Maha Shivratri 2026: మహాశివరాత్రి.. ఫిబ్రవరి 15నా లేక 16నా? తిథి, ముహూర్తం వివరాలు

Maha Shivratri 2026: హిందూ ధర్మంలో అత్యంత పవిత్రమైన పండగలలో మహా శివరాత్రి ఒకటి. లోక కల్యాణం కోసం హాలాహలాన్ని మింగిన నీలకంఠుడిని ఆరాధించే పర్వదినం ఇది. ప్రతి ఏటా మాఘ బహుళ చతుర్దశి నాడు ఈ వేడుకను జరుపుకుంటాం. అయితే ఈ సంవత్సరంలో ఈ పండగ ఫిబ్రవరి 15న వస్తుందా లేక 16న వస్తుందా అనే సందేహం చాలా మందిలో ఉంది. నిశిత కాలం, తిథి సమయాలను బట్టి ఫిబ్రవరి 15, ఆదివారం నాడే శివరాత్రి జరుపుకోవాలని పండితులు సూచిస్తున్నారు.

మహాశివరాత్రి విశిష్టత:

మహాశివరాత్రి అంటే కేవలం ఉపవాసం, జాగరణ మాత్రమే కాదు. ఇది జీవాత్మ పరమాత్మలో లీనమయ్యే పవిత్ర సమయం. ఈ ఏడాది ఫిబ్రవరి 15వ తేదీ మధ్యాహ్నం నుంచి చతుర్దశి తిథి ప్రారంభమై, ఫిబ్రవరి 16 మధ్యాహ్నం వరకు ఉంటుంది. శివరాత్రి పూజలో అత్యంత ప్రధానమైన ‘లింగోద్భవ కాలం’ (అర్ధరాత్రి సమయం) ఫిబ్రవరి 15 రాత్రి వస్తుంది. కాబట్టి ఆ రోజే పండగ జరుపుకోవడం మంచిది.

లింగోద్భవ కాలం ప్రాముఖ్యత:
పురాణాల ప్రకారం.. మహా శివరాత్రి రోజున అర్ధరాత్రి వేళ పరమశివుడు జ్యోతిర్లింగ రూపంలో ఉద్భవించాడు. ఈ సమయాన్ని ‘లింగోద్భవ కాలం’ అంటారు. ఈ సమయంలో శివుడికి అభిషేకం చేయడం వల్ల జన్మ జన్మల పాపాలు తొలగిపోతాయని భక్తుల నమ్మకం. అందుకే 15వ తేదీ రాత్రి చేసే జాగరణకు ఎంతో ప్రాముఖ్యత ఉంది.

మహాశివరాత్రి వెనక ఉన్న గాథలు:
ఈ పండగకు సంబంధించి అనేక కథలు ప్రచారంలో ఉన్నాయి.
పార్వతీ పరమేశ్వరుల కళ్యాణం: శివుడు, పార్వతీ దేవిని వివాహం చేసుకున్న రోజు ఇదేనని చెబుతారు.
హాలాహల భక్షణం: క్షీరసాగర మథనంలో ఉద్భవించిన హాలాహలాన్ని శివుడు మింగి, లోకాన్ని రక్షించినందుకు కృతజ్ఞతగా దేవతలు ఈ రాత్రి జాగరణ చేశారని పురాణాలు చెబుతాయి.
శివ తాండవం: సృష్టి, స్థితి, లయకారకుడైన శివుడు ఆనంద తాండవం చేసే రాత్రి కూడా ఇదే.

Also Read: మహాశివరాత్రి రోజు రుద్రాభిషేకం ఎప్పుడు చేయాలి ? పూర్తి వివరాలు మీకోసం

ఉపవాసం, జాగరణ:
మహా శివరాత్రి రోజున భక్తులు రోజంతా ఉపవాసం ఉంటారు. ఇది కేవలం ఆహారం మానేయడమే కాదు. ఇంద్రియాలను అదుపులో ఉంచుకుని మనసును దైవంపై లగ్నం చేయడం. రాత్రంతా మేల్కొని ‘ఓం నమశ్శివాయ’ అనే పంచాక్షరీ మంత్రాన్ని పఠించడం వల్ల మానసిక ప్రశాంతత లభిస్తుంది. శాస్త్రీయంగా చూస్తే.. ఈ రోజున భూమి యొక్క ఉత్తరార్ధ గోళంలో గ్రహాల స్థితి మనిషి లోని శక్తి కేంద్రాలను (చక్రాలను) సహజంగానే పైకి ఉద్వేగింపజేస్తుంది. అందుకే వెన్నముక నిటారుగా ఉంచి మేల్కొని ఉండటం వల్ల ఆరోగ్య పరంగా కూడా మేలు జరుగుతుంది.

అభిషేక ప్రియుడు శివుడు:
“అభిషేక ప్రియః శివః” అంటారు. శివరాత్రి రోజున శివలింగానికి పాలు, పెరుగు, తేనె, నెయ్యి, చెరకు రసం, కొబ్బరి నీళ్లతో అభిషేకం చేస్తారు. ముఖ్యంగా బిల్వ పత్రాలతో.. పూజించడం వల్ల మహా దేవుడు త్వరగా ప్రసన్నమవుతాడు.

మహాశివరాత్రి మానవాళికి క్రమశిక్షణ, భక్తి, త్యాగాన్ని బోధిస్తుంది. ఫిబ్రవరి 15న రాబోతున్న ఈ మహా పర్వదినాన్ని భక్తిశ్రద్ధలతో జరుపుకుని, ఆ సదాశివుని కృపాకటాక్షాలకు పాత్రులు కావాలని కోరుకుందాం.