పంట పొలాలకే కాదు.. మీ జేబుకూ చిల్లు! ఎల్‌నినో తెస్తున్న ఆర్థిక సంక్షోభం

El Niño Impact: పసిఫిక్‌లో వేడి పెరుగుతోంది… ఎల్‌నినో బలపడుతోంది. 2026 చివరి నాటికి ఇది మరింత బలపడొచ్చని అంచనాలు చెబుతున్నాయి. సముద్రం అడుగున భారీగా పేరుకుపోయిన వేడి నీరు పైకి వస్తే… ఎల్‌నినో మరింత తీవ్రం కావచ్చు. అయితే ఇది ఎంత బలంగా మారుతుందన్నదానిపై ఇంకా పూర్తి క్లారిటీ లేదు.

పసిఫిక్‌లో మొదలైన వేడి..

ఎల్‌నినో అంటే పసిఫిక్‌లో వేడి పెరగడమే కాదు.. ప్రపంచ వాతావరణం మారడం. వర్షాలు.. ఉష్ణోగ్రతలు.. గాలుల దిశ.. అన్నింటిపైనా ప్రభావం పడొచ్చు. భారత్‌లో అయితే దీని ప్రభావం రుతుపవనాలపై పడే అవకాశం ఉంది. ఎల్‌నినో బలపడే కొద్దీ సాధారణంగా వర్షాలు తగ్గే అవకాశాలు పెరుగుతాయి. అయితే ప్రతి ఎల్‌నినో ఏడాది ఒకేలా ఉండదు.

వర్షాలు తగ్గుతాయి.. ధరలు పెరుగుతాయి

వర్షాలు తగ్గితే.. మొదటి రైతుకే ఎఫెక్ట్‌ . పంట దిగుబడి తగ్గొచ్చు.. సరఫరా తగ్గితే ధరలు పెరగొచ్చు. నీటి నిల్వలపై ఒత్తిడి పెరగొచ్చు. అంటే ఎల్‌నినో ప్రభావం.. పొలం నుంచి మార్కెట్‌ వరకు ఉండొచ్చు. ఇప్పటికే ఎల్‌నినో పరిస్థితులు బలపడుతున్నాయని IMD చెబుతోంది. మరోవైపు ఇతర సంస్థల అంచనాల ప్రకారం అక్టోబర్‌ నుంచి డిసెంబర్‌ మధ్య వెరీ స్ట్రాంగ్ ఎల్‌నినో వచ్చే అవకాశం 81 శాతం ఉంది. ఇది 1950 తర్వాత నమోదైన అత్యంత బలమైన ఎల్‌నినోల్లో ఒకటిగా నిలిచే అవకాశం ఉందని అంచనా.

ఎల్‌నినో పాకేది ఎక్కడిదాకా?

ఎల్‌నినో ప్రభావం వ్యవసాయంతో ఆగిపోదు. నీటి కొరత పెరిగితే.. విద్యుత్ ఉత్పత్తి, పరిశ్రమలు, రవాణా, సరఫరా వ్యవస్థలపైనా ప్రభావం పడొచ్చు. అందుకే శాస్త్రవేత్తలు ఎల్‌నినోను కేవలం వాతావరణ సమస్యగా కాదు.. ఆర్థిక ముప్పుగానూ చూస్తున్నారు.

Also Read: జీవన్ రెడ్డి సీన్ రిపీట్ కానుందా? హస్తం పార్టీకి సీనియర్ల తిరుగుబాటు సెగ!