యుపిఐ ఎండిఆర్ తప్పుడు నిర్ణయం, మళ్లీ క్యాష్ వైపు దేశం.. మాజీ నీతి ఆయోగ్ చీఫ్ వార్నింగ్

UPI MDR Niti Aayog| యుపిఐతో చెల్లింపు చేయడం ఇప్పుడు చాలా మందికి రోజువారీ అలవాటుగా మారిపోయింది. కానీ రూ.2,000 దాటిన లావాదేవీలపై అదనపు ఖర్చులు వస్తే పరిస్థితి మారుతుందా? వ్యాపారులపై MDR భారం పెరిగితే కొందరు పెద్ద మొత్తాల చెల్లింపులకు నగదును ప్రోత్సహించే అవకాశం ఉందని మాజీ నీతి ఆయోగ్ వైస్ చైర్మన్ రాజీవ్ కుమార్ హెచ్చరించారు.

రూ.2,000 దాటిన యుపిఐ చెల్లింపులు ఎందుకు కీలకంగా మారాయి?

రాజీవ్ కుమార్ ప్రకారం.. యుపిఐ లావాదేవీలలో సంఖ్య పరంగా 96 శాతం.. రూ.2,000 కంటే తక్కువగా ఉన్నాయి. అయితే విలువ పరంగా రూ.2,000 కంటే ఎక్కువ లావాదేవీలు 66 శాతం ఉన్నాయి. అంటే సంఖ్య తక్కువగా ఉన్నప్పటికీ, పెద్ద మొత్తాల చెల్లింపులు UPI వ్యవస్థలో కీలక పాత్ర పోషిస్తున్నాయి. వీటిలో పెట్రోల్ బిల్స్ మంచి ఉదాహరణ. లీటర్ పెట్రోల్ ధర సుమారు రూ.100 ఉంటే.. కొద్దిపాటి లీటర్లకే బిల్లు రూ.2,000 దాటేస్తుంది. అలాంటి చెల్లింపులపై వ్యాపారులకు MDR వర్తిస్తే, వారు ఆ భారాన్ని తప్పించుకునేందుకు నగదు చెల్లింపులను ప్రోత్సహించే అవకాశం ఉందని కుమార్ పేర్కొన్నారు.

పెట్రోల్ పంప్స్ యజమాన్యాల నుంచి తీవ్ర వ్యతిరేకత

ఢిల్లీ, మధ్యప్రదేశ్‌లోని పెట్రోల్ బంక్ డీలర్లు రూ.2,000కు మించిన UPI చెల్లింపులపై MDRకు వ్యతిరేకత వ్యక్తం చేసినట్లు సమాచారం. వినియోగదారులకు UPI సౌకర్యంగా ఉన్నప్పటికీ, అదనపు ఖర్చు పెరిగితే వ్యాపారులు యుపిఐ బహిష్కరిస్తామని హెచ్చరిస్తున్నారు. దీంతో పెద్ద మొత్తాల చెల్లింపుల్లో డిజిటల్ పేమెంట్ల వినియోగం తగ్గే అవకాశం ఉందనే చర్చ మొదలైంది.

డిజిటల్ చెల్లింపుల అలవాటు మరింత బలపడాలి

యుపిఐ ఎండీఆర్ వర్తింపచేయడం ప్రస్తుతం సరికాదని, డిజిటల్ చెల్లింపులు మరింత విస్తరించిన తర్వాతే అదనపు ఖర్చులపై మార్పులు చేయాలని రాజీవ్ కుమార్ అభిప్రాయపడ్డారు. దేశంలో నగదు వినియోగం ఇప్పటికీ పూర్తిగా తగ్గిపోలేదని ఆయన పేర్కొన్నారు. డీమానిటైజేషన్ తర్వాత నగదు వినియోగం భారీగా తగ్గుతుందని అంచనాలు ఉన్నప్పటికీ, ఆ పరిస్థితి పూర్తిగా కనిపించలేదని ఆయన అన్నారు. రూ.2,000కు పైబడిన లావాదేవీలు మొత్తం చెల్లింపు విలువలో సగం కంటే తక్కువగా మారితే డిజిటల్ చెల్లింపుల అలవాటు మరింత బలపడినట్లు భావించాలని ఆయన సూచించారు.

యుపిఐ నిర్వహణ, మౌలిక వసతుల ఖర్చు

UPI మౌలిక వసతుల కోసం సుమారు రూ.20,000 కోట్ల వ్యయం జరిగిందని రాజీవ్ కుమార్ పేర్కొన్నారు. 2024 – 25లో కేంద్ర, రాష్ట్ర ప్రభుత్వాల మొత్తం వ్యయం రూ.93 లక్షల కోట్లతో పోలిస్తే ఈ మొత్తం తక్కువేనని ఆయన వివరించారు. ఆయన అభిప్రాయం ప్రకారం.. UPI కేవలం చెల్లింపుల సాధనం కాదు. ఇది విస్తృత ఆర్థిక ప్రయోజనాలు అందించే ప్రజా మౌలిక వసతిగా పనిచేస్తోంది.
UPI వల్ల నగదు వినియోగం తగ్గడంతో పాటు లావాదేవీల రికార్డు కూడా పెరుగుతుంది.

Also Read: ఈ రోజు రూ.50,000 బంగారంలో పెట్టుబడి పెడితే 10 ఏళ్ల తరువాత ఎంత వస్తుంది?

డిజిటల్ చెల్లింపులు.. లావాదేవీలకు స్పష్టమైన ఆధారం

యుపిఐ లాంటి డిజిటల్ పేమెంట్స్, ఆర్థిక వ్యవస్థలో పారదర్శకత, జవాబుదారీతనాన్ని పెంచేందుకు సహాయపడవచ్చు. అందుకే యుపిఐ పై తీసుకునే నిర్ణయాలు కేవలం MDR ఎవరు చెల్లించాలనే అంశానికి పరిమితం కావడం లేదని ఈ చర్చ సూచిస్తోంది.

MDR విషయంలో వ్యాపారుల స్పందనే కీలకం

MDR వల్ల వ్యాపారుల ఖర్చులు పెరిగితే, కొందరు పెద్ద మొత్తాల చెల్లింపులకు నగదును ప్రోత్సహించే అవకాశం ఉంది. అదే జరిగితే డిజిటల్ చెల్లింపుల అలవాటుపై ప్రభావం పడుతుంది. అందుకే UPI మౌలిక వసతుల ఖర్చులు, వ్యాపారుల ప్రయోజనాలు, డిజిటల్ చెల్లింపుల విస్తరణ మధ్య సమతుల్యత ఎలా సాధించాలనే అంశం కీలకంగా మారింది.