వందే భారత్ రైళ్లకు ఫుల్ డిమాండ్.. ఆ రూట్ లో ఏకంగా 189 శాతం ఆక్యుపెన్సీ!

Vande Bharat Trains Record Demand: భారతీయ రైల్వేలో వందే భారత్ రైళ్లకు ప్రయాణికుల నుంచి ఆదరణ రోజురోజుకూ పెరుగుతోంది. వేగవంతమైన ప్రయాణం, ఆధునిక సౌకర్యాలు, మెరుగైన భద్రత కారణంగా ఈ రైళ్లలో టికెట్లకు మంచి డిమాండ్ ఏర్పడింది. 2025-26 ఆర్థిక సంవత్సరంలో వందే భారత్ రైళ్లు దాదాపు పూర్తి ఆక్యుపెన్సీని నమోదు చేయగా, కొన్ని కీలక మార్గాల్లో ఈ సంఖ్య 100 శాతాన్ని కూడా దాటింది. ముఖ్యంగా ఓ మార్గంలో ఏకంగా 189 శాతానికి పైగా ఆక్యుపెన్సీ నమోదవడం విశేషం.

మొత్తం మీద 99.10 శాతం ఆక్యుపెన్సీ

రైల్వేశాఖ లెక్కల ప్రకారం, 2025-26 ఆర్థిక సంవత్సరంలో వందే భారత్ చైర్ కార్ సర్వీసులు సగటున 99.10 శాతం ఆక్యుపెన్సీని సాధించాయి. దేశవ్యాప్తంగా ప్రస్తుతం 160కి పైగా వందే భారత్ సర్వీసులు నడుస్తున్నాయి. 2019లో ప్రారంభమైన ఈ రైళ్ల నెట్‌వర్క్ తక్కువ సమయంలోనే భారీగా విస్తరించింది. లేటెస్ట్ కోచ్‌లు, అధునాతన భద్రతా వ్యవస్థలు, ప్రయాణికులకు మెరుగైన సౌకర్యాలు వీటి ప్రత్యేకతగా నిలుస్తున్నాయి.

ఈ మార్గంలో ఏకంగా 189 శాతం!

వందే భారత్ రైళ్లలో అత్యధిక ఆక్యుపెన్సీ తిరువనంతపురం సెంట్రల్ – మంగళూరు సెంట్రల్ మార్గంలో నమోదైంది. ఈ మార్గంలో తిరువనంతపురం నుంచి మంగళూరుకు వెళ్లే రైలు నంబర్ 20632లో 189.35 శాతం ఆక్యుపెన్సీని కలిగి ఉంది. తిరుగు ప్రయాణంలో నడిచే రైలు నంబర్ 20631లో 174.77 శాతం ఆక్యుపెన్సీ కనిపించింది. సాధారణంగా 100 శాతం కంటే ఎక్కువ ఆక్యుపెన్సీ అంటే రైలులో సీట్లు, బెర్తులు అదనంగా ఉన్నాయని కాదు. ఒకే సీటును, బెర్తును ఎక్కువ మంది ప్రయాణికులు కోరుకోవడం వల్ల ఈ సంఖ్య పెరుగుతుంది.

ఢిల్లీ – వారణాసి మార్గంలోనూ భారీ డిమాండ్

ఢిల్లీ – వారణాసి కారిడార్‌లో కూడా వందే భారత్ రైళ్లకు మంచి ఆదరణ లభిస్తోంది. ఈ మార్గంలో నడుస్తున్న రెండు జతల చైర్ కార్ సర్వీసులు 2025-26లో 100 శాతానికి పైగా ఆక్యుపెన్సీని నమోదు చేశాయి. వారణాసి నుంచి న్యూఢిల్లీ వెళ్లే రైలు నంబర్ 22415లో 117.26 శాతం, తిరుగు ప్రయాణపు రైలు 22416లో 114.05 శాతం ఆక్యుపెన్సీ నమోదైంది. మరో జత రైళ్లలోనూ 117 శాతానికి పైగా ఆక్యుపెన్సీ కనిపించింది.

స్లీపర్ వందే భారత్‌కూ ఆదరణ

2026 జనవరిలో హౌరా – కామాఖ్య మార్గంలో దేశంలోనే తొలి వందే భారత్ స్లీపర్ సర్వీసు ప్రారంభమైంది. ఈ సర్వీసు 2025-26 ఆర్థిక సంవత్సరంలో 114.54 శాతం ఆక్యుపెన్సీని సాధించింది. ఇక ఢిల్లీ – వారణాసి మార్గంలో స్లీపర్ సర్వీసు అక్టోబర్ 31, 2026న ప్రారంభమైంది.