పీపీపీ పేరుతో రాష్ట్రం అమ్మకానికి? చంద్రబాబు, లోకేష్‌లపై పేర్ని నాని సంచలన ఆరోపణలు

Perni Nani: ఆంధ్రప్రదేశ్ రాజకీయం ప్రస్తుతం ప్రజా భాగస్వామ్య విధానం (PPP) చుట్టూ తీవ్రంగా వేడెక్కింది. కూటమి ప్రభుత్వం అనుసరిస్తున్న విధానాలపై మాజీ మంత్రి పేర్ని నాని తీవ్ర స్థాయిలో విరుచుకుపడ్డారు. ఓటేసి గెలిపించిన ప్రజల సంక్షేమాన్ని గాలికి వదిలేసి, ప్రైవేటు సంస్థలకు లబ్ధి చేకూర్చేలా నిర్ణయాలు తీసుకుంటున్నారని ఆయన మండిపడ్డారు.

ప్రజా ఆస్తుల ప్రైవేటీకరణపై తీవ్ర ధ్వజం

ప్రభుత్వ రంగ సంస్థలను ఒక్కొక్కటిగా ప్రైవేట్ వ్యక్తులకు కట్టబెడుతున్నారని పేర్ని నాని ఆరోపించారు. మెడికల్ కాలేజీలు, రాజధాని విద్యుత్ సరఫరా, చివరికి సబ్ రిజిస్ట్రార్ కార్యాలయాల సేవలను కూడా PPP పరిధిలోకి తెస్తూ జీవో 74 జారీ చేశారని విమర్శించారు. జగన్ హయాంలో ప్రభుత్వంలో విలీనం చేసి కాపాడిన ఆర్టీసీని, ఇప్పుడు ఉచిత బస్సు పథకం పేరుతో మళ్లీ అప్పుల ఊబిలోకి నెట్టి 12 డిపోలను ప్రైవేటీకరిస్తున్నారని ఆగ్రహం వ్యక్తం చేశారు.

పాలనపై విమర్శలు.. బీపీసీఎల్ డిమాండ్

ప్రస్తుత ప్రభుత్వం వైబిలిటీ గ్యాప్ ఫండింగ్ పేరుతో ప్రజల పన్నుల సొమ్మును దోచిపెడుతోందని ఆయన అన్నారు. రాష్ట్రంలో ప్రతి పనికీ డబ్బులు చెల్లించాల్సిందేనని, ఇప్పుడు జరుగుతుంది బాబు పాలన కాదని.. లోకేష్, ఆయన అనుచరుల కనుసన్నల్లోనే పాలన సాగుతోందని ఘాటు వ్యాఖ్యలు చేశారు. భయాందోళనల మధ్య ప్రజలు బతికే పరిస్థితులు వచ్చాయని ఆవేదన వ్యక్తం చేశారు.

పేర్ని నాని డిమాండ్

ఇదే సమయంలో, రాష్ట్ర పారిశ్రామిక అభివృద్ధికి కీలకమైన బిపిసిఎల్ (BPCL) ఆయిల్ రిఫైనరీ కంపెనీని మచిలీపట్నంలోనే ఏర్పాటు చేయాలని పేర్ని నాని డిమాండ్ చేశారు. ఇది స్థానిక యువతకు ఉపాధి కల్పించడంతో పాటు ప్రాంతీయ అభివృద్ధికి ఎంతో దోహదపడుతుందని స్పష్టం చేశారు.

Also Read: SIR వివాదం, CEC జ్ఞానేశ్వర్ రాజీనామా డిమాండ్.. మోడీ సర్కార్ నెక్స్ట్ స్టెప్ ఏంటి?

Join WhatsApp Channel

Share

• 
• 
• 
• 
• 
•