ప్రతి తల్లిదండ్రులు తమ పిల్లలు మంచి వ్యక్తులుగా ఎదగాలని కోరుకుంటారు. మంచి మార్కులు సాధించడం మాత్రమే మంచి పెంపకం కాదు. చిన్నప్పటి నుంచే పిల్లలకు మర్యాద, గౌరవం, కృతజ్ఞత వంటి విలువలను నేర్పించడం కూడా చాలా ముఖ్యం. బాల్యంలో నేర్చుకున్న అలవాట్లు జీవితాంతం వారితోనే ఉంటాయి. ముఖ్యంగా ఐదేళ్ల వయస్సు వరకు పిల్లలు కొత్త విషయాలను చాలా వేగంగా నేర్చుకుంటారు. అందుకే ఈ సమయంలో మంచి నడవడికను అలవాటు చేయడం చాలా అవసరం.
పిల్లలకు చిన్నప్పటి నుంచే మర్యాదగా మాట్లాడే అలవాటు చేయాలి. ఏదైనా వస్తువు అడిగేటప్పుడు “ప్లీజ్” అని చెప్పడం నేర్పించండి. ఎవరైనా సహాయం చేసినప్పుడు “థ్యాంక్యూ” చెప్పే అలవాటు పెంచండి. అలాగే తప్పు చేసినప్పుడు “సారీ” అని చెప్పడం కూడా నేర్పించాలి. ఈ చిన్న పదాలు పిల్లల్లో గౌరవం, బాధ్యత, కృతజ్ఞత భావాలను పెంచుతాయి.
చాలా మంది పిల్లలు కొత్త వ్యక్తులను చూసినప్పుడు సిగ్గుపడతారు. అలాంటి సమయంలో తమ పేరు స్పష్టంగా చెప్పడం, ఎదుటివారికి నమస్కారం చెప్పడం నేర్పించాలి. అవసరమైతే తల్లిదండ్రుల పేర్లు కూడా చెప్పేలా ప్రోత్సహించాలి. ఇలా చేయడం వల్ల పిల్లల్లో ఆత్మవిశ్వాసం పెరుగుతుంది.
పెద్దలు మాట్లాడుతున్నప్పుడు మధ్యలో అడ్డుకోకూడదని పిల్లలకు చెప్పాలి. ఎదుటివారి మాట పూర్తిగా విన్న తర్వాత ప్రశాంతంగా సమాధానం ఇవ్వడం నేర్పించాలి. మర్యాదగా మాట్లాడే అలవాటు కుటుంబంలోనే కాదు, పాఠశాలలో కూడా మంచి గుర్తింపు తెస్తుంది.
పిల్లలు స్నేహితుల ఇళ్లు, పుట్టినరోజు వేడుకలు లేదా కుటుంబ కార్యక్రమాలకు వెళ్లినప్పుడు అక్కడి నుంచి బయలుదేరే ముందు “ధన్యవాదాలు” చెప్పడం అలవాటు చేయాలి. ఈ అలవాటు వారికి కృతజ్ఞత భావాన్ని పెంపొందిస్తుంది. అలాగే ఇతరుల పట్ల గౌరవం చూపడం కూడా నేర్పుతుంది.
భోజనం చేసే సమయంలో కొన్ని ప్రాథమిక నియమాలు పిల్లలకు తెలియాలి. తినేటప్పుడు పెద్దగా శబ్దం చేయకూడదు. నోట్లో ఆహారం ఉన్నప్పుడు మాట్లాడకూడదు. భోజనం పూర్తయ్యాక ప్లేట్ను సరైన చోట పెట్టడం అలవాటు చేయాలి. ఈ చిన్న చిన్న టేబుల్ మేనర్స్ పిల్లల్లో క్రమశిక్షణ పెంచుతాయి.
Also Read: అమ్మాయిలకు తల్లిదండ్రులు తప్పనిసరిగా నేర్పాల్సిన 3 జీవిత పాఠాలు
పిల్లలు తల్లిదండ్రులను చూసే ఎక్కువగా నేర్చుకుంటారు. అందుకే మీరు చూపించే ప్రవర్తనే వారికి ఆదర్శంగా ఉంటుంది. ఒకసారి చెప్పగానే పిల్లలు వెంటనే నేర్చుకోరు. ప్రేమగా మళ్లీ మళ్లీ గుర్తు చేయాలి. పిల్లలు మంచి అలవాట్లు పాటించినప్పుడు వారిని తప్పకుండా అభినందించాలి. దీంతో వారు ఆ అలవాట్లను కొనసాగించడానికి మరింత ఆసక్తి చూపుతారు.
చిన్న వయస్సులో నేర్పిన మంచి అలవాట్లు పిల్లల వ్యక్తిత్వాన్ని తీర్చిదిద్దుతాయి. మర్యాద, గౌరవం, కృతజ్ఞత వంటి విలువలు వారికి జీవితాంతం ఉపయోగపడతాయి. తల్లిదండ్రులు మంచి ఆదర్శంగా ఉంటే పిల్లలు కూడా బాధ్యతాయుతమైన, వినయపూర్వకమైన వ్యక్తులుగా ఎదుగుతారు.
Share
రాజు వెడ్స్ రాంబాయి’ హీరో అఖిల్ రాజ్ కారుపై దాడి.. డెలివరీ బాయ్ వివాదమే కారణమా?
బెంగళూరుకు పాండ్యా జంప్.. స్టోక్స్ పై కన్నేసిన అంబానీ !
