McDonalds: టమాటా ధరల ప్రభావం సామాన్యులతో పాటు పెద్దపెద్ద సంస్థలపై కూడా పడుతుంది. సెంచరీ దాటిన టమాటా ధర కొన్నిచోట్ల రూ.200 పైకి చేరుకుంది. ఈ ప్రభావం ఫాస్ట్ ఫుడ్, చైన్ మెక్ డొనాల్డ్స్ పైనా పడింది. దాంతో బర్గర్లలో టమాటాను దూరం పెట్టాల్సిన పరిస్థితి ఏర్పడింది. ఈ నేపథ్యంలో మెక్‌డొనాల్డ్స్ తమ రెస్టారెంట్‌లలోని ఆహార ఉత్పత్తుల్లో టమాటాల వాడకాన్ని నిలిపివేస్తున్నట్లు రెస్టారెంట్ వెలుపల అతికించిన నోటీసులో తెలిపింది. మార్కెట్లో నాణ్యమైన టమాటాలు అందుబాటులో లేని కారణంగా బర్గర్లను టమాటా లేకుండానే తినాల్సి ఉంటుందని ముందుగానే నోటిస్ ద్వారా వెల్లడించింది. ఇందుకు సంబంధించిన ఫోటో ఇప్పుడు నెట్టింట వైరల్ గా మారింది.
మెక్‌డొనాల్డ్స్ ప్రకటనను సెబీ రిజిస్టర్డ్ ఇన్వెస్ట్‌మెంట్ అడ్వైజర్ ఆదిత్య షా ట్విట్టర్ లో తొలుత షేర్ చేశారు. మెక్ డొనాల్డ్ ఢిల్లీ విభాగం ఈ నోటీసును ఉంచిందని, చివరకు మెక్ డొనాల్డ్స్ కూడా టమాటాలను కొనుగోలు చేయలేకపోతోందని ఆదిత్యషా సరదాగా కామెంట్ చేశారు.అత్యుత్తమ పదార్థాలతో ఉత్తమమైన ఆహారాన్ని అందించేందుకు ఎల్లప్పుడూ తాము కట్టుబడి ఉన్నామని, తాము ప్రయత్నించినప్పటికీ, మంచి టమాటాలను తగిన పరిమాణంలో పొందలేకపోతున్నామని మెక్‌డొనాల్డ్స్ నోటీసులో వివరించింది.
టమాటాలు పండే ప్రాంతాల్లో భారీ వర్షాలు, జూన్‌లో సాధారణం కంటే అధిక ఉష్ణోగ్రతల కారణంగా పంట ఉత్పత్తి తగ్గింది. దీంతో ధరలు భారీగా పెరిగాయి. మరో కొన్ని రోజుల పాటు ధరలు ఈ విధంగా కొనసాగుతాయని మార్కెట్ అధికారులు అంటున్నారు.
Share
Train Accident: ఒడిశా రైలు ప్రమాదం.. ముగ్గురి అరెస్ట్..
Vinayaka Temple: రోజుకి వెయ్యి బిందెల నీటితో దేవుడికి స్నానం చేయించే ఆలయం ఇదొక్కటే
