో యుద్ధం చేసి ఓడిపోయిన దేశం.. ఈ ఆసక్తికర చరిత్ర మీకు తెలుసా?

The Great Emu War of 1932: ప్రపంచ చరిత్రలో అత్యంత విచిత్రమైన యుద్ధం ‘ది గ్రేట్ ఈము వార్’. యుద్ధం అనగానే సాధారణంగా రెండు దేశాల మధ్య, సైన్యాల మధ్య జరగడం తెలుసు. కానీ, ఆస్ట్రేలియాలో మాత్రం ఒకప్పుడు సైన్యం పక్షులతో పోరాడాల్సిన పరిస్థితి ఏర్పడింది. ఆశ్చర్యకరమైన విషయం ఏమిటంటే, చివరికి ఆ యుద్ధంలో పక్షులే విజయం సాధించాయి. వినడానికి ఆశ్చర్యంగా ఉన్నా, ఇది నిజం.

1932లో అసలు ఏం జరిగింది?

1932లో పశ్చిమ ఆస్ట్రేలియాలో ఈము పక్షుల సంఖ్య ఒక్కసారిగా పెరిగిపోయింది. వేల సంఖ్యలో ఉన్న ఈ పక్షులు పంట పొలాల్లోకి దూసుకెళ్లి గోధుమ పంటలను తీవ్రంగా నాశనం చేయడం ప్రారంభించాయి. దీంతో రైతులు తీవ్ర ఇబ్బందులు ఎదుర్కొన్నారు. పంటలు దెబ్బతినడంతో ప్రభుత్వాన్ని ఆశ్రయించి తమకు సహాయం చేయాలని కోరారు. రైతుల విజ్ఞప్తిని పరిగణనలోకి తీసుకున్న ఆస్ట్రేలియా ప్రభుత్వం సమస్యను పరిష్కరించేందుకు సైన్యాన్ని రంగంలోకి దింపింది. సుమారు 20 వేల ఈము పక్షులను నియంత్రించేందుకు సైనికులు మెషిన్ గన్స్ తో ప్రత్యేక ఆపరేషన్ ప్రారంభించారు.

సైన్యంపై ఈము పక్షుల విజయం

మొదట ఈ పని సులభంగానే పూర్తవుతుందని అధికారులు భావించారు. అయితే, పరిస్థితి ఊహించిన దానికంటే పూర్తిగా భిన్నంగా మారింది. ఈము పక్షులు చాలా వేగంగా పరుగెత్తడంతో పాటు, ప్రమాదం గుర్తించిన వెంటనే చిన్న చిన్న గుంపులుగా విడిపోయి వేర్వేరు దిశల్లో పారిపోయేవి. దీంతో సైనికులు వాటిని లక్ష్యంగా చేసుకోవడం చాలా కష్టమైంది. సైన్యం వేల సంఖ్యలో బుల్లెట్లు కాల్చినా ఆశించిన ఫలితం రాలేదు. కొద్దిపాటి పక్షులను మాత్రమే చంపగలిగారు. మిగిలినవి తప్పించుకుని మళ్లీ పంట పొలాల్లోకి చేరి నష్టం కొనసాగించాయి. ఈ ఆపరేష న్‌కు భారీగా ఖర్చయినా సమస్య మాత్రం పరిష్కారం కాలేదు. కొన్ని రోజుల పాటు ప్రయత్నించిన తర్వాత కూడా ఈము పక్షులను పూర్తిగా నియంత్రించడం సాధ్యం కాదని అధికారులు గ్రహించారు. చివరకు సైనిక చర్యను నిలిపివేసి ఆపరేషన్‌ను విరమించుకున్నారు. ఈ నేపథ్యంలో ఈము పక్షులు సైన్యంపై విజయం సాధించినట్లుగా చరిత్రలో రికార్డు అయ్యింది.

చరిత్రలో నిలిచిపోయిన ‘ది గ్రేట్ ఈము వార్’

ఈ సంఘటన తర్వాత ప్రపంచవ్యాప్తంగా దీనిపై విస్తృతంగా చర్చ జరిగింది. ఒక దేశ సైన్యం పక్షులతో పోరాడి ఆశించిన ఫలితం సాధించలేకపోవడం చాలా అరుదైన విషయం కావడంతో ఇది చరిత్రలో ప్రత్యేక స్థానం సంపాదించింది. అప్పటి నుంచి ఈ ఘటనను ‘ది గ్రేట్ ఈము వార్’ పేరుతో పిలుస్తున్నారు. నిజానికి ఇది అధికారిక యుద్ధం కాకపోయినా, పక్షుల కారణంగా సైన్యం రంగంలోకి దిగడం, చివరకు వెనక్కి తగ్గడం వంటి పరిణామాల వల్ల ఈ సంఘటన ప్రపంచ చరిత్రలో అత్యంత విచిత్రమైన ఘటనల్లో ఒకటిగా నిలిచిపోయింది.