వేసవికాలంలో ఫ్రిజ్ వినియోగం ఎక్కువగా ఉంటుంది. కొన్ని సందర్భాల్లో ఫ్రిజ్ నిరంతరం పనిచేసినా సరైన కూలింగ్ ఇవ్వదు. ఫ్రీజర్లో మంచు సరిగా ఏర్పడదు. ఆహార పదార్థాలు కూడా తగినంత చల్లగా ఉండవు. చాలామంది వెంటనే గ్యాస్ తగ్గిపోయిందని అనుకుంటారు. అయితే ప్రతి సారి గ్యాస్ తగ్గిపోవడమే కారణం ఉండదు. కొన్నిసార్లు ఫ్రిజ్ డోర్ రబ్బర్ సీల్ సరిగా మూసుకోకపోవడం వల్ల కూడా ఈ సమస్య వస్తుంది.
ఫ్రిజ్ డోర్ చుట్టూ ఉండే రబ్బర్ గ్యాస్కెట్ గాలి బయటకు వెళ్లకుండా అడ్డుకుంటుంది. ఈ సీల్ సరిగా లేకపోతే చల్లని గాలి బయటకు వెళ్లిపోతుంది. అదే సమయంలో బయట గాలి ఫ్రిజ్లోకి వస్తుంది. దీంతో కంప్రెసర్ ఎక్కువసేపు పనిచేయాల్సి వస్తుంది. దీనివల్ల విద్యుత్ వినియోగం కూడా పెరుగుతుంది. అలాగే ఫ్రిజ్ కూలింగ్ కెపాసిటీ తగ్గిపోతుంది.
ఈ పరీక్ష కోసం ఒక సాధారణ కాగితం సరిపోతుంది. కాగితాన్ని ఫ్రిజ్ డోర్, బాడీ మధ్యలో ఉంచండి. తరువాత డోర్ను పూర్తిగా మూసివేయండి. ఇప్పుడు కాగితాన్ని నెమ్మదిగా బయటకు లాగండి. కాగితం గట్టిగా ఇరుక్కుపోతే డోర్ సీల్ సరిగా పనిచేస్తోంది. కాగితం చాలా సులభంగా బయటకు వస్తే రబ్బర్ సీల్ సరిగా మూసుకోవడం లేదని అర్థం. దీంతో చల్లని గాలి బయటకు వెళ్లే అవకాశం ఉంటుంది.
రబ్బర్ కొద్దిగా వదులుగా ఉంటే ఇంట్లోనే సరిచేయవచ్చు. ఇందుకోసం హెయిర్ డ్రైయర్ను తక్కువ లేదా మీడియం వేడిపై ఉంచాలి. రబ్బర్ సీల్పై .. పై నుంచి కింద వరకు సమానంగా వేడి గాలిని పంపాలి. ఎక్కువసేపు ఒకే చోట వేడి చేయకూడదు. అలా చేస్తే రబ్బర్ దెబ్బతినే ప్రమాదం ఉంటుంది. వేడి చేసిన తర్వాత రబ్బర్ సహజంగా చల్లబడే వరకు వేచి ఉండాలి.
రబ్బర్ను సరిచేసిన తర్వాత మరోసారి అదే కాగితం పరీక్ష చేయాలి. ఈసారి కాగితం గట్టిగా పట్టుకుని ఉంటే సీల్ సరిగ్గా పనిచేస్తోందని అర్థం. ఫ్రిజ్ కూడా మళ్లీ బాగా చల్లబరుస్తుంది. అయినప్పటికీ కాగితం సులభంగా బయటకు వస్తే రబ్బర్ మార్చాల్సి రావచ్చు. అలాంటి పరిస్థితిలో అనుభవం ఉన్న టెక్నీషియన్ను సంప్రదించడం మంచిది.
Also Read: టీలో ఈ రెండు వేస్తే ఎన్నో ప్రయోజనాలు.. ఆరోగ్య సమస్యలు కూడా దూరం.. డాక్టర్ చెప్పిన చిట్కా
ఫ్రిజ్ రబ్బర్ సీల్ను ప్రతి రెండు లేదా మూడు వారాలకు ఒకసారి శుభ్రం చేయాలి. దుమ్ము, ఆహార కణాలు సీల్పై పేరుకుపోతాయి. దీంతో డోర్ పూర్తిగా మూసుకోకపోవచ్చు. ఒక మెత్తని గుడ్డతో, తేలికపాటి సబ్బు నీటితో శుభ్రం చేయండి. తరువాత పూర్తిగా ఆరబెట్టండి. ఇలా చేస్తే ఫ్రిజ్ కూలింగ్ మెరుగుపడుతుంది. విద్యుత్ వినియోగం కూడా తగ్గుతుంది.
Share
ఈ తేదీల్లో పుట్టినవారు ప్రేమలో మోసపోతుంటారు.. వీరి అత్యంత మంచి గుణమే వీరి బలహీనత
