Amitabh Bachchan: షారుఖ్ ఖాన్‌ను వెనక్కి నెట్టిన అమితాబ్ బచ్చన్..ఎలాగో తెలుసా

Amitabh Bachchan: బాలీవుడ్ సీనియర్ హీరో అమితాబ్ బచ్చన్ మరోసారి వార్తల్లో నిలిచారు. 82 ఏళ్ల వయస్సులో కూడా ఆయన భారతదేశంలో అత్యధిక పన్ను చెల్లించే సెలబ్రిటీగా నిలిచారు. ఈ క్రమంలో అమితాబ్ 2024-25 ఆర్థిక సంవత్సరంలో షారుఖ్ ఖాన్‌ను వెనక్కి నెట్టి అత్యధిక ఆదాయం సంపాదించి, అత్యధిక పన్ను చెల్లించారు. ఓ నివేదిక ప్రకారం, అమితాబ్ బచ్చన్ ఈ ఆర్థిక సంవత్సరంలో రూ. 350 కోట్ల ఆదాయాన్ని నమోదు చేశారు. ఈ ఆదాయంపై ఆయన చెల్లించిన పన్ను మొత్తం రూ. 120 కోట్లు.

గత ఏడాది కంటే..
అమితాబ్ బచ్చన్ తన ఆదాయాన్ని పన్ను రూపంలో అధిక మొత్తంలో చెల్లించడం ఇప్పుడేమి కొత్త విషయం కాదు. గత ఆర్థిక సంవత్సరంలో (2023-24) కూడా ఆయన రూ. 71 కోట్లు పన్ను చెల్లించారు. అయితే, ఈసారి ఆయన చెల్లించిన పన్ను 69% పెరగడం విశేషం. మార్చి 15, 2025న అమితాబ్ తన చివరి వాయిదాగా రూ. 52.50 కోట్ల ముందస్తు పన్ను చెల్లించారు. ఇది భారతీయ సినీ పరిశ్రమలో అత్యంత అధిక మొత్తం కావడం విశేషం.

ఆదాయ వనరులు
అమితాబ్ బచ్చన్ బాలీవుడ్‌లో 6 దశాబ్దాలకు పైగా అగ్రస్థానంలో కొనసాగుతున్నారు. ఇటీవల విడుదలైన ‘కల్కి 2898 AD’ చిత్రం మంచి విజయం సాధించింది. త్వరలో ‘కల్కి 2’ షూటింగ్ ప్రారంభించబోతున్నారని సమాచారం. దీంతోపాటు బిగ్ బీ మరికొన్ని బాలీవుడ్ చిత్రాల్లో కూడా నటిస్తున్నారు.

బ్రాండ్ ఎండార్స్‌మెంట్‌లు
అమితాబ్ బచ్చన్ ఇప్పటికీ అత్యధిక డిమాండ్ ఉన్న నటుడు. ప్రముఖ బ్రాండ్‌లు, లగ్జరీ ఉత్పత్తులు, ఆరోగ్యపరమైన ఉత్పత్తులు, బ్యాంకింగ్ సేవల వంటి విభాగాల్లో అమితాబ్ ప్రచారకర్తగా వ్యవహరిస్తున్నారు. ఓ నివేదిక ప్రకారం, అమితాబ్ ఒక్కో బ్రాండ్ ఎండార్స్‌మెంట్‌కు రూ. 5 నుంచి రూ. 10 కోట్లు వసూలు చేస్తున్నట్లు సమాచారం.

కౌన్ బనేగా కరోడ్‌పతి (KBC)
అమితాబ్ నిర్వహిస్తున్న ‘కౌన్ బనేగా కరోడ్‌పతి’ షో ప్రజాదరణ ఎంతగా ఉందో ప్రత్యేకంగా చెప్పాల్సిన పనిలేదు. గత 20 ఏళ్లుగా అమితాబ్ ఈ షోకు హోస్ట్ గా నిర్వహిస్తున్నారు. ఈ షో ద్వారా ఆయన సంవత్సరానికి రూ. 30-40 కోట్ల వరకు సంపాదిస్తున్నారని తెలుస్తోంది.

ఆస్తుల విక్రయం
అమితాబ్ బచ్చన్ ఆదాయంలో మరో కీలక భాగం ఆస్తుల విక్రయం. ఈ సంవత్సరం ప్రారంభంలో అమితాబ్ ముంబైలోని ఓషివారాలో ఉన్న క్రిస్టల్ గ్రూప్ రెసిడెన్షియల్ ప్రాజెక్ట్ అట్లాంటిస్లో తన డ్యూప్లెక్స్ అపార్ట్‌మెంట్‌ను రూ. 83 కోట్లకు విక్రయించారు. ఇది 1.55 ఎకరాల విస్తీర్ణంలో ఉంది. ఈ అపార్ట్‌మెంట్‌లో 4, 5, 6 BHK ఫ్లాట్‌లు ఉన్నాయి.

అమితాబ్ విజయ రహస్యం
అమితాబ్ బచ్చన్ 82 ఏళ్ల వయస్సులో కూడా మంచి డిమాండ్‌ ఉన్న నటులలో ఒకరు కావడం విశేషం. 6 దశాబ్దాలుగా సినీ పరిశ్రమలో కొనసాగుతున్న ఆయన, ఇప్పటికీ ప్రతి ప్రాజెక్ట్‌ను అత్యంత నిబద్ధతతో చేస్తారు. అందుకే అమితాబ్ అంటేనే బ్రాండ్ వాల్యూ. ఈ క్రమంలో ఆయనతో చేయాలని అనేక కంపెనీల బ్రాండ్లు, సినీ ప్రముఖులు ఆసక్తి చూపిస్తారు. అమితాబ్ సినీ ప్రస్థానం 1969లో ‘సాత్ హిందుస్తానీ’ చిత్రంతో ప్రారంభమైంది. ‘జంజీర్’, ‘డాన్’ లాంటి సినిమాలతో ఆయన సూపర్‌స్టార్‌గా మారారు.