AP rainfall alert: ఏపీలో మళ్లీ వానల దాడి.. తీర ప్రాంతాలకి అలర్ట్!

AP rainfall alert: వాయువ్య బంగాళాఖాతంలో ఏర్పడిన తీవ్ర అల్పపీడన ప్రభావంతో ఏపీ తీర ప్రాంతాల్లో వాతావరణం ఉత్కంఠగా మారింది. రాబోయే 24 గంటల్లో రాష్ట్రంలో పలు జిల్లాల్లో మోస్తరు నుంచి భారీ వర్షాలు కురిసే అవకాశం ఉందని విపత్తుల నిర్వహణ సంస్థ ఎగ్జిక్యూటివ్ డైరెక్టర్ ప్రఖర్ జైన్ హెచ్చరించారు.

తీర ప్రాంతాల్లో గాలుల వేగం గంటకు 40 నుండి 60 కిలోమీటర్ల వరకు వీచే అవకాశం ఉండటంతో మత్స్యకారులు సముద్రంలోకి వెళ్లకుండా జాగ్రత్తలు తీసుకోవాలని అధికారులు సూచించారు. వినాయక చవితి వేడుకలు కొనసాగుతున్న నేపథ్యంలో వినాయక మండపాల నిర్వాహకులు, నిమజ్జన కార్యక్రమాల సమితులు ముందస్తు చర్యలు తీసుకోవాలని ఆయన విజ్ఞప్తి చేశారు.

రేపు, ఆగస్టు 28 (గురువారం), రాష్ట్రంలోని అల్లూరి సీతారామరాజు, ఏలూరు, ఎన్టీఆర్ జిల్లాల్లో మోస్తరు నుంచి భారీ వర్షాలు కురిసే అవకాశం ఉందని అంచనా. పార్వతీపురం మన్యం, కోనసీమ, తూర్పు గోదావరి, పశ్చిమ గోదావరి, కృష్ణా, గుంటూరు, బాపట్ల, పల్నాడు జిల్లాల్లో కొన్నిచోట్ల తేలికపాటి నుంచి మోస్తరు వర్షాలు పడతాయని, మిగతా జిల్లాల్లో తేలికపాటి వర్షాలు పడే అవకాశం ఉందని వాతావరణ అధికారులు తెలిపారు.

ఇప్పటికే గురువారం సాయంత్రం 5 గంటల వరకు పలు ప్రాంతాల్లో భారీ వర్షాలు నమోదయ్యాయి. మన్యం జిల్లా సీతంపేటలో 77 మిల్లీమీటర్లు, కోనసీమ జిల్లాలోని మలికిపురంలో 74.5 మిల్లీమీటర్లు, భీమవరం వద్ద 67.5 మిల్లీమీటర్లు, విజయవాడ పశ్చిమలో 62.5 మిల్లీమీటర్లు, విజయవాడ సెంట్రల్‌లో 62 మిల్లీమీటర్ల వర్షపాతం నమోదైంది.

ఎగువ ప్రాంతాల్లో కురుస్తున్న భారీ వర్షాల కారణంగా కృష్ణా, గోదావరి, తుంగభద్ర పరివాహక ప్రాంతాల్లోని రిజర్వాయర్లు, ఆనకట్టలు నిండిపోతున్నాయి. ప్రాజెక్టుల నుండి నీటిని దిగువకు విడుదల చేయడం కొనసాగుతున్నందున లోతట్టు ప్రాంత ప్రజలు అప్రమత్తంగా ఉండాలని విపత్తుల నిర్వహణ సంస్థ హెచ్చరించింది. నదులు, వాగులు, కాలువలు పొంగిపొర్లుతున్న సమయంలో వాటిని దాటే ప్రయత్నం చేయరాదని, నదులలో స్నానాలు చేయడం తగదని అధికారులు హెచ్చరించారు.

Also Read: Monkey incident: చెట్టెక్కిన కోతి.. కింద కురిసిన నోట్ల వర్షం.. ఎంత అదృష్టమో!

వినాయక నిమజ్జనాల సందర్భంగా ప్రత్యేక జాగ్రత్తలు తీసుకోవాలని రాష్ట్ర ప్రజలను కోరారు. నదులు, చెరువులు, కాలువల వద్ద ఏర్పాటు చేసిన హెచ్చరిక బోర్డులను తప్పనిసరిగా పాటించాలని, నిమజ్జన ప్రదేశాలకు వెళ్తున్న వారు క్రమబద్ధంగా కదలాలని, వర్షాల కారణంగా నీటి మట్టం పెరిగిన ప్రాంతాలకు వెళ్లకుండా ఉండాలని సూచించారు. అత్యవసర పరిస్థితుల్లో వెంటనే స్థానిక అధికారులకు సమాచారం అందించాల్సిందిగా ప్రజలను అభ్యర్థించారు.

తీర ప్రాంత గ్రామాల్లో నివసిస్తున్న ప్రజలు కూడా అప్రమత్తంగా ఉండాలని అధికారులు సూచించారు. బలమైన ఈదురుగాలుల ప్రభావంతో తాత్కాలిక గుడిసెలు, ఇళ్ల పైకప్పులు సురక్షితంగా ఉన్నాయో లేదో పరిశీలించుకోవాలి. వర్షాల సమయంలో అనవసరంగా బయటకు వెళ్లకూడదని, తెగిన విద్యుత్ తీగల దగ్గరికి వెళ్లరాదని, పొంగుతున్న వాగులు, నదుల వద్ద ప్రయాణించరాదని హెచ్చరికలు జారీ చేశారు.

ఈ అల్పపీడన ప్రభావం రాబోయే 24 గంటల పాటు కొనసాగుతుందని వాతావరణ శాఖ అంచనా వేసింది. మత్స్యకారులు సముద్రంలోకి వెళ్లకుండా ఉండాలని, వినాయక నిమజ్జనాలు సురక్షితంగా జరగడానికి ప్రజలు, నిర్వాహకులు అధికారులతో సహకరించాలని విపత్తు నిర్వహణ సంస్థ విజ్ఞప్తి చేసింది. వర్షాలు తగ్గే వరకు అప్రమత్తంగా ఉండటం, అధికారుల సూచనలు పాటించడం మాత్రమే మన భద్రతకు మార్గమని అధికారులు స్పష్టంచేశారు.

Share

• 
• 
• 
• 
• 
•