Unexplained Weight Loss: ఉన్నట్టుండి బరువు తగ్గిపోయారా ?

Unexplained Weight Loss: బరువు తగ్గడం అనేది చాలా మందికి సంతోషాన్ని కలిగించే విషయం. కానీ ఎటువంటి ప్రయత్నం చేయకుండా, ఆహార నియంత్రణ పాటించకుండా, వ్యాయామం చేయకుండా బరువు తగ్గితే అది ఆందోళన కలిగించే అంశం. దీనినే “అనుకోకుండా బరువు తగ్గడం అని అంటారు. సాధారణంగా ఆరు నెలల కాలంలో ఒక వ్యక్తి తన శరీర బరువులో 5% కంటే ఎక్కువ తగ్గితే, దానిని వైద్యపరమైన దృష్టితో పరిశీలించాల్సిన అవసరం ఉంటుంది. దీనికి అనేక కారణాలు ఉంటాయి. వాటిలో కొన్నింటిని మనం ఇక్కడ వివరంగా తెలుసుకుందాం.

అనుకోకుండా బరువు తగ్గడానికి అత్యంత సాధారణ కారణం జీవనశైలి మార్పులు. అయితే, అవి కూడా తెలియకుండా జరగవచ్చు. ఉదాహరణకు.. మానసిక ఒత్తిడి, ఆందోళన లేదా నిద్రలేమి వంటివి శరీరంలోని హార్మోన్ల సమతుల్యతను దెబ్బతీసి ఆకలిని తగ్గిస్తాయి. దీంతో బరువు తగ్గుతారు. అలాగే.. అసాధారణంగా బరువు తగ్గడానికి ముఖ్యమైన కారణాలలో థైరాయిడ్ సమస్యలు ఒకటి. థైరాయిడ్ గ్రంధి శరీర జీవక్రియలను నియంత్రిస్తుంది. థైరాయిడ్ హార్మోన్ ఎక్కువగా ఉత్పత్తి అయితే (హైపర్ థైరాయిడిజం), జీవక్రియ వేగవంతమై బరువు తగ్గడానికి కారణమవుతుంది.

అదేవిధంగా, జీర్ణవ్యవస్థకు సంబంధించిన వ్యాధులు కూడా బరువు తగ్గడానికి దారితీస్తాయి. క్రోన్’స్ డిసీజ్ లేదా సెలియాక్ డిసీజ్ వంటివి శరీరానికి పోషకాలను గ్రహించకుండా అడ్డుకుంటాయి. దీంతో బరువు తగ్గిపోతారు. మధుమేహం కూడా ఒక ముఖ్య కారణం. టైప్ 1 మధుమేహం ఉన్నవారిలో శరీరం ఇన్సులిన్‌ను సరిగా ఉత్పత్తి చేయకపోవడంతో బరువు వేగంగా తగ్గుతారు.

బరువు తగ్గడానికి గల మరో కారణం క్యాన్సర్. వివిధ రకాల క్యాన్సర్లలో కణితి పెరగడానికి అధిక శక్తి అవసరం అవుతుంది. దీనివల్ల శరీరం తన శక్తి నిల్వలను ఉపయోగించుకుంటుంది. అంతేకాకుండా.. క్యాన్సర్ వల్ల ఆకలి మందగించి, వికారం వంటి లక్షణాలు కనిపిస్తాయి. దీనివల్ల కూడా బరువు తగ్గుతారు. ఈ కారణాలన్నీ కాకుండా, గుండె జబ్బులు, కిడ్నీ సమస్యలు, క్షయ వంటి దీర్ఘకాలిక వ్యాధులు కూడా బరువు తగ్గడానికి కారణమవుతాయి.

Also Read: చెర్రీస్ తినడం వల్ల మతిపోయే లాభాలు !

అనుకోకుండా బరువు తగ్గడం అనేది ఒక వ్యాధి లక్షణం మాత్రమే.. ఒక వ్యాధి కాదు. కాబట్టి, ఎటువంటి ప్రయత్నం లేకుండా బరువు తగ్గుతున్నట్లయితే..వెంటనే డాక్టర్ ని సంప్రదించడం చాలా ముఖ్యం. డాక్టర్లు బరువు తగ్గడానికి గల కారణాలను గుర్తించి, సరైన చికిత్సను అందిస్తారు. సాధారణంగా.. సరైన రోగ నిర్ధారణ కోసం రక్త పరీక్షలు, మూత్ర పరీక్షలు, ఇతర స్కానింగ్ పరీక్షలు అవసరం కావచ్చు. సరైన సమయంలో చికిత్స తీసుకోవడం ద్వారా అనేక సమస్యలను నివారించవచ్చు.