టాటా సియెర్రా EV vs సియెర్రా ICE.. రెండింటి మధ్య తేడాలేంటి? ఏది కొంటే బెస్ట్?

Tata Sierra EV vs Sierra ICE: టాటా కార్ లవర్స్ ఎంతో ఆసక్తిగా ఎదురుచూస్తున్న సియెర్రా EVను జూన్ 30న భారత మార్కెట్లో విడుదల కానుంది. ఇప్పటికే కంపెనీ ఈ ఎలక్ట్రిక్ ఎస్‌యూవీ డిజైన్‌ ను అధికారికంగా వెల్లడించింది. సియెర్రా EV.. పెట్రోల్, డీజిల్ ఇంజిన్లతో వచ్చే సియెర్రా ICE మోడల్‌ మాదిరిగానే కనిపించినప్పటికీ, రెండింటి మధ్య కొన్ని కీలకమైన తేడాలు ఉన్నాయి.

⦿ డిజైన్‌లో మార్పులు

రెండు మోడళ్లలో హెడ్‌ ల్యాంప్‌ లు దాదాపు ఒకేలా ఉన్నాయి. సన్నని LED హెడ్‌ లైట్లు, వాటిని కలుపుతూ ఉన్న LED లైట్ బార్ రెండింటిలోనూ కనిపిస్తాయి. అయితే, ముందుభాగంలోని గ్రిల్ మాత్రం భిన్నంగా ఉంటుంది. సియెర్రా EVలో గ్రిల్ పూర్తిగా బాడీ కలర్‌ లో ఉంటుంది. సియెర్రా ICEలో గాలి ప్రవాహం కోసం వెంట్స్ ఉన్న గ్లాస్ బ్లాక్ గ్రిల్‌ ను అందించారు. ముందు బంపర్ డిజైన్‌లో కూడా తేడా ఉంది. ఎలక్ట్రిక్ మోడల్‌ లో హెడ్‌ లైట్ల కింద వరకు గ్లాస్ బ్లాక్ ఫినిష్ కనిపిస్తుంది. కానీ, ICE మోడల్‌లో అదే ప్రాంతంలో బాడీ కలర్ ప్యానెల్ ఉంటుంది. అయితే ఫాగ్ ల్యాంప్స్, స్కిడ్ ప్లేట్ లాంటివి రెండు మోడళ్లలోనూ ఒకేలా ఉన్నాయి.

⦿ సైడ్ ప్రొఫైల్ దాదాపు ఒకేలా!

పక్క నుంచి చూస్తే ఈ రెండు మోడళ్ల మధ్య పెద్దగా తేడా కనిపించదు. సియెర్రా EVలో మాత్రమే ముందు డోర్‌ పై Tata.ev బ్యాడ్జ్ ఉంటుంది. ఫ్లష్ డోర్ హ్యాండిల్స్, ప్రత్యేకమైన వెనుక విండో డిజైన్, అల్లాయ్ వీల్స్, బాడీ క్లాడింగ్ లాంటివి రెండింటిలోనూ ఒకే విధంగా ఉన్నాయి.

⦿ వెనుక భాగంలో చిన్న మార్పులు

వెనుక భాగంలో కూడా రెండు మోడళ్లు దాదాపు ఒకేలా కనిపిస్తాయి. ఎలక్ట్రిక్ మోడల్‌లో Sierra.ev అనే ప్రత్యేక బ్యాడ్జ్ మాత్రమే అదనంగా ఉంటుంది. LED టెయిల్ లైట్ బార్, బంపర్ డిజైన్, రూఫ్ స్పాయిలర్ లాంటి అంశాలు రెండింటిలోనూ ఒకే విధంగా ఉన్నాయి.

⦿ ఇంటీరియర్‌ లో కొత్త టచ్

సియెర్రా EV డాష్‌బోర్డ్‌ ను టాటా ఇంకా పూర్తిగా చూపించలేదు. అయితే, సియెర్రా ICE మోడల్‌ ను పోలి ఉండే అవకాశం ఉంది. ఇందులో 10.25 అంగుళాల డిజిటల్ డ్రైవర్ డిస్‌ ప్లే, 12.3 అంగుళాల టచ్‌ స్క్రీన్ ఇన్ఫోటైన్‌ మెంట్ సిస్టమ్, మరో 12.3 అంగుళాల ఫ్రంట్ ప్యాసింజర్ డిస్‌ ప్లే ఉండనుంది. ఎలక్ట్రిక్ వెర్షన్‌ లో కొత్త క్యాబిన్ కలర్ థీమ్, ప్రత్యేకమైన సీట్ల డిజైన్, కొత్త స్టీరింగ్ వీల్ వంటి మార్పులు ఉండొచ్చు. అలాగే వెహికల్ టు వెహికల్, వెహికల్ టు లోడ్ లాంటి ప్రత్యేక ఎలక్ట్రిక్ ఫీచర్లు కూడా అందుబాటులోకి రావచ్చు.

⦿ బ్యాటరీ, పవర్‌ ట్రెయిన్

సియెర్రా EV టాటా యొక్క acti.ev+ ప్లాట్‌ ఫారమ్‌ పై రూపొందించబడింది. ఇదే ప్లాట్‌ ఫారమ్ హారియర్ EVలో కూడా ఉపయోగించారు. కంపెనీ ఇంకా పూర్తి సాంకేతిక వివరాలను వెల్లడించనప్పటికీ, ఈ ఎస్‌యూవీ ఆల్ వీల్ డ్రైవ్ వెర్షన్‌ లో కూడా అందుబాటులో ఉంటుందని ప్రకటించింది. తక్కువ ధర కలిగిన వేరియంట్లలో రియర్ వీల్ డ్రైవ్ ఎంపిక కూడా ఉండే అవకాశం ఉంది. హారియర్ EV మాదిరిగానే ఇందులో 65kWh, 75kWh బ్యాటరీ ఆప్షన్స్ ఉండనున్నాయి.

⦿ ధర ఎంత ఉండొచ్చు?

ప్రస్తుతం సియెర్రా ICE ధర రూ.11.49 లక్షల నుంచి రూ.21.29 లక్షల మధ్య ఉంది. ఎలక్ట్రిక్ వెర్షన్ ధర దీనికంటే ఎక్కువగా ఉండే అవకాశం ఉంది. అయితే, వినియోగదారులను ఆకర్షించేందుకు టాటా బ్యాటరీ యాజ్ ఏ సర్వీస్ (BaaS) స్కీమ్ ను కూడా అందించే అవకాశాలు ఉన్నాయి. డిజైన్ పరంగా రెండు మోడళ్లు ఒకేలా కనిపించినా, టెక్నాలజీ, పవర్‌ట్రెయిన్, ప్రత్యేక ఫీచర్ల పరంగా సియెర్రా EV పూర్తిగా కొత్త అనుభూతిని అందించనుంది.