Perni Nani: సార్వత్రిక ఎన్నికల వేళ మచిలీపట్నంలో రాజకీయం ఒక్కసారిగా వేడెక్కింది. స్థానిక హిందూ కళాశాలలోని పోలింగ్ కేంద్రంలో మాజీ మంత్రి పేర్ని నాని తన సతీమణితో కలిసి ఓటు హక్కును వినియోగించుకున్నారు. అయితే, ఓటు వేసిన అనంతరం బయటకు వచ్చిన ఆయన, మీడియా ప్రతినిధులతో మాట్లాడుతూ.. ఎన్నికల నిర్వహణ తీరుపై, అధికారుల వైఖరిపై విరుచుకుపడ్డారు.
అధికారుల తీరుపై తీవ్ర ఆగ్రహం
ప్రస్తుత పరిస్థితి చూస్తుంటే ఏపీ డీజీపీ, రాష్ట్ర ఎన్నికల కమిషనర్ ఇద్దరి కంటే ఆనాటి ధృతరాష్ట్రుడే నయమనిపిస్తోందని పేర్ని నాని తీవ్ర వ్యాఖ్యలు చేశారు. కళ్ల ముందే ఎన్నికల్లో అన్యాయాలు, అక్రమాలు జరుగుతున్నా అధికారులు కుర్చీల కోసం నోళ్లు మూసుకుని సైలెంట్‌గా ఉండిపోయారని మండిపడ్డారు. కేవలం ఒక పదవి కోసం ఇంతగా దిగజారాలా అని ఆయన నిలదీశారు.
ప్రజాస్వామ్యాన్ని ముక్కలు చేస్తున్నారు
ఎన్నికల్లో ఇంతగా బరితెగించడం ఎప్పుడూ చూడలేదని, ప్రజాస్వామ్యాన్ని కొందరు ఉన్మాదుల మాదిరి ముక్కలు ముక్కలుగా ఖూనీ చేస్తున్నారని ఆవేదన వ్యక్తం చేశారు. అసలు ఇన్ని అక్రమాల నడుమ ఎన్నికలు నిర్వహించడం ఎందుకని ప్రశ్నించారు. ప్రస్తుతం అంతా బాగుందని అనుకుంటున్నారని, కానీ 2029లో మళ్లీ ఎన్నికల కోడ్ వచ్చాక ప్రతి ఒక్కరికీ అసలు సినిమా చూపిస్తామని హెచ్చరించారు.
నేరగాళ్లతో ఓట్లు వేయిస్తున్నారు
పులివెందులలో బయటి ప్రాంతాల నుంచి నేరగాళ్లను ప్రత్యేకంగా పిలిపించి దొంగ ఓట్లు వేయిస్తున్నారని పేర్ని నాని సంచలన ఆరోపణలు చేశారు. చంద్రబాబు, లోకేష్ ఇద్దరూ కలిసి ఈ దుశ్చర్యకు ఒడిగడుతున్నారని ఆరోపించారు. వీరిద్దరికీ మానసిక రుగ్మత తీవ్రమైందని, తక్షణమే ఆసుపత్రికి తీసుకెళ్లి వైద్యం అందించాల్సిన పరిస్థితి వచ్చిందని ఘాటుగా విమర్శించారు. పేర్ని నాని చేసిన ఈ వ్యాఖ్యలు ఇప్పుడు రాజకీయ వర్గాల్లో తీవ్ర కలకలం రేపుతున్నాయి.
Also Read: హిందూపురంలో సతీమణితో బాలకృష్ణ ప్రత్యక్షం.. ఓటు హక్కుపై కీలక వ్యాఖ్యలు!
Share
లేటెస్ట్ ఫీచర్లతో అదిరిపోయే 32 ఇంచుల టీవీలు..ధర కూడా చాలా తక్కువ
రూ.7 లక్షల నుంచి రూ.1 కోటి వరకు.. నవంబర్‌లో రానున్న కొత్త కార్లు ఇవే!
