భారీ పెరిగిన పాల ధరలు.. అయినా నో టెన్షన్.. తక్కువ ఖర్చుతో పోషకాలు ఇచ్చే 7 ఫుడ్స్ ఇవిగో

Foods With Milk Nutrients | రోజూ పాలు తాగడం ఆరోగ్యానికి మంచిదని చాలామంది భావిస్తారు. ఎముకలు బలంగా ఉండటానికి, కండరాలు ఆరోగ్యంగా ఉండటానికి పాలు సహాయపడతాయి. అయితే ఇటీవల పాల ధరలు పెరుగుతుండటంతో సామాన్య కుటుంబాలపై ఖర్చుల భారం పెరుగుతోంది. మరి పాలు కొనలేకపోతే శరీరానికి అవసరమైన కాల్షియం, ప్రోటీన్ ఎలా అందుతాయి? దీనికోసం ఖరీదైన ఆహారాలే కొనాల్సిన అవసరం లేదు. మన ఇంట్లోనే సులభంగా లభించే ఆహారంతో అవే పోషకాలు పొందవచ్చు.

1. పెరుగులో కాల్షియం, ప్రోటీన్

పాలకు మంచి ప్రత్యామ్నాయం పెరుగు. ఇందులో కాల్షియం, ప్రోటీన్ ఉంటాయి. ఇవి ఎముకలు, కండరాల ఆరోగ్యానికి ఉపయోగపడతాయి. ఉదయం టిఫిన్ సమయంలో లేదా మధ్యాహ్న భోజనంలో పెరుగు తీసుకోవచ్చు. అలాగే మజ్జిగ రూపంలోనూ తాగవచ్చు. కొందరికి పాలతో పోలిస్తే పెరుగు సులభంగా జీర్ణమవుతుంది. చక్కెర కలిపిన పెరుగుకు బదులుగా సాధారణ పెరుగు ఎంచుకోవడం మంచిది.

2. శరీరానికి మంచి ప్రోటీన్ అందించే సోయాబీన్స్

సోయాబీన్స్‌లో ప్రోటీన్‌తో పాటు ఇతర పోషకాలు కూడా ఉంటాయి. వీటిని రాత్రంతా నానబెట్టి, మరుసటి రోజు బాగా ఉడికించి తినవచ్చు. కూరల్లో కూడా కలుపుకోవచ్చు. సోయా పాలు కూడా మరో ప్రత్యామ్నాయం. అయితే ప్యాకెట్ సోయా పాలు కొనేటప్పుడు వాటిపై ఉండే పోషక వివరాలు చూడాలి. కాల్షియం, విటమిన్ డి కలిపిన ఉత్పత్తులను ఎంచుకోవడం మంచిది.

3. ఫుల్ ప్రొటీన్ కోసం శనగలు, పప్పులు, వేరుశెనగలు

నల్ల శనగలు.. రాత్రంతా నానబెట్టి ఉదయం ఉడికించి తినవచ్చు. పెసరపప్పు, మసూర్ పప్పు, కందిపప్పు వంటి వాటిలోనూ ప్రోటీన్ లభిస్తుంది. వీటిని రోజువారీ భోజనంలో చేర్చుకోవడం సులభం. వేరుశెనగలు తక్కువ ధరలో లభించే మంచి ఆహారం. వీటిలో ప్రోటీన్‌తో పాటు ఆరోగ్యకరమైన కొవ్వులు కూడా ఉంటాయి. వేయించి లేదా పచ్చడిగా చేసుకుని తినండి.

4. నువ్వుల్లో కాల్షియం పుష్కలం

నువ్వుల్లో కాల్షియం అధికంగా ఉంటుంది. వీటిని లడ్డూలు, పచ్చళ్లు, కూరల్లో చేర్చుకోవచ్చు. అయితే నువ్వుల్లో కొవ్వులు కూడా ఉంటాయి కాబట్టి తగిన పరిమాణంలోనే తీసుకోవాలి.

Also Read: ఇల్లు, పెళ్లి, కారు.. మీ సంపాదనతో ముందుగా దేనికి ఖర్చు చేయాలి?

5. ఎముకల ఆరోగ్యానికి రాగులు

రాగుల్లో కాల్షియం, పీచు పదార్థాలు ఉంటాయి. వీటితో రొట్టెలు, దోసెలు, జావ తయారు చేసుకోవచ్చు. రాగులను ఇతర ప్రోటీన్ ఆహారాలతో కలిపి తీసుకుంటే పోషక సమతుల్యతకు సహాయపడుతుంది.

Also Read: గాలి కాలుష్యంతో రక్తంలో షుగర్ పెరిగే ప్రమాదం.. బెడ్ రూంలో ఇలా చేయండి చాలు

పాలు మాత్రమే పోషకాలకు ఏకైక మార్గం కాదు

కాల్షియం, ప్రోటీన్ కోసం పాలు మాత్రమే తీసుకోవాల్సిన అవసరం లేదు. వివిధ ఆహార పదార్థాలను కలిపి తీసుకోవడం ద్వారా పోషకాలను పొందవచ్చు. అయితే ఈ ఆహారాలన్నీ పాలలోని పోషకాలకు పూర్తిగా సమానమైనవి కావు. మీ ఆరోగ్య అవసరాలకు అనుగుణంగా ఆహారాన్ని ఎంచుకోవడానికి పోషకాహార నిపుణుడి సలహా తీసుకోవడం మంచిది.