Anjeer: వీళ్లు అంజీర్‌లను అస్సలు తినకూడదు తెలుసా ?

Anjeer: అంజీర్‌ పండ్లలో పోషకాలు పుష్కలంగా ఉంటాయి. ముఖ్యంగా వీటిలో ఫైబర్, విటమిన్లు, ఖనిజాలు అధిక మోతాదులో ఉంటాయి. ఇవి సాధారణంగా మన ఆరోగ్యానికి మేలు చేస్తాయి. అయితే.. కొన్ని రకాల ఆరోగ్య సమస్యలతో బాధపడుతున్నవారు అంజీర్‌‌లను తినడం వల్ల ఇబ్బందులు తలెత్తే ప్రమాదం కూడా ఉంటుంది. ఇలాంటి పరిస్థితిలో అంజీర్‌ పండ్లను తీసుకోకపోవడం లేదా డాక్టర్‌ల సలహా మేరకు మాత్రమే తీసుకోవడం మంచిది.

ఎవరు అంజీర్‌ పండ్లను తినకూడదు ?

మధుమేహ వ్యాధిగ్రస్తులు (డయాబెటిస్): అంజీర్‌ పండ్లు సహజంగానే తియ్యగా ఉంటాయి. వీటిలో గ్లూకోజ్, ఫ్రక్టోజ్ వంటి సహజ చక్కెరలు అధిక మోతాదులో ఉంటాయి. ముఖ్యంగా ఎండిన అంజీర్‌లలో చక్కెర స్థాయి చాలా ఎక్కువ. మధుమేహం ఉన్నవారు వీటిని అధికంగా తీసుకోవడం వల్ల వారి రక్తంలో చక్కెర స్థాయిలు వేగంగా పెరిగే అవకాశం కూడా ఉంటుంది. ఇది వారి ఆరోగ్యానికి హానికరం. అందుకే.. మధుమేహ రోగులు అంజీర్‌లను తినే ముందు తప్పకుండా డాక్టర్‌ని సంప్రదించాలి.

కిడ్నీలో రాళ్లు ఉన్నవారు (మూత్రపిండాల్లో రాళ్లు): అంజీర్‌ పండ్లలో ఆక్సలేట్స్ అనే సమ్మేళనాలు ఉంటాయి. శరీరంలో ఆక్సలేట్ల శాతం అధికంగా ఉంటే.. అవి కాల్షియంతో కలిసి కిడ్నీలో రాళ్లు ఏర్పడటానికి లేదా ఇప్పటికే ఉన్న రాళ్లను పెద్దవిగా చేయడానికి కారణం అవుతాయి. కాబట్టి.. మూత్రపిండాల్లో రాళ్లు లేదా రాళ్లు వచ్చే అవకాశం ఉన్నవారు అంజీర్‌ పండ్లకు దూరంగా ఉండాలి.

రక్తం పల్చబరిచే మందులు వాడేవారు (బ్లడ్ థిన్నర్స్): అంజీర్‌లలో విటమిన్ K అధిక మోతాదులో ఉంటుంది. విటమిన్ K రక్తం గడ్డ కట్టడంలో ముఖ్యమైన పాత్ర పోషిస్తుంది. మీరు వార్ఫరిన్ (Warfarin) వంటి రక్తం పల్చబరిచే మందులు వాడుతున్నట్లయితే, అంజీర్‌లను తీసుకోవడం వల్ల ఆ మందుల ప్రభావం తగ్గి, రక్తం గడ్డకట్టే ప్రమాదం ఏర్పడుతుంది. కాబట్టి, ఈ రకం మందులు వాడేవారు అంజీర్‌లను తీసుకోవడానికి ముందు డాక్టర్‌ను సంప్రదించడం తప్పనిసరి.

జీర్ణ సమస్యలు ఉన్నవారు : అంజీర్‌లలో ఫైబర్ అధికంగా ఉంటుంది. ఇది సాధారణంగా మలబద్ధకంతో బాధపడేవారికి మంచిది. అయితే.. ఇప్పటికే అతిసారం లేదా ఏదైనా తీవ్రమైన జీర్ణ సమస్యలతో బాధపడేవారు అధిక మొత్తంలో అంజీర్‌లను తీసుకోవడం వల్ల వారి జీర్ణవ్యవస్థపై మరింత భారం పడి, విరేచనాలు మరింత తీవ్రమయ్యే అవకాశం ఉంటుంది.

Also Read: ముఖం తెల్లగా మెరిసిపోవాలా ? అయితే ఈ ఫేస్ సీరం వాడండి !

అలర్జీలు ఉన్నవారు: కొందరు వ్యక్తులకు అంజీర్‌ పండ్ల పట్ల అలర్జీ ఉంటుంది. అంజీర్‌ పండ్లు తినడం వల్ల ముఖ్యంగా సున్నితమైన చర్మంపై దద్దుర్లు లేదా దురదను కలిగించే ప్రమాదం కూడా ఉంటుంది. అలర్జీ లక్షణాలు (దద్దుర్లు, వాపు, శ్వాస తీసుకోవడంలో ఇబ్బంది) కనిపిస్తే వెంటనే డాక్టర్‌ను సంప్రదించండి.