ఇన్నోవా క్రిస్టా ధరలు పెరిగాయి.. ఏ వేరియంట్‌పై ఎంతంటే?

Toyota Innova Crysta Price Hike: టయోటా ఇన్నోవా క్రిస్టా కొనాలని ప్లాన్ చేస్తున్న వారికి షాకింగ్ న్యూస్. ప్రముఖ కార్ల తయారీ సంస్థ టయోటా కిర్లోస్కర్ మోటార్ (TKM) ఇన్నోవా క్రిస్టా ధరలను పెంచింది. కొత్త ధరలు తక్షణమే అమల్లోకి వచ్చాయి. వేరియంట్‌ను బట్టి ఈ MPV ధరలు రూ.22,000 నుంచి రూ.33,000 వరకు పెరిగాయి. ఇప్పటికే ఈ ఏడాది పలు కార్ల కంపెనీలు ధరలను సవరించగా, తాజాగా టయోటా కూడా ఈ లిస్టులో చేరింది.

ఇన్నోవా క్రిస్టా ZX, VX వేరియంట్ల ధరలు ఎంత పెరిగాయి?

టయోటా ఇన్నోవా క్రిస్టాలోని టాప్ వేరియంట్లలో ZX MT 7 సీటర్ ధర రూ.33,000 పెరిగింది. ప్లాటినం వైట్ పెర్ల్ కలర్ ఆప్షన్‌కు కూడా ఇదే స్థాయిలో ధర పెంపు వర్తిస్తుంది. మరోవైపు VX MT 7 సీటర్, VX MT 8 సీటర్ వేరియంట్ల ధరలు రూ.31,000 చొప్పున పెరిగాయి. ప్లాటినం వైట్ పెర్ల్ కలర్‌లో లభించే ఈ వేరియంట్లకు కూడా కొత్త ధరలు వర్తిస్తాయి.

GX+ వేరియంట్లపై కూడా ధరల భారం

ఇన్నోవా క్రిస్టా GX+ MT 8 సీటర్ వేరియంట్ల ధరల్లో రూ.33,000 పెంపు నమోదైంది. ప్లాటినం వైట్ పెర్ల్ కలర్ వేరియంట్‌కు కూడా ఇదే ధరల మార్పు వర్తిస్తుంది. ఇక GX+ మోడల్‌లోని ఇతర సీటింగ్ ఆప్షన్ల విషయానికి వస్తే, 7 సీటర్ వేరియంట్లపై రూ.27,000, 6 సీటర్ వేరియంట్లపై రూ.26,000 చొప్పున ధరలు పెరిగాయి.

GX వేరియంట్ల ధరలు కూడా పెంపు

టయోటా ఇన్నోవా క్రిస్టా ఎంట్రీ లెవల్ GX వేరియంట్లను కూడా ధరల పెంపు నుంచి మినహాయించలేదు. GX MT 7 సీటర్, 8 సీటర్ వేరియంట్లలో ఎంపిక చేసిన మోడళ్ల ధరలు రూ.23,000 వరకు పెరిగాయి. మిగిలిన సంబంధిత GX వేరియంట్లపై రూ.22,000 చొప్పున పెంపు నమోదైంది.

ఇప్పుడు ఇన్నోవా క్రిస్టా ధర ఎంత?

తాజా ధరల పెంపు తర్వాత టయోటా ఇన్నోవా క్రిస్టా ఎక్స్‌ షోరూమ్ ధరలు రూ.19.95 లక్షల నుంచి రూ.27.10 లక్షల వరకు ఉన్నాయి. అంటే, కారు కొనుగోలు చేయాలనుకునే వారు గతంతో పోలిస్తే అదనంగా డబ్బు చెల్లించాల్సి ఉంటుంది.

టయోటా ఈ ఏడాది జూన్‌లో MY26 వెర్షన్‌ను పరిచయం చేస్తూ ఇన్నోవా క్రిస్టాకు అప్‌డేట్ ఇచ్చింది. ఇప్పుడు తాజాగా ధరలను పెంచడం ద్వారా ఈ MPV కొనుగోలుదారులపై అదనపు భారం పడనుంది. వేరియంట్‌ను బట్టి ధరలు మారుతున్నందున కొనుగోలు చేసే ముందు సమీప టయోటా డీలర్‌ షిప్‌ లో తాజా ధరలను తెలుసుకోవడం మంచిది.