SpaceX World Record : స్పేస్ ఎక్స్‌ప్లొరేషన్ టెక్నాలజీస్ కార్పొరేషన్(SpaceX) మరో మైలురాయిని అధిగమించింది. భూకక్ష్యలోకి 1000 మెట్రిక్ టన్నుల ద్రవ్యరాశిని ప్రవేశపెట్టిన తొలి అస్ట్రోనాటిక్స్ కంపెనీగా ప్రపంచ రికార్డుల్లోకి ఎక్కంది. ఈ నెల 11న ట్రాన్స్‌పోర్టర్-9 మిషన్‌ను చేపట్టడం ద్వారా స్పేస్ఎక్స్ ఈ అరుదైన ఘనతను సొంతం చేసుకుంది.
ఆ మిషన్‌లో భాగంగా వివిధ క్లయింట్లకు చెందిన 90 పే‌లోడ్లను ఏకకాలంలో రోదసిలోకి పంపింది. క్యూబ్‌శాట్లు, మైక్రోశాట్లు, ఆర్బిటాల్ ట్రాన్స్‌ఫర్ వెహికల్స్ వంటివి 90 పేలోడ్లలో ఉన్నాయి. దీంతో ఈ ఏడాది వెయ్యిటన్నులకు పైగా మాస్‌ను కక్ష్యలోకి ప్రవేశపెట్టిన సంస్థగా రికార్డు సాధించిందంటూ స్పేస్ఎక్స్ అధినేత ఎలాన్ మస్క్ తన ఆనందాన్ని ఎక్స్-యూజర్లతో షేర్ చేసుకున్నారు.
మరే ఇతర దేశం కన్నా ఒక ఏడాదిలో అధిక రాకెట్లను ప్రయోగించిన సంస్థగా రికార్డు సాధించిందని మస్క్ పేర్కొన్నారు. స్పేస్ఎక్స్కు అతి సమీపంలో ఉన్న పోటీదారు రష్యా. ఆ దేశం 500 టన్నుల మాస్‌ను అంతరిక్షంలోకి ప్రయోగించింది. మిగిలిన దేశాలన్నీ కలిసి ఈ ఏడాదిలో కక్ష్యలోకి చేర్చిన మాస్ మొత్తం 250 టన్నులు మాత్రమే.
90 పేలోడ్లును కక్ష్యలోకి చేర్చడం గొప్ప విషయమే అయినా.. ఇదే అత్యధిక సంఖ్య కాదు. స్పేస్ ఎక్స్ ట్రాన్స్‌పోర్టర్-1 మిషన్‌దే ఇప్పటివరకు రికార్డు. 2021 జనవరిలో ఆ మిషన్ ద్వారా 143 ఉపగ్రహాలను అంతరిక్షంలోకి పంపారు. ఇక ఈ ఏడాది జనవరిలో నింగికెగసిన ట్రాన్స్‌పోర్టర్-6 ద్వారా 114 శాటిలైట్లను భూకక్ష్యలోకి ప్రవేశపెట్టారు.
ట్రాన్స్‌పోర్టర్-9 ఈ ఏడాదిలో స్పేస్ఎక్స్కు 82వ ఆర్బిటాల్ మిషన్. ఒక ఏడాదిలో ఇన్ని మిషన్లను చేపట్టడమూ రికార్డే. ఈ ఏడాది ప్రయోగాలన్నీ స్టార్‌లింక్ విస్తరణకు సంబంధించినవే. ప్రస్తుతం 5 వేల వరకు స్టార్‌లింక్ శాటిలైట్లు పనిచేస్తున్నాయి.
