వీటిని చూస్తే.. ఒళ్లు కంపరిస్తుంది, కానీ ఇవే మన ప్రాణాలు రక్షిస్తున్నాయని తెలుసా?..

Creatures that save human lives: ప్రకృతి ఎప్పుడూ ఎన్నో అద్భుతాలను, రహస్యాలను తనలో దాచుకుని ఉంటుంది. మన చుట్టూ తిరిగే కొన్ని జీవులను, పురుగులను చూస్తే ఒళ్లు గగురుపొడుస్తుంది, వెగటు పుడుతుంది లేదా భయం వేస్తుంది. పాములు, తేళ్లు, సాలీపురుగులు, జలగలు వంటి వాటిని చూడగానే మనం పరుగెత్తుతాము లేదా చంపేయాలని చూస్తాము. కానీ.. మనకు తెలియకుండానే ఇవే జీవులు మన ప్రాణాలను కాపాడుతున్నాయని.. ఈ భూమిపై మానవజాతి మనుగడకు ఇవే మూలస్తంభాలని మీకు తెలుసా? ఈ ఆసక్తికరమైన విషయాల గురించి ఇప్పుడు తెలుసుకుందాం!

సృష్టిలో ఏదీ వ్యర్థం కాదనేది పెద్దల మాట. దేవుడు లేదా ప్రకృతి ప్రతి ఒక్క ప్రాణికి ఒక ప్రత్యేకమైన బాధ్యతను అప్పగించింది. కానీ.. మనకు భయం కలిగించే లేదా అసహ్యం పుట్టించే ఎన్నో జీవులు నిత్యం మానవాళికి ఎంతో మేలు చేస్తున్నాయి. బాహ్య ప్రపంచానికి అవి భయంకరంగా కనిపించినప్పటికీ, వాటి వల్ల మనం పరోక్షంగా ఎన్నో ప్రాణాలను కాపాడుకుంటున్నాము.

1.మాగ్గట్స్ (వైద్య పురుగులు): చూడటానికి అసహ్యంగా అనిపించినా, కొన్నిరకాల క్లిష్టమైన గాయాలను మాన్పించడంలో ఇవి కీలక పాత్ర పోషిస్తాయి. సాధారణ యాంటీబయాటిక్స్ పనిచేయని చోట, గాయంలోని చనిపోయిన, ఇన్ఫెక్షన్ సోకిన కణజాలాన్ని ఇవి తినివేసి గాయాన్ని శుభ్రం చేస్తాయి. US FDA 2004లోనే వీటికి “Medical Maggots”గా గుర్తింపునిచ్చింది. అయితే ఇవి ల్యాబ్‌లో ప్రత్యేకంగా, ఇన్ఫెక్షన్లు రాకుండా పెంచే పురుగులు మాత్రమే.

2.కోన్ స్నెయిల్ (సముద్ర నత్త): సముద్రంలో కనిపించే ఈ నత్త విషం చాలా ప్రమాదకరమైనది. కానీ శాస్త్రవేత్తలు దీని విషం నుంచి Ziconotide (Prialt) అనే పెయిన్ కిల్లర్‌ను తయారుచేశారు. తీవ్రమైన , దీర్ఘకాలిక నొప్పులతో బాధపడేవారికి ఇది అద్భుతంగా పనిచేస్తుంది. అయితే ఇది సాధారణ మందు కాదు, తీవ్రమైన పార్శ్వ ప్రభావాలు ఉండే అవకాశం ఉండే అవకాశం ఉంది కాబట్టి డాక్టర్ల పర్యవేక్షణలోనే వాడతారు.

3.జలగలు : సాధారణంగా జలగలను చూస్తే భయపడతాం, కానీ శస్త్రచికిత్సల్లో ఇవి ప్రాణరక్షకంగా పనిచేస్తాయి. ప్లాస్టిక్ సర్జరీలు లేదా విరిగిపోయిన అవయవాలను తిరిగి కలిపేటప్పుడు రక్తప్రసరణ సరిగ్గా లేకపోతే జలగలను ఉపయోగిస్తారు. వీటి లాలాజలంలో ఉండే రసాయనాలు రక్తం గడ్డకట్టకుండా చూసి, రక్తం సజావుగా పారేలా చేస్తాయి.

4.హార్స్‌షూ క్రాబ్ (గుర్రపు పీత): ఈ పీత రక్తంలో ఉండే ప్రత్యేకమైన నీలి రంగు ద్రవం వైద్యరంగంలో అత్యంత విలువైనది. దీని రక్తం నుంచి తయారుచేసే LAL (Limulus Amebocyte Lysate) అనే పరీక్ష ద్వారా మనం వాడే ఇంజెక్షన్లు, మందులు, ఇతర బయోలాజికల్ ఉత్పత్తులలో హానికర బ్యాక్టీరియా (ఎండోటాక్సిన్లు) ఉందో లేదో తక్షణమే గుర్తిస్తారు. పరోక్షంగా ఇవి మనం వాడే ఔషధాల సురక్షితత్వాన్ని నిర్ధారిస్తాయి.

5.గిలా మాన్స్టర్ (విషపూరిత బల్లి): అమెరికాలోని ఎడారి ప్రాంతాల్లో కనిపించే ఈ విషపూరిత బల్లి లాలాజలాన్ని పరిశోధించి Exenatide అనే ఔషధాన్ని అభివృద్ధి చేశారు. ఇది టైప్-2 డయాబెటిస్ (షుగర్ వ్యాధి) ఉన్నవారిలో రక్తంలో చక్కెర స్థాయిలను క్రమబద్ధీకరించడానికి, ఇన్సులిన్ ఉత్పత్తిని పెంచడానికి ఎంతగానో తోడ్పడుతుంది.

6.బ్రెజిలియన్ పిట్ వైపర్ (పాము): Bothrops jararaca అనే ఈ బ్రెజిలియన్ విషపాము కాటు వేస్తే రక్తపోటు తగ్గిపోతుంది. శాస్త్రవేత్తలు ఈ సూత్రాన్ని ఉపయోగించి హై బీపీ (రక్తపోటు) నివారణకు Captopril అనే మందును తయారుచేశారు. పాము విషం ఆధారంగా FDA ఆమోదం పొందిన తొలి మందులలో ఇది ఒకటి.

7. షార్క్ (సొరచేప): సొరచేప కాలేయం (లివర్)లో Squalene అనే సహజ సిద్ధమైన కొవ్వు పదార్థం ఉంటుంది. దీనిని కొన్ని రకాల వ్యాక్సిన్లు బాగా పనితీరు పెంచడానికి ‘అడ్జువెంట్’గా ఉపయోగిస్తారు. అయితే ప్రస్తుతం ఈ పదార్థాన్ని మొక్కల నుంచి కూడా తయారుచేస్తున్నారు.

మనం చూసే చూపును బట్టి ప్రకృతిలో ఏది మంచిది, ఏది చెడ్డది అనేది నిర్ణయించలేము. పైకి భయపెట్టేలా.. అసహ్యంగా కనిపించే ప్రతీ జీవి వెనుక ఒక గొప్ప ప్రయోజనం దాగి ఉంది. కాబట్టి వాటిని చూసి భయపడటం కంటే, ప్రకృతి సమతుల్యతను కాపాడటంలో వాటి పాత్ర ఎంతో కీలకమని గ్రహించాలి. ఈ జీవులే లేకపోతే మానవజాతి మనుగడ ప్రశ్నార్థకంగా మారేది.