March 2026 EV Scooter Sales: దేశీ ఎలక్ట్రిక్ మార్కెట్ లో స్కూటర్లు సత్తా చాటాయి. మార్చి 2026లో అమ్మకాలు కొత్త రికార్డులను నెలకొల్పాయి. కేంద్రం సబ్సిడీ, ముఖ్యంగా PM E-Drive స్కీమ్ ముగియబోతుందనే కారణంతో చాలా మంది వినియోగదారులు ఈవీ కొనుగోళ్లకు ముందుకు వచ్చారు. అయితే, ప్రభుత్వం ఈ పథకాన్ని జూలై 2026 వరకు పొడిగించడం కూడా మార్కెట్ కు మరింత ఊపునిచ్చింది. ఈ నేపథ్యంలో,పాపులర్ బ్రాండ్లు తమ అమ్మకాలలో గణనీయమైన వృద్ధిని నమోదు చేశాయి.
ఈ నెలలో టాప్ అమ్మకాల బ్రాండ్ల జాబితాలో ఐదవ స్థానంలో ఓలా ఎలక్ట్రిక్ నిలిచింది. కొన్ని నెలలుగా తగ్గిన అమ్మకాలు ఇప్పుడు మళ్లీ పెరిగాయి. ఫిబ్రవరిలో ఒక స్థానం దిగజారిన ఈ కంపెనీ, మార్చిలో 10 వేలకుపైగా యూనిట్లను విక్రయించి తిరిగి 5వ స్థానంలో స్థానం సంపాదించింది. గతేడాదితో పోలిస్తే కొంత తగ్గుదల ఉన్నప్పటికీ, ఆఫర్లు, సబ్సిడీలు అమ్మకాలను మళ్లీ పెంచాయి.
నాలుగో స్థానంలో హీరో మోటోకార్ప్ కు చెందిన విడా బ్రాండ్ నిలిచింది. ఈ బ్రాండ్ తన చరిత్రలోనే అత్యధిక అమ్మకాలను నమోదు చేసింది. గతేడాదితో పోలిస్తే దాదాపు రెట్టింపు వృద్ధి సాధించి 21 వేలకుపైగా యూనిట్లను విక్రయించింది. ప్రత్యేక ఎడిషన్ స్కూటర్లను పరిచయం చేయడం, రిమూవబుల్ బ్యాటరీ టెక్నాలజీ వినియోగదారులను ఆకర్షించాయి.
మూడో స్థానంలో ఏథర్ ఎనర్జీ నిలిచింది. ఈ కంపెనీ గత కొన్నేళ్లుగా స్థిరంగా అమ్మకాలను కొనసాగిస్తోంది. ప్రీమియం క్వాలిటీ, ఆధునిక ఫీచర్లు, విశ్వసనీయత కారణంగా వినియోగదారులలో మంచి పేరు సంపాదించింది. ముఖ్యంగా కుటుంబ వినియోగానికి అనువైన రిజ్టా మోడల్ మంచి ఆదరణ పొందింది. మార్చిలో ఈ కంపెనీ 35 వేలకుపైగా యూనిట్లను అమ్మింది.
రెండో స్థానంలో బజాజ్ చేతక్ ఉంది. పాతకాలపు డిజైన్కు ఆధునిక ఎలక్ట్రిక్ టెక్నాలజీని జోడించిన ఈ స్కూటర్ వినియోగదారులకు బాగా నచ్చుతోంది. మెటల్ బాడీతో వస్తుండటం వల్ల బిల్డ్ క్వాలిటీ కూడా బలంగా ఉంటుంది. మార్చిలో ఈ బ్రాండ్ 46 వేలకుపైగా యూనిట్లను విక్రయించి రికార్డు స్థాయి అమ్మకాలను నమోదు చేసింది.
మొదటి స్థానంలో టీవీఎస్ మోటార్ కంపెనీ నిలిచింది. ఐక్యూబ్, ఇతర మోడళ్ల ద్వారా ఈ కంపెనీ మార్కెట్లో ముందంజలో ఉంది. మార్చి 2026లో దాదాపు 50 వేల యూనిట్ల అమ్మకాలను నమోదు చేసి అగ్రస్థానాన్ని నిలబెట్టుకుంది. బ్యాటరీ సబ్స్క్రిప్షన్ లాంటి కొత్త విధానాలు వినియోగదారులకు కొనుగోలు ఖర్చును తగ్గించాయి.
మొత్తంగా దేశంలో ఎలక్ట్రిక్ స్కూటర్లకు డిమాండ్ భారీగా పెరుగుతోంది. ప్రభుత్వ ప్రోత్సాహకాలు, కంపెనీల కొత్త టెక్నాలజీలు, పోటీ ధరలు ఈ మార్కెట్ను మరింత బలంగా మార్చుతున్నాయి.
Read Also: విన్ ఫాస్ట్ నుంచి క్రేజీ స్కూటర్లు.. టీవీఎస్, ఏథర్కు కష్టాలే!
Share
ఇరాన్ సుప్రీం లీడర్ ముస్తాబా ఖమేనీ మృతి? వారసత్వం తుడిచిపెట్టుకుపోయిందా?
వచ్చేస్తోంది Oppo F33 సిరీస్.. ఫీచర్లు, ధర వివరాలు తెలిస్తే ఇప్పుడే బుక్ చేసేసుకుంటారు!
