V Hanumantha Rao: గాంధీ భవన్ వేదికగా కాంగ్రెస్ నాయకుడు, ప్రభుత్వ సలహాదారు వి. హనుమంత్ రావు (VH) చేసిన వ్యాఖ్యలు ఇప్పుడు తెలంగాణ రాజకీయాల్లో తీవ్ర దుమారం రేపుతున్నాయి. బీజేపీ వైఖరిపై విహెచ్ నేరుగా విరుచుకుపడటంతో ఒక్కసారిగా రాజకీయ సమీకరణాలు వేడెక్కాయి.
రాహుల్ పర్యటనపై బీజేపీకి హెచ్చరిక
రాహుల్ గాంధీ తెలంగాణ పర్యటనను అడ్డుకుంటామని బీజేపీ రాష్ట్ర అధ్యక్షుడు వ్యాఖ్యానించడంపై విహెచ్ తీవ్ర ఆగ్రహం వ్యక్తం చేశారు. ‘మా నాయకుడు వస్తే అడ్డుకోవడం ఏ రకమైన పద్ధతి? కేంద్ర మంత్రి అమిత్ షా తెలంగాణకు వచ్చినప్పుడు మేమేమైనా అడ్డుకున్నామా?’ అని ప్రశ్నించారు. ఒకవేళ రాహుల్ గాంధీని అడ్డుకుంటే, రాబోయే రోజుల్లో ఢిల్లీ నుంచి వచ్చే బీజేపీ కేంద్ర నాయకులను తెలంగాణలో అడుగుపెట్టనివ్వమని తీవ్రంగా హెచ్చరించారు.
ఓబీసీ జనగణనపై నేరుగా ప్రశ్నలు
దేశవ్యాప్తంగా జరుగుతున్న జనగణనలో ఓబీసీల వివరాలను ఎందుకు చేర్చలేదో బీజేపీ సమాధానం చెప్పాలని విహెచ్ డిమాండ్ చేశారు. కాంగ్రెస్ శ్రేణులకు పిలుపునిస్తూ.. గ్రామాల్లోకి వచ్చే బీజేపీ నాయకులను ఓబీసీ గణనపై నిలదీయాలని కోరారు. వెనుకబడిన వర్గాల హక్కుల పట్ల బీజేపీకున్న నిజస్వరూపం దీని ద్వారా బయటపడుతోందని విమర్శించారు.
అప్పుల భారం ఉన్నా తగ్గని సంక్షేమం
గత ప్రభుత్వం చేసిన వేల కోట్ల అప్పులకు నెలకు భారీగా వడ్డీలు చెల్లిస్తున్నప్పటికీ, కాంగ్రెస్ ప్రభుత్వం ఇచ్చిన ప్రతి హామీని క్రమంగా అమలు చేస్తోందని స్పష్టం చేశారు. తీవ్రమైన ఆర్థిక ఇబ్బందులు ఉన్నప్పటికీ, రేవంత్ రెడ్డి నాయకత్వంలో దేశంలో ఎక్కడా లేని విధంగా అద్భుతమైన అభివృద్ధి పథకాలు తెలంగాణలో సాగుతున్నాయని విహెచ్ కొనియాడారు. రాజకీయాల్లో హుందాతనం ఉండాలని, బెదిరింపులకు కాంగ్రెస్ భయపడేదే లేదని ఆయన స్పష్టం చేశారు.
Also Read: రాజకీయాలు ఎన్నికల వరకే! కరీంనగర్‌లో రూ.4 కోట్ల అర్బన్ పనులకు బండి సంజయ్, పొన్నం శ్రీకారం
Share
భారత్‌లోకి టపాసులు ఎప్పుడు వచ్చాయి.. దీపావళి బాణాసంచా వెనుక ఇంత చరిత్ర ఉందా?
ఇది బ్యాలెట్ తీర్పు.. వైసీపీ గ్రాఫ్ డౌన్‌ఫాల్, ఏడు జిల్లాల్లో ఆ పార్టీకి జీరో రిజల్ట్- సీఎం చంద్రబాబు
