చంద్రబాబుకి పబ్లిక్ స్టంట్లు తప్ప వరద బాధితులపై పట్టింపు లేదు: బొత్స సత్యనారాయణ

Botsa Satyanarayana: ఉత్తర కోస్తాలో వర్షాలు, వరదలతో ప్రజలు తీవ్ర ఇబ్బందులు పడుతుంటే సీఎం చంద్రబాబుకు మాత్రం పబ్లిక్ స్టంట్లు చేయడమే సరిపోతోందని వైఎస్సార్సీపీ నేత, ఎమ్మెల్సీ బొత్స సత్యనారాయణ మండిపడ్డారు. విజయనగరంలోని పార్టీ కార్యాలయంలో శుక్రవారం నిర్వహించిన మీడియా సమావేశంలో ఆయన మాట్లాడారు. నిత్యవసర వస్తువుల ధరలు ఆకాశాన్నంటుతున్నా ప్రభుత్వం పట్టించుకోకపోవడం దారుణమన్నారు. ప్రభుత్వం వెంటనే స్పందించి తుపాను నష్టాన్ని అంచనా వేసి, బాధితులకు పరిహారం అందించాలని డిమాండ్ చేశారు.

ఎన్నికల్లో అక్రమాలు.. అధికారులకు హెచ్చరిక

మున్సిపల్ ఎన్నికల నామినేషన్ల పర్వం నేటితో ముగిసిందని, ఓటర్లు ఆలోచించి నిర్ణయం తీసుకోవాలని బొత్స కోరారు. రాష్ట్రంలో కొన్నిచోట్ల వైఎస్సార్సీపీ ఎంపీటీసీ, జడ్పీటీసీ అభ్యర్థులను ఎత్తుకెళ్లడమే కాకుండా, మరికొన్నిచోట్ల డబ్బు ఆశ చూపి లొంగదీసుకునేందుకు ప్రయత్నించారని ఆరోపించారు. పూసపాటిరేగలో ఆర్‌ఓ స్క్రూటినీని తప్పుగా నిర్వహించారని విమర్శించారు. ఇదే విషయంపై మాజీ గవర్నర్ పూసపాటి అశోక్ గజపతిరాజు ఎందుకు మాట్లాడటం లేదని ప్రశ్నించారు. విజయనగరం జిల్లా సంప్రదాయాలకు నిలయమని, ఇక్కడ తుచ్ఛ రాజకీయాలకు చోటులేదన్నారు. కొందరు అధికారులు తప్పుడు కుల ధ్రువీకరణ పత్రాలు ఇస్తున్నారని, రేపు తమ ప్రభుత్వం వచ్చాక అలాంటి వారి మనుగడ ఎలా ఉంటుందో చూస్తామని హెచ్చరించారు.

ఇచ్చిన మాట నిలబెట్టుకోవాలి: ఎమ్మెల్సీ బొత్స

ప్రజలకు ఇచ్చిన హామీలను ప్రభుత్వం నిలబెట్టుకోవాలని ఎమ్మెల్సీ బొత్స సత్యనారాయణ డిమాండ్ చేశారు. త్వరలో జరగబోయే మున్సిపల్ ఎన్నికల్లో చుట్టుపక్కల స్థానాల్లో విజయం సాధించాలని శ్రేణులకు పిలుపునిచ్చారు. గతంలో విజయవాడ, ఏలూరు, విశాఖ, విజయనగరం… pic.twitter.com/yJbBV23TUo

— BIG TV Breaking News (@bigtvtelugu) October 30, 2026

అభ్యర్థులను గెలిపించాలని పిలుపు

గతంలో విజయవాడ, ఏలూరు, విశాఖ, విజయనగరం మేయర్ స్థానాలను గెలుచుకున్న విషయాన్ని బొత్స గుర్తుచేశారు. ఈసారి విజయనగరం మేయర్ అభ్యర్థి కోలగట్ల శ్రావణితో పాటు పార్టీ అభ్యర్థులందరినీ గెలిపించాలని కోరారు. ఎన్నికల ఖర్చు కోసం భూములు అమ్ముకుంటున్న ఈ ప్రభుత్వానికి, అలాగే విశాఖలో గీతం భూములను కబ్జా చేసిన ఎంపీ భరత్‌కు ప్రజలే తగిన బుద్ధి చెబుతారన్నారు. నిలబెట్టుకోలేని హామీలిచ్చి ప్రజలను మోసం చేసిన కూటమి ప్రభుత్వానికి రాబోయే ఎన్నికల్లో ఓటుతోనే సమాధానం చెప్పాలని బొత్స పిలుపునిచ్చారు.

Also Read: మియాపూర్ భూముల కేసులో ప్రభుత్వ గెలుపు.. KCR, KTRలపై విరుచుకుపడ్డ చనగాని దయాకర్