రామాయణంలో జటాయువు గోళ్లు రావణుడు ఎందుకు తీసుకున్నాడు? ఇదే అసలు కారణం

Ravana Jatayu Battle| రామాయణంలో జటాయువు పోరాటం ఎంతో ప్రత్యేకమైన ఘట్టం. సీతాదేవిని రావణుడు అపహరించుకుని వెళ్తున్నప్పుడు, వృద్ధుడైన జటాయువు తన ప్రాణాలను సైతం లెక్కచేయకుండా అడ్డుకుంటాడు. ఈ పోరాటంలో రావణుడిని గాయపరచి అతని తలనే తెగనరికే స్థాయిలో దాడి చేస్తాడు. చివరకు రావణుడు జటాయువు రెక్కలను నరికివేసి అతడిని ఓడిస్తాడు. అయితే దంగల్ దర్శకుడు నితేష్ తివారీ తెరకెక్కించిన ‘రామాయణ: రైజ్ ఆఫ్ ఎ లెజెండ్’ చిత్రంలో ఈ ఆసక్తికరమైన సన్నివేశం కనిపిస్తుంది. జటాయువును ఓడించిన తర్వాత రావణుడు అతని గోరును విరిచి తన దగ్గర ఉంచుకుంటాడు. అసలు రావణుడు అలా ఎందుకు చేశాడు? దీని వెనుక అతని ఉద్దేశం ఏమిటో తెలుసుకుందాం.

రావణుడితో ధైర్యంగా పోరాడిన జటాయువు

సీతాదేవిని రావణుడు ఆకాశమార్గాన పుష్పక విమానంలో అపహరించుకెళ్తుండగా గరుడ వంశీకుడు జటాయువు రాక్షస రాజుని అడ్డుకుంటాడు. వయసు మీదపడినా, రావణుడి శక్తికి భయపడకుండా పోరాటానికి దిగుతాడు. తన పదునైన ముక్కు, గోళ్లు, బలమైన రెక్కలతో రావణుడిపై దాడి చేస్తాడు. ఈ పోరాటంలో జటాయువు తన గోరుతో రావణుడి తలను కూడా నరికివేస్తాడు.
అయితే బ్రహ్మదేవుని వరం వల్ల రావణుడికి తిరిగి తల పొందగల శక్తి ఉంటుంది. కొద్దిసేపటికే కోలుకుని జటాయువుపై మరింత తీవ్రంగా దాడి చేస్తాడు. చివరకు అతని రెక్కను నరికివేయడంతో జటాయువు నేలపై పడిపోతాడు.

జటాయువు గోరును రావణుడు ఎందుకు దాచుకున్నాడు?

ఆ సమయంలో ముల్లోకాలకు అధిపతిగా ప్రకటించుకున్న రావణుడు.. తనను ఎదిరించే వారిని క్షమించేవాడు కాదు. అలా చేసిన స్వయాన తన బావను కూడా అంతమొందిస్తాడు. అంటే తనను చూసి అందరూ భయపడాలని రావణుడు కోరుకునేవాడు. తనకు ఎదురుగా నిలబడే ధైర్యం ఎవరికీ ఉండకూడదని భావించేవాడు.
అలాంటి రావణుడిని ఒక వృద్ధ పక్షి గాయపరచడం అతని అహంకారానికి పెద్ద దెబ్బ. అందుకే జటాయువు గోరును తన దగ్గర ఉంచుకున్నట్లు సినిమాలో చూపించి ఉండవచ్చు. ఆ గోరు తనను గాయపరిచిన సంఘటనకు గుర్తుగా ఉండవచ్చు. అలాగే తనను సవాలు చేసిన ప్రత్యర్థిపై ఆధిపత్యం చూపించాలనే ఆలోచన కూడా కావచ్చు. అయితే ఇది సినిమాలో చూపించిన సృజనాత్మక అంశం మాత్రమే. దీని వెనుక కారణాన్ని చిత్రంలోని ప్రతీకాత్మక అర్థంగా చూడాలి.

Also Read: వాల్మీకి కంటే ముందే రామాయణం రచించిన హనుమంతుడు.. మరి సముద్రంలోకి ఎందుకు పడేశాడు.. ఈ ఆసక్తికర కథ తెలుసా?

వాల్మీకి రామాయణంలో రావణుడు జటాయువు గోరును తీసుకున్నాడా?

ఇక్కడ ఒక ముఖ్యమైన విషయం తెలుసుకోవాలి. వాల్మీకి రామాయణంలోని అరణ్యకాండలో రావణుడు జటాయువు గోరును తీసుకున్నట్లు ప్రస్తావన లేదు.
సీతను అపహరించడం తప్పని రావణుడికి జటాయువు చెబుతాడు. రావణుడు వినకపోవడంతో ఇద్దరి మధ్య భీకర యుద్ధం జరుగుతుంది. జటాయువు రావణుడి రథాన్ని ధ్వంసం చేసి, అతని సారథిని చంపుతాడు. కొంతసేపు రావణుడిని నిలువరిస్తాడు. చివరకు రావణుడు తన ఖడ్గంతో జటాయువు రెక్కలను నరికేస్తాడు.
తీవ్రంగా గాయపడిన జటాయువు నేలపై పడిపోతాడు. ఆ తర్వాత మరణిస్తూ రామలక్ష్మణులకు సీత అపహరణ గురించి తెలియజేస్తాడు.

Also Read: భారతదేశంలో మొట్టమొదటి రామాయణం సినిమా.. రాముడు, సీత పాత్రలు పోషించిన ఒకే నటుడు

రావణుడి విజయాలకు గుర్తులు

వాల్మీకి రామాయణం ప్రకారం.. రావణుడు తన సోదరుడు కుబేరుడి నుంచి పుష్పక విమానాన్ని స్వాధీనం చేసుకున్నాడు. ఉత్తరకాండలో అతని ఇతర విజయాలు, దేవతలపై చేసిన దండయాత్రల గురించి కూడా ప్రస్తావన ఉంది.

జటాయువు పోరాటం ఎందుకు ప్రత్యేకం?

జటాయువు రావణుడి చేతిలో ఓడిపోయినా, అతని ధైర్యం మాత్రం ఓడిపోలేదు. సీతను రక్షించడానికి ప్రాణాలను సైతం లెక్కచేయలేదు. అతని పోరాటం రాముడికి సీత ఆచూకీ తెలియడానికి కూడా సహాయపడింది.