Digital Arrest Fraud: డిజిటల్ అరెస్టు పేరుతో సైబర్ మోసం.. భయంతో మహిళా డాక్టర్ మృతి..

Digital Arrest Fraud: హైదరాబాద్‌లో మరోసారి సైబర్ మోసం ఓ నిండు ప్రాణాన్ని బలి తీసుకుంది. డిజిటల్ అరెస్టు పేరుతో ఓ రిటైర్డ్ మహిళా డాక్టర్ (75)ను సైబర్ కేటుగాళ్లు టార్గెట్ చేసి మోసం చేశారు. మోసగాళ్ల బెదిరింపులు, వేధింపులు తాళలేక ఆ వృద్ధురాలు గుండెపోటుతో మరణించింది.

ఎలా జరిగింది?

సైబర్ నేరగాళ్లు రిటైర్డ్ డాక్టర్‌కు వీడియో కాల్ చేశారు. ఆ వీడియో కాల్‌లో పోలీసుల వేషధారణలో కనిపిస్తూ ఆమెపై మనీలాండరింగ్, డ్రగ్స్ సరఫరా కేసులు నమోదయ్యాయని చెప్పారు. వెంటనే అరెస్టు చేస్తామంటూ భయపెట్టారు. భయంతో వృద్ధురాలు కంగారుపడి, కేటుగాళ్లు చెప్పిన విధంగానే డబ్బులు చెల్లించేందుకు ఒప్పుకున్నారు.

మొదట 6.5 లక్షల రూపాయలు నిందితులు చెప్పిన బ్యాంక్ ఖాతాల్లోకి ట్రాన్స్ఫర్ చేశారు. కానీ అక్కడితో ఆగకుండా మరిన్ని డబ్బులు డిమాండ్ చేశారు. ఇదే సమయంలో మానసిక ఒత్తిడిని తట్టుకోలేక ఆ వృద్ధురాలు గుండెపోటుకు గురయ్యారు. వెంటనే ఆసుపత్రికి తరలించినా ప్రాణాలు నిలువలేదు.

కుటుంబ సభ్యుల వేదన

తన తల్లి మరణానికి కారణం సైబర్ కేటుగాళ్లేనని.. కుటుంబ సభ్యులు పోలీసులకు ఫిర్యాదు చేశారు. రిటైర్డ్ డాక్టర్ అమాయకత్వాన్ని ఉపయోగించుకుని.. మోసగాళ్లు భయపెట్టి డబ్బులు దోచుకున్నారని బాధితుల కుటుంబం ఆవేదన వ్యక్తం చేసింది.

పోలీసులు కేసు నమోదు

ఫిర్యాదు ఆధారంగా హైదరాబాద్ సైబర్ క్రైమ్ పోలీసులు.. కేసు నమోదు చేసి దర్యాప్తు ప్రారంభించారు. నిందితులు ఉపయోగించిన బ్యాంక్ ఖాతాలను ట్రాక్ చేస్తూ, మోసానికి పాల్పడిన గ్యాంగ్‌ను పట్టుకునేందుకు ప్రయత్నాలు చేస్తున్నారు. అంతేకాక, ఈ తరహా డిజిటల్ అరెస్టు మోసాలపై ప్రజలు అప్రమత్తంగా ఉండాలని హెచ్చరికలు జారీ చేశారు.

డిజిటల్ అరెస్ట్ అంటే ఏమిటి?

డిజిటల్ అరెస్ట్ అనేది కొత్త తరహా సైబర్ మోసం. ఇందులో మోసగాళ్లు బాధితులకు ఫోన్ చేసి లేదా వీడియో కాల్ ద్వారా తాము పోలీసులు, సీబీఐ, ఇతర దర్యాప్తు సంస్థలకు చెందినవాళ్లమని చెబుతారు. మనీలాండరింగ్, డ్రగ్స్, టెర్రరిజం కేసులు మీపై నమోదయ్యాయని, వెంటనే అరెస్టు చేస్తామని భయపెడతారు.

తర్వాత భయంతో బాధితులు.. మోసగాళ్లు చెప్పిన బ్యాంక్ అకౌంట్స్‌కి డబ్బులు ట్రాన్స్ఫర్ చేస్తారు. ఈ ప్రక్రియలో చాలామంది పెద్ద ఎత్తున నష్టపోతున్నారు.

నిపుణుల హెచ్చరికలు

సైబర్ సెక్యూరిటీ నిపుణులు చెబుతున్నదేమిటంటే.. పోలీసులు లేదా దర్యాప్తు సంస్థలు ఎప్పటికీ వీడియో కాల్ ద్వారా కేసులు నమోదు అయ్యాయని చెప్పవు. డబ్బులు అడగడం అసలు జరగదు. ఎవరికైనా ఈ తరహా కాల్స్ వస్తే వెంటనే కాల్‌ను కట్ చేసి, 1930 (నేషనల్ సైబర్ క్రైమ్ హెల్ప్‌లైన్)లో ఫిర్యాదు చేయాలని సూచిస్తున్నారు.

ప్రజలకు సూచనలు

అపరిచితుల ఫోన్ కాల్స్‌ను నమ్మకండి.

వీడియో కాల్‌లో పోలీసులు, అధికారులు లా కనిపించినా నమ్మకండి.

బ్యాంక్ డీటెయిల్స్ లేదా డబ్బులు ఎప్పటికీ షేర్ చేయకండి.

వెంటనే సమీప పోలీస్ స్టేషన్ లేదా సైబర్ క్రైమ్ పోర్టల్‌లో (cybercrime.gov.in) ఫిర్యాదు చేయండి.

Also Read: రియల్ ఎస్టేట్ లో ఫ్రీ లాంచ్ ఆఫర్లతో భారీ మోసం..

హైదరాబాద్‌లో రిటైర్డ్ మహిళా డాక్టర్ మృతి ఘటన.. మరోసారి ప్రజలకు పెద్ద హెచ్చరికగా నిలిచింది. “డిజిటల్ అరెస్ట్” అనే కొత్త సైబర్ మోస పద్ధతిని గుర్తించి, ముందుగానే జాగ్రత్తలు తీసుకోవడం తప్పనిసరి. డబ్బులు కోల్పోవడమే కాదు, ప్రాణాలకు కూడా ప్రమాదం ఏర్పడే అవకాశం ఉందని.. ఈ సంఘటన తేటతెల్లం చేసింది.

Share

• 
• 
• 
• 
• 
•