Diabetic Diet Guide: షుగర్ పేషెంట్లు.. ఇలా అస్సలు చేయొద్దు !

Diabetic Diet Guide: డయాబెటిస్ ఉన్న వారు తినే ఆహారం విషయంలో జాగ్రత్తలు తీసుకోవడం చాలా ముఖ్యం. రాత్రి భోజనం విషయంలో జాగ్రత్తలు వహించడం ద్వారా రక్తంలో చక్కెర స్థాయిలను నియంత్రణలో ఉంచుకోవచ్చు. అంతే కాకుండా లైఫ్ స్టైల్ మార్పుల వల్ల కూడా మంచి ఫలితం ఉంటుంది. చాలా మంది షుగర్ పేషెంట్లు తెలియక చేసే సాధారణ పొరపాట్లు, వాటిని ఎలా నివారించాలో ఇప్పుడు తెలుసుకుందాం.

రాత్రి భోజనం విషయంలో చేయకూడని సాధారణ పొరపాట్లు:
మధుమేహంతో బాధపడేవారు రాత్రి పూట చేసే చిన్నపాటి పొరపాట్లు కూడా చక్కెర స్థాయిలను పెంచేస్తాయి. సరైన ఆహార నియమాలను పాటించకపోవడం వల్ల నిద్రలేమి వంటి సమస్యలు కూడా వచ్చే అవకాశం ఉంది.

1. రాత్రి భోజనం పూర్తిగా మానేయడం:
క్యాలరీలను తగ్గించుకోవాలనే ఉద్దేశంతో కొందరు రాత్రి భోజనం పూర్తిగా మానేస్తారు. ఇది చాలా పెద్ద పొరపాటు. ఇలా చేయడం వల్ల రాత్రిపూట రక్తంలో చక్కెర స్థాయిలు చాలా తక్కువగా (హైపోగ్లైసీమియా) పడిపోవచ్చు లేదా మరుసటి రోజు అతిగా తినడం (రీబౌండ్ ఈటింగ్) కారణంగా చక్కెర స్థాయిలు అమాంతం పెరిగిపోవచ్చు. స్థిరమైన గ్లూకోజ్ స్థాయిల కోసం సమతుల్యమైన రాత్రి భోజనం తప్పనిసరి.

2. అతిగా తినడం లేదా ఆలస్యంగా తినడం:
రాత్రి భోజనం ఎక్కువ పరిమాణంలో తీసుకోవడం వల్ల జీర్ణ వ్యవస్థపై భారం పడి, రాత్రిపూట రక్తంలో చక్కెర స్థాయిలు పెరిగే అవకాశం ఉంది. అలాగే.. పడుకోవడానికి సరిగ్గా ముందు భోజనం చేయడం కూడా మంచిది కాదు. నిపుణుల సలహా ప్రకారం.. నిద్రపోవడానికి కనీసం 2-3 గంటల ముందు డిన్నర్ పూర్తి చేయాలి. ఆలస్యంగా తినడం వల్ల ఇన్సులిన్ పనితీరుకు ఆటంకం కలుగుతుంది.

3. శుద్ధి చేసిన కార్బోహైడ్రేట్లు ఎక్కువగా తీసుకోవడం:
రాత్రి భోజనంలో తెల్ల బియ్యం, మైదా ఉత్పత్తులు (నాన్, పూరీ, పరోటా వంటివి), పాస్తా వంటి శుద్ధి చేసిన కార్బోహైడ్రేట్లను ఎక్కువగా తీసుకోవడం వల్ల రక్తంలో చక్కెర స్థాయిలు త్వరగా పెరుగుతాయి. వీటిలో ఫైబర్ తక్కువగా ఉంటుంది.
పరిష్కారం: వీటికి బదులుగా ముడి బియ్యం (బ్రౌన్ రైస్), ఓట్స్ (ఫ్లేవర్స్ లేనివి), క్వినోవా లేదా చిరుధాన్యాలు (మిల్లెట్స్) వంటి పీచు పదార్థం (ఫైబర్) అధికంగా ఉండే సంక్లిష్ట కార్బోహైడ్రేట్లను తక్కువ పరిమాణంలో తీసుకోండి.

4. ప్రోటీన్, ఫైబర్ తక్కువగా ఉండే ఆహారం:
ప్రోటీన్, ఫైబర్ తక్కువగా ఉండే భోజనం త్వరగా జీర్ణమై.. గ్లూకోజ్ స్థాయిలు వేగంగా పెరిగేలా చేస్తుంది. అలాగే త్వరగా ఆకలి వేసి, రాత్రిపూట స్నాక్స్ తినాలనే కోరిక పెరుగుతుంది.
పరిష్కారం: ప్రతి రాత్రి భోజనంలో సరిపడా లీన్ ప్రోటీన్ (పెరుగు, పనీర్, పప్పులు, గ్రిల్ చేసిన చేప లేదా చికెన్), పీచు పదార్థాలు (ఆకుకూరలు, కూరగాయలు, బీన్స్) ఉండేలా చూసుకోండి. ప్రోటీన్, ఫైబర్ చక్కెర శోషణను నెమ్మది చేస్తాయి.

Also Read: లిప్ స్టిక్ తెగ వాడుతున్నారా ? క్యాన్సర్ రావొచ్చు జాగ్రత్త !

5. తియ్యటి డ్రింక్స్ లేదా డెజర్ట్‌లు తీసుకోవడం:
డిన్నర్ తర్వాత కోల్డ్ డ్రింక్స్, పండ్ల రసాలు, చక్కెర కలిపిన టీ/కాఫీ లేదా స్వీట్లు/కేకులు వంటివి తీసుకోవడం వల్ల రక్తంలో చక్కెర స్థాయిలు ఒక్కసారిగా పెరుగుతాయి. కృత్రిమ స్వీటెనర్లు ఉన్న డ్రింక్స్‌కు కూడా దూరంగా ఉండాలి.

పరిష్కారం: డెజర్ట్ తినాలనిపిస్తే.. తక్కువ గ్లైసెమిక్ ఇండెక్స్ (GI) ఉన్న పండ్లు లేదా దాల్చిన చెక్క కలిపిన చక్కెర లేని పెరుగును కొద్ది పరిమాణంలో తీసుకోవచ్చు. నీరు, అన్‌స్వీటెండ్ హెర్బల్ టీ తాగడం ఉత్తమం.

6. వేయించిన, నూనె పదార్థాలు:
వేయించిన చికెన్, పూరీ లేదా ఇతర నూనె పదార్థాలు జీర్ణం కావడానికి ఎక్కువ సమయం పడుతుంది. రాత్రిపూట జీర్ణక్రియ మందగిస్తుంది కాబట్టి.. ఇవి తీసుకోవడం వల్ల గ్లూకోజ్ స్థాయిలు పెరుగుతాయి. వీటికి బదులుగా ఆవిరిపై ఉడికించిన , గ్రిల్ చేసిన లేదా తక్కువ నూనెతో వండిన ఆహారాన్ని ఎంచుకోవాలి.