SMK నుంచి అదిరిపోయే హెల్మెట్.. స్పెషల్ ఫీచర్లు చూస్తే మతిపోవాల్సిందే!

SMK Ares Helmet Launched: ప్రముఖ హెల్మెట్ తయారీ సంస్థ SMK భారత మార్కెట్లో కొత్త డ్యూయల్ స్పోర్ట్ ఫుల్ ఫేస్ హెల్మెట్‌ ను విడుదల చేసింది. SMK ఏరిస్ పేరుతో వచ్చిన ఈ హెల్మెట్ ధర రూ.6,950 నుంచి ప్రారంభమవుతుంది. రోడ్డు ప్రయాణాలతో పాటు ట్రైల్ రైడింగ్, అడ్వెంచర్ టూరింగ్ చేసే బైక్ రైడర్లను దృష్టిలో పెట్టుకుని దీనిని రూపొందించారు. ఒకే హెల్మెట్‌ తో రోజువారీ ప్రయాణాలు, హైవే రైడింగ్, ఆఫ్ రోడ్ రైడింగ్ చేయాలనుకునేవారికి ఉపయోగపడేలా ప్రత్యేక ఫీచర్లను అందించారు.

మూడు వేరియంట్లలో SMK ఏరిస్

SMK ఏరిస్ హెల్మెట్‌ను మూడు వేరియంట్లలో అందుబాటులోకి తీసుకొచ్చారు. అవి ఏరిస్ సాలిడ్, ఏరిస్ క్లా, ఏరిస్ ఇన్ఫినిటీ. వీటిలో సాలిడ్ వేరియంట్ ధర రూ.6,950గా నిర్ణయించారు. క్లా, ఇన్ఫినిటీ వేరియంట్ల ధర ఒక్కొక్కటి రూ.7,250గా ఉంది. ఈ మూడు వేరియంట్లు ఆరు రంగుల ఎంపికల్లో లభిస్తాయి. గ్లాస్, మ్యాట్ ఫినిషింగ్‌ లను కలిపి మొత్తం 18 రకాల కలర్ కాంబినేషన్లు అందుబాటులో ఉన్నాయి. సైజుల విషయానికి వస్తే XS నుంచి XXL వరకు ఎంపిక చేసుకోవచ్చు. ప్రస్తుతం SMK డీలర్ల దగ్గర అమ్మకాలు ప్రారంభమయ్యాయి. ఆన్‌లైన్ విక్రయాలు త్వరలో ప్రారంభం కానున్నాయి.

డ్యూయల్ స్పోర్ట్ డిజైన్.. స్పెషల్ వైజర్ సిస్టమ్

ఏరిస్ హెల్మెట్‌లో ప్రధాన ఆకర్షణ దాని డ్యూయల్ స్పోర్ట్ డిజైన్. ట్రైల్ రైడింగ్ కోసం ఇందులో తొలగించగలిగే సన్ పీక్‌ను అందించారు. రోడ్డు ప్రయాణాల కోసం సంప్రదాయ ఫుల్ ఫేస్ వైజర్ కూడా ఉంది. అంతేకాకుండా ఎండ తీవ్రత నుంచి కళ్లకు రక్షణ కల్పించేందుకు ఇంటిగ్రేటెడ్ ఇంటర్నల్ సన్ వైజర్‌ను ఇచ్చారు. అవసరాన్ని బట్టి సన్ పీక్‌ను తొలగించుకోవచ్చు. దీంతో నగర ప్రయాణాలు, హైవే టూరింగ్, ట్రైల్ రైడింగ్ లాంటి భిన్న అవసరాలకు ఈ హెల్మెట్‌ ను ఉపయోగించుకోవచ్చు. మెయిన్ వైజర్ గీతలు పడకుండా ఉండేలా రూపొందించారు. ఇందులో వన్ టచ్ క్విక్ రిలీజ్ సిస్టమ్ కూడా ఉంది. విశాలమైన ఫీల్డ్ ఆఫ్ విజన్ ఉండటం వల్ల రైడింగ్ సమయంలో రోడ్డుపై మరింత స్పష్టంగా చూడటానికి సాయపడుతుంది.

భద్రత కోసం మూడు సర్టిఫికేషన్లు

హెల్మెట్ బయటి భాగాన్ని SMKకు చెందిన ఎనర్జీ ఇంపాక్ట్ రెసిస్టెంట్ థర్మోప్లాస్టిక్ (EIRT) మెటీరియల్‌ తో తయారు చేశారు. లోపలి భాగంలో మల్టీ డెన్సిటీ EPS లైనర్‌ను అందించారు. భద్రత పరంగా ECE 22.06, DOT, ISI సర్టిఫికేషన్లు ఉన్నాయి. బరువు విషయానికి వస్తే XS నుంచి M సైజుల వరకు 1,575 గ్రాములు, L నుంచి XXL సైజుల వరకు 1,625 గ్రాముల బరువు ఉంటుంది. అదనపు ఫీచర్లు, డ్యూయల్ స్పోర్ట్ డిజైన్‌ను పరిగణనలోకి తీసుకుంటే ఈ బరువు మామూలుగానే ఉంటుంది.

ధర, ఫీచర్లతో ఆకట్టుకుంటుందా?

రూ.6,950 ప్రారంభ ధరతో వచ్చిన SMK ఏరిస్ హెల్మెట్‌ లో తొలగించగలిగే సన్ పీక్, ఇంటర్నల్ సన్ వైజర్, మల్టీ డెన్సిటీ EPS లైనర్ లాంటి ఫీచర్లు ఉన్నాయి. ముఖ్యంగా ఒకే హెల్మెట్‌ ను రోజువారీ ప్రయాణాలకు, టూరింగ్‌ కు, ట్రైల్ రైడింగ్‌ కు ఉపయోగించాలనుకునే వారికి అనుకూలంగా ఉంటుంది.