MLA Daughter Wedding| ఒక పెళ్లి వేడుకలో 4 లక్షల మందికి విందు ఏర్పాటు చేస్తే ఎలా ఉంటుంది? అందులోనూ గుర్రపు పందెం నిర్వహించి, విజేతకు ఏకంగా మహీంద్రా థార్ కారును బహుమతిగా ఇస్తే? ఇప్పుడు ఓ రాజకీయ కుటుంబ వివాహం ఇలాంటి ఆసక్తికరమైన ఏర్పాట్లతో వార్తల్లో నిలిచింది. రాజకీయ ప్రముఖులు, సినీ తారలు, గాయకులు హాజరుకానున్న ఈ పెళ్లి వేడుకకు భారీ ఏర్పాట్లు జరుగుతున్నాయి.
బిహార్‌లోని మొకామా ఎమ్మెల్యే అనంత్ సింగ్ తన చిన్న కుమార్తె శివాంగి సింగ్ వివాహాన్ని ఘనంగా నిర్వహించేందుకు సిద్ధమవుతున్నారు. నవంబర్ 25న రిషికేశ్ కుమార్ అలియాస్ అంకిత్‌తో ఆమె వివాహం జరగనుంది. అదే రోజు అనంత్ సింగ్ చిన్న కుమారుడు అభినవ్‌కు ఉపనయన కార్యక్రమం కూడా నిర్వహించనున్నారు. ఈ వేడుకల కోసం అనంత్ సింగ్ స్వగ్రామం లడ్మాలో వందల ఎకరాల స్థలాన్ని సిద్ధం చేస్తున్నారు. ఉత్తరప్రదేశ్‌లోని మౌ ప్రాంతం నుంచి ప్రత్యేకంగా డెకరేటర్లను రప్పించారు. అతిథుల కోసం భారీ పందిళ్లు ఏర్పాటు చేస్తున్నారు. సుమారు 4 లక్షల మందికి భోజనాలు పెట్టాలని కుటుంబం భావిస్తోంది.
ఈ పెళ్లిలో గుర్రపు పందెం ప్రత్యేక ఆకర్షణగా నిలవనుంది. ఇందుకోసం ప్రత్యేకంగా మరో మైదానాన్ని సిద్ధం చేస్తున్నారు. దేశంలోని వివిధ ప్రాంతాల నుంచి గుర్రాలు తెప్పిస్తున్నారు. ఈ పోటీలో విజేతకు మహీంద్రా థార్ కారు బహుమతిగా ఇవ్వనున్నారు. రెండో స్థానంలో నిలిచిన వ్యక్తికి మోటార్‌సైకిల్. ఈ విషయాన్ని అనంత్ సింగ్ స్వయంగా వెల్లడించారు. పర్యావరణాన్ని దృష్టిలో ఉంచుకుని పెళ్లి వేడుకల్లో బాణసంచా కాల్చబోమని కూడా ఆయన తెలిపారు.
ఈ వివాహానికి ప్రముఖ రాజకీయ నాయకులు, సినీతారలు కూడా అతిథులు. ప్రధానమంత్రి నరేంద్ర మోదీని ఆహ్వానించాలని అనంత్ సింగ్ భావిస్తున్నారు. బిహార్ మాజీ ముఖ్యమంత్రి నితీశ్ కుమార్, ఆర్జేడీ అధినేత లాలూ ప్రసాద్ యాదవ్, తేజస్వీ యాదవ్‌లకు కూడా ఆహ్వానాలు పంపనున్నారు. సినీ నటుడు సోనూ సూద్, సింగర్ మైథిలీ ఠాకూర్, ఎంపీ మనోజ్ తివారీ, భోజ్‌పురి నటుడు పవన్ సింగ్, నటి అక్షరా సింగ్‌లకు కూడా ఆహ్వానాలు అందించనున్నారు. వేడుకల్లో భోజ్‌పురి, మగహి, ముంబై కళాకారులతో ప్రత్యేక సంగీత కార్యక్రమం కూడా ఉంటుంది.
ఈ వివాహ వేడుకల తర్వాత కొన్ని రోజులకే ఎమ్మెల్యే అనంత్ సింగ్ మరో కీలకమైన తేదీ ఎదురుకానుంది. దులార్చంద్ యాదవ్ హత్య కేసులో డిసెంబర్ 1లోగా లొంగిపోవాలని కోర్టు ఆదేశించింది.
2025 అక్టోబర్‌లో మొకామాలో అనంత్ సింగ్ ప్రత్యర్థి తరఫున ప్రచారం చేస్తున్న దులార్చంద్ యాదవ్ హత్యకు గురయ్యారు. ఈ హత్యను అనంత్ సింగ్ కుట్ర పన్ని చేయించారనే ఆరోపణలు ఉన్నాయి. ఈ కేసులో ఆయనకు మార్చిలో పాట్నా హైకోర్టు బెయిల్ మంజూరు చేసింది. ఇప్పుడు నవంబర్ చివరికి ఆ బెయిల్ గడువు పూర్తికానుంది.
బిహార్ రాజకీయ కుటుంబాల వివాహాలు గతంలోనూ ప్రత్యేకంగా వార్తల్లో నిలిచాయి. 2018 మే 12న లాలూ ప్రసాద్ యాదవ్ కుమారుడు తేజ్ ప్రతాప్ యాదవ్, మరో రాజకీయ నాయకుడి కుమార్తె ఐశ్వర్య వివాహం చేసుకున్నారు. ఈ వేడుకకు సుమారు 7,000 మంది హాజరయ్యారు. అలాగే లాలూ చిన్న కుమార్తె రాజలక్ష్మి యాదవ్, ములాయం సింగ్ యాదవ్ కుటుంబానికి చెందిన తేజ్ ప్రతాప్ సింగ్ యాదవ్ వివాహం చేసుకున్నారు. ఈ వివాహాలు బిహార్, ఉత్తరప్రదేశ్ రాజకీయ కుటుంబాల మధ్య బంధాలను మరింత బలపరిచాయి.
Also Read: నెల జీతం సరిపోవడం లేదు.. ధరల పెరుగుదలతో విలవిల్లాడుతున్న 70 శాతం భారతీయులు
Share
తిరుపతి పాలిటిక్స్‌లో రచ్చ.. సోషల్ మీడియా ప్రచారాలపై పులివర్తి సుధా రెడ్డి పైర్!
