WhatsApp Message Text Actions: వాట్సప్‌లో రోజూ ఎన్నో వివరాలు మెసేజ్‌ల రూపంలో వస్తుంటాయి. ఫోన్ నంబర్లు, ఈమెయిల్ అడ్రస్‌లు, మీటింగ్ తేదీలు, లొకేషన్లు వంటి సమాచారాన్ని చూసినప్పుడు వాటిని కాపీ చేసి మరో యాప్‌లో తెరవాల్సి వస్తుంది. ఈ పనిని సులభం చేసేందుకు వాట్సప్ Message Text Actions అనే కొత్త ఫీచర్‌ను తీసుకొస్తోంది. దీని వల్ల చాట్‌లో ఉన్న వివరాల నుంచే అవసరమైన పనులను నేరుగా చేయొచ్చు. ప్రస్తుతం ఈ ఫీచర్ కొంతమంది ఆండ్రాయిడ్, ఐఫోన్ యూజర్లకు అందుతోంది. అందరికీ చేరడానికి మరికొంత సమయం పట్టొచ్చు.
ఈ ఫీచర్ అందుబాటులోకి వచ్చిన తర్వాత.. వాట్సప్ గుర్తించిన కొన్ని వివరాల కింద చుక్కల గీత కనిపిస్తుంది. ఆ పదం లేదా వివరంపై ట్యాప్ చేస్తే, దానికి సంబంధించిన పనుల జాబితా ఓపెన్ అవుతుంది. ఈ సదుపాయం ఇతరులు పంపిన మెసేజ్‌లకే కాదు, మనం పంపిన మెసేజ్‌లలోని వివరాలకూ పనిచేస్తుంది. అయితే ఈ సూచనలను ఉపయోగించాలనే తప్పనిసరి లేదు. అవసరం లేకపోతే వాటిని అలాగే వదిలేయొచ్చు.
మెసేజ్‌లో ఫోన్ నంబర్ ఉంటే దాన్ని కాపీ చేయడం, కొత్త కాంటాక్ట్‌గా సేవ్ చేయడం లేదా నేరుగా కాల్ చేయడం వంటి ఆప్షన్లు కనిపిస్తాయి. తేదీ లేదా అపాయింట్‌మెంట్ వివరాలు ఉంటే ఫోన్ క్యాలెండర్‌లో ఈవెంట్‌ను క్రియేట్ చేసుకోవచ్చు. దీంతో మీటింగ్ సమయాలు, రోజులు మర్చిపోయే అవకాశం తగ్గుతుంది. ఏదైనా అడ్రస్‌ను పంపితే, దాన్ని మ్యాప్స్‌లో ఓపెన్ చేసి అక్కడికి వెళ్లే దారి చూసుకోవచ్చు. ఈమెయిల్ అడ్రస్‌పై ట్యాప్ చేస్తే ఫోన్‌లో ఉన్న డిఫాల్ట్ మెయిల్ యాప్ తెరుచుకుంటుంది.
Also Read: ఫిట్‌నెస్ బ్యాండ్‌లో ఏఐ వాయిస్ రికార్డింగ్.. Pebble Qore Voxలో ఉన్న టాప్ ఫీచర్లు ఇవే!
ఈ వివరాలను గుర్తించే పని ఫోన్‌లోనే జరుగుతుందని WABetaInfo తెలిపింది. దీనికోసం వాట్సప్ ప్యాటర్న్-మ్యాచింగ్ టెక్నాలజీని ఉపయోగిస్తుందని సమాచారం. అంటే మెసేజ్‌లోని వివరాలను గుర్తించడానికి వాటిని కంపెనీ సర్వర్లకు పంపాల్సిన అవసరం ఉండదు. ఈ కొత్త ఫీచర్ వల్ల వాట్సప్‌లోని ఎండ్-టు-ఎండ్ ఎన్‌క్రిప్షన్‌లో ఎలాంటి మార్పు ఉండదని చెబుతున్నారు. అయినప్పటికీ.. యూజర్లు తమ యాప్‌ను తాజా వెర్షన్‌కు అప్‌డేట్ చేసుకోవడం మంచిది.
ఈ Message Text Actions ఫీచర్ ప్రస్తుతం ఎంపిక చేసిన ఆండ్రాయిడ్, ఐఓఎస్ యూజర్లకు మాత్రమే కనిపిస్తోంది. వాట్సప్ దీన్ని దశలవారీగా విడుదల చేస్తోంది. కాబట్టి.. తాజా వెర్షన్ ఇన్‌స్టాల్ చేసినా వెంటనే మీ ఫోన్‌లో కనిపించకపోవచ్చు. కొంత సమయం తర్వాత అందుబాటులోకి వచ్చే అవకాశం ఉంది. ఈ ఫీచర్ పూర్తిగా అందిన తర్వాత, చాట్‌లో షేర్ అయ్యే వివరాలను ఉపయోగించడం మరింత సులభం అవుతుంది. ముఖ్యంగా కుటుంబ సభ్యులు, స్నేహితులు లేదా ఆఫీస్ గ్రూపుల్లో చిరునామాలు, ఫోన్ నంబర్లు, మీటింగ్ వివరాలు తరచూ షేర్ చేసుకునేవారికి ఇది ఉపయోగపడుతుంది.
Also Read: జీమెయిల్, ఫొటోస్, యూట్యూబ్ ఆధారంగా రోజూ కొత్త కథలు.. Dreambeans ఏఐ యాప్ ఎలా పనిచేస్తుందంటే?
Share
మారుతి డిజైర్కు అదిరిపోయే క్రేజ్.. 35 లక్షల యూనిట్ల తయారీ పూర్తి!
మురసు తుఫాన్ ఎఫెక్ట్.. ఏపీలో పలు రైళ్లు రద్దు, మరికొన్ని దారి మళ్లింపు
