Tirumala Gold Donation: కలియుగ ప్రత్యక్ష దైవం తిరుమల శ్రీవేంకటేశ్వరస్వామికి భక్తులు మొక్కుల రూపంలో బంగారం, నగదు సమర్పించడం మనం ఎప్పుడూ చూస్తూనే ఉంటాం. అయితే, ఇప్పుడు ఓ భక్తుడు ఏడుకొండలవాడిపై తనకున్న అపారమైన భక్తిని చాటుకుంటూ ఏకంగా 121 కేజీల బంగారు ఆభరణాలను కానుకగా ఇవ్వడానికి సిద్ధమయ్యాడు. బహిరంగ మార్కెట్లో వీటి విలువ సుమారు రూ. 150 కోట్ల నుండి రూ. 160 కోట్ల వరకు ఉంటుందని అంచనా.
9 సెట్లలో 45 అపురూప ఆభరణాలు
ఈ భారీ విరాళానికి సంబంధించి ఇప్పటికే ఆ భక్తుడు టీటీడీ అధికారులతో సంప్రదింపులు జరిపి, అధికారిక ప్రక్రియలన్నీ పూర్తి చేశాడు. స్వామివారి అలంకరణ కోసం ప్రత్యేకంగా 9 సెట్లుగా ఉండే 45 రకాల స్వర్ణాభరణాలను అత్యంత సుందరంగా తయారు చేయించాడు. తిరుమల ఆలయ చరిత్రలోనే ఒక భక్తుడి నుంచి ఇంత భారీ స్థాయిలో కానుక రావడం ఇదే మొదటిసారని టీటీడీ వర్గాలు చెబుతున్నాయి. నిజంగా ఇదొక ఆల్-టైమ్ రికార్డ్ అనే చెప్పాలి.
ఈ నెల 26న సీఎం సమక్షంలో అప్పగింత
ఈ అపురూప ఘట్టానికి ఈ నెల 26వ తేదీ వేదిక కానుంది. ఆరోజున ఆ భక్తుడు తాను చేయించిన బంగారు ఆభరణాలను తిరుమల సన్నిధిలో టీటీడీకి అందజేయనున్నాడు. మరో విశేషమేమిటంటే.. అదే రోజున ఏపీ ముఖ్యమంత్రి చంద్రబాబు నాయుడు కూడా తిరుమల పర్యటనకు వస్తున్నట్టు సమాచారం. దీంతో సీఎం సమక్షంలోనే ఈ 121 కేజీల బంగారు ఆభరణాలను స్వామివారికి సమర్పించేందుకు ఏర్పాట్లు జరుగుతున్నాయి. భక్తులు ఈ అద్భుత దృశ్యాన్ని చూసేందుకు ఆసక్తిగా ఎదురుచూస్తున్నారు.
Also Read: ఎవరీ రేష్మా డాన్? బ్యూటీషియన్గా పనిచేస్తూ రౌడీయిజం.. చివరికి ఏమైందంటే?